Parliamnet Monitoring

  • Facebook
  • Twitter

News

Հ. Մարգարյանը՝ կուտակայինի ու արժանապատվության մասին

Հ. Մարգարյանը՝ կուտակայինի ու արժանապատվության մասին

Հարցազրույց ԱԺ ՕԵԿ խմբակցության պատգամավոր Հովհաննես Մարգարյանի հետ: 

-Կուտակային կենսաթոշակային համակարգի պարտադիր բաղադրիչի դեմ բողոքի ակցիաները նոր թափ են ստանում. օրենքի ընդդիմախոսները պատրաստվում են դիմել Սահմանադրական դատարան: Որպես կողմ քվեարկած պատգամավոր, մտահոգություններ չունե՞ք:

-Որևէ մտահոգություն չունեմ, որովհետև դա իրավունք է, և մարդիկ կարող են իրացնել: Ինքս բազմաթիվ անգամ եղել եմ Սահմանադրական դատարանում, ներկայացրել եմ հարցեր:

-Այս օրենքի դեպքում չե՞ք կարծում, որ հակասահմանադրականության խնդիր կա:

-Ես ինձ իրավունք չեմ վերապահում մեկնաբանել Սահմանդրությունը: Դա Սահմանադրական դատարանի բացառիկ իրավունքն է, մեր գործընկերները կդիմեն, կքննարկվի, կմեկնաբանվի` կա՞ խախտում, թե՞ ոչ: Եթե լինի խախտում, բնականաբար մենք պարտավոր ենք իրականացնել Սահմանադրական դատարանի որոշումը: Մենք այս հարցը երկար ենք քննարկել, տարիներ շարունակ: Ավելի առարկայական հարցը սկսեց քննարկվել 2007-2008 թվականներին, և պետք էր ավելի արժանապատիվ կենսաթոշակ ապահովելու մեխանիզմ գտնել: Ի վերջո, բոլորս էլ գնալու ենք այդ ճանապարհով:

-Դուք չեք գնալու, քանի որ 1974 թվականից առաջ եք ծնվել:

-Չէ, ես ուզում եմ ասել, որ կենսաթոշակ բոլորս ենք ստանալու: Գիտեք, հետևյալն ասեմ` երբ խոսվել է ