Parliamnet Monitoring

  • Facebook
  • Twitter

News

Կարևորը` թույն չլինի

Կարևորը` թույն չլինի
Հարցազրույց Ազգային ժողովի փոխնախագահ Էդուարդ Շարմազանովի հետ
-Երկուշաբթի օրվանից, երբ խորհրդարանում սկսվեց Կառավարության գործունեության ծրագրի քննարկումը, վարչապետն ու խորհրդարանական մեծամասնությունը ընդդիմությանը համագործակցության առաջարկություն են անում: Իսկապես իշխանությունն այդքան զգո՞ւմ է ընդդիմության կարիքը:
-Նախ, այո, զգում ենք, երկրորդը` զգանք-չզգանք` ճիշտ ճանապարհը դա է, որովհետև քաղաքակիրթ աշխարհում ավելի արդյունավետ այլ մոդել չկա: Համագործակցությունը չի նշանակում, թե բոլորը պետք է նույն կերպ մտածեն: Համագործակցությունը նշանակում է, որ կարևորագույն հարցերը պետք է միասին քննարկել, իշխանությունը պետք է լսելու կարողություն ունենա, լսի նաև ընդդդիմության առաջարկները ու դրանցից կառուցողականները ընդունի իր ծրագրերում, իսկ ընդդիմությունը հնարավորինս զերծ մնա մերժողական դրսևորումներից: 

-Բայց երեկ ընդդիմադիր տարբեր խմբակցությունների պատգամավորներ հայտարարեցին, որ  չեն վստահում  ու չեն հավատում իշխանության`ընդդիմության հետ համագործակցելու առաջարկի անկեղծությանը
-Ես իշխանության և ընդդիմության օրենսդրական համագործակցության բազում օրինակներ կարող եմ նշել: Ընդունվել են բազմաթիվ օրինագծեր, որոնց տակ դրվել են և ընդդիմության, և իշխանության ստորագրությունները: Մյուս կողմից` ես չեմ կարծում, որ ինչ ընդդիմությունը ասի, իշխանությունը պետք է հալած յուղի տեղ ընդունի: Ամենակարևոր քայլը վստահության ճանապարհին  իշխանության լսելու կարողությունն է: Չեմ կարծում, որ 5 տարի առաջ իշխանությունը ավելի բաց է եղել համագործակցության համար, ու եթե ընդդիմությունը այսօր դա չի նկատում, իր պրոբլեմն է:

-Բայց դահլիճում հայտարարվեց այդ մասին:
-Ընդդիմությունը միայն Վահան Հովհաննիսյանը չէ: Ընդդիմությունը նաև  մյուս քաղաքական ուժերն են: Հրանտ Բագրատյանն, օրինակ, ասաց` ես պատրաստ եմ համագործակցության, ինքը չասաց` պատրաստ չեմ: Ավելին, ընդունեց, որ կառավարության ծրագրում կան որոշակի թեզեր` հիմնված իր առաջարկությունների վրա: Այսինքն, համագործակցություն որոշ առումներով, կա: Որքանո՞վ է այդ համագործակցությունը արդյունավետ ու մեր ուզածը. այ սա արդեն բանավիճելու հարց է:

-Իսկ ինչո՞ւ չի ստացվում ձեր ուզած համագործակցությունը:
-Չի ստացվում, որովհետև կա ընդդիմություն  և իշխանություն, ու յուրաքանչյուրը ունի իր մարտավարական խնդիրները: Իսկ եթե ավելի անկեղծ լինեմ` ընդդիմությանը երևի նյարդայնացրել են ավագանու ընտրությունների արդյունքները: Բայց նյարդայնանալու փոխարեն լավ կլիներ իրենց ձախողումների պատճառները հասկանային: Ամենահեշտ բանը ձախողումների մեջ իշխանությանը մեղադրելն է, բայց դրանից ընդդիմությունը չի ուժեղանում:

-Իշխանությանը քննադատող 4 ուժերից երկուսը` ՀՅԴ-ն ու ԲՀԿ-ն տարիներ առաջ կոալիցիայի կազմում էին ու համագործակցում էին ՀՀԿ-ի հետ: Ինչո՞ւ չկարողացաք պահել իրենց այդ համագործակցության դաշտում:
-Իշխանությունը գիշեր-ցերեկ չի մտածում, թե ոնց անի, որ անպայման ՀՅԴ-ն ու ԲՀԿ-ն լինեն կոալիցիայի մեջ: Կոալիցիաները լինում են կոնկրետ ծրագրերի շուրջ: Դաշնակցությունը, պարզ է չէ՞, որ կոալիցիայից դուրս եկավ ոչ թե տնտեսական քաղաքականության, այլ հայ-թուրքական արձանագրությունների պատճառով: Չլիներ տարակարծությունը այս հարցի շուրջ, իրենք կարող է մինչև հիմա լինեին կոալիցիայի կազմում: Ինչ վերաբերում է «Բարգավաճ Հայաստանին», ես չեմ ուզում որևէ մեկին վերապահումով մոտենալ, բայց ԲՀԿ-ն քաղաքական դասական կուսակցություն չէ: Ինձ համար անհասկանալի է, որ քաղաքական կուսակցությունը պետության համար ամենակարևոր քաղաքական պրոցեսի ընթացքում 3 ամիս ոչ մի ծպտուն չի հանում: Նախագահական ընտրություններին չմասնակցեցին, բայց գոնե կարող էին ինչ-որ ձևով ուղղորդել իրենց ընտրողներին: Ու այսքանից հետո այս ուժի համար ասել քաղաքական կուսակցություն. մի քիչ ամպագորգոռ է հնչում այս դեպքում:

-Սուրբ Հովհաննես Մկրտիչ եկեղեցու բացման ժամանակ տեղի ունեցավ Գագիկ Ծառուկյանի և Տիգրան Սարգսյանի ողջագուրումը: -Եվ համբույրը -Այո, և համբույրը, դրան նախորդել էին ավագանու ընտրությունները: Այս ամենից հետո արդեն նկատելի է, որ ԲՀԿ-ն նույն ջերմեռանդությամբ չի քննադատում Տիգրան Սարգսյանին ու կառավարությանը, կառավարության ծրագրի քննարկման ընթացքում էլ ԲՀԿ-ից ելույթներ գրեթե չհնչեցին: Կարծում եք` ինչո՞ւ:
-Սա ևս մեկ անգամ խոսում  է այն մասին, որ կուսակցությունը հստակ ռազմավարություն չունի: Ես չեմ ուզում կոռեկտության սահմաններն անցել, բայց եթե դու ամբողջ տարին դժգոհում ես, նախագահական ընտրությունների ժամանակ 3 ամիս ձայն չես հանում,  դրանից հետո նորից ամպագորգոռ քննադատություն ես սկսում ու հիմա էլի ձայն չես հանում ու ընդամենը մի Ստեփան Մարգարյանի ելույթով խմբակցության տեսակետ ես հայտնում. ընտրողները պիտի սրանից եզրակացություն անեն, այլ ոչ թե ես: Ինձ համար ամեն բան շատ պարզ է:

-Կասե՞ք` ինչն է պարզ:
-Ես ընդհանուր ասեմ. քաղաքական ուժերը պետք է քննադատեն, աշխատեն ու ներկայացնեն իրենց աշխատանքը ոչ միայն նախընտրական ժամանակաշրջանում:

-Տիգրան Սարգսյանը իր եզրափակիչ ելույթում ասաց, թե զգում է, որ դահլիճում մտածելակերպ է փոխվել: Դրանից առաջ Գալուստ Սահակյանի ելույթն էր, որի ընթացքում ոչ կոռեկտ ակնարկներ հնչեցին Զարուհի Փոստանջյանի հասցեին: Որքանո՞վ էր այդ ելույթը տեղավորվում փոխված մտածելակերպի սահմաններում:
-Գալուստ Սահակյանի ելույթը իր ոճի մեջ էր. մի քիչ սարկազմով, մի քիչ հումորով, մի քիչ հիմնավորված: Ինքն իր կարծիքն ասաց, ինձ դուր եկավ Ջիվանու ոճով ասված` «իմ շուլուխը ընկեր Վահանի հանճարին վնաս չէ» արտահայտությունը:

-Իսկ Դուք անձամբ նիստերի դահլիճում քառօրյայի վերջում մտածելակերպի փոփոխություն զգացի՞ք: 
-Այո, զգացի, սրտացավություն կար:

-Սկզբում չկար, քննարկումից հետո եղա՞վ:
-Չեմ ասում` սկզբում չկար: Առհասարակ, երբ  մի բան սկսվում է, դու չգիտես, թե ինչ հունով կգնա: Քննարկման ավարտին ես տեսա, որ ընդդիմադիր իմ ընկերների ելույթները, մեծ մասամբ, ոչ թե նպատակ ունեին ցեխ շպրտելու, այլ սրտացավություն էին պարունակում: Մեզ համար շատ կարևոր է, որ իմ երկրի ընդդիմությունը ազգային հարցերում անզիջում է ու նաև` քննադատող: Այն ընդդիմությունը, որը սուր չի քննադատում, հնարավորություն է տալիս իշխանությանը լճանալու ու տեղում դոփելու:

-Իր սուր քննադատական ելույթից հետո Արամ Մանուկյանն ասաց, թե ՀՀԿ-ն նյարդայնացել է: Ինչո՞ւ էիք, ուրեմն, նյարդայնանում սուր ելույթներից: 
-Եթե քեզ նյարդային  պատասխանում են, եթե քեզ ասում են` էս, էս, էս, ոնց չնյարդայնանաս: Ես անձամբ նյարդային չէի, բայց ընդհանուր առմամբ, մի մոռացեք, որ քաղաքական գործիչներն էլ նույն միս ու արյունից են կազմված, կարող են նյարդայնանալ: Կարևորը` թույն չլինի:

Քվեարկության պատմություն

Շարմազանով Էդուարդ Հովսեփի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Շարմազանով Էդուարդ «Հայաստանի հանրապետական կուսակցություն» 895 9 1 4 54 12 33
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները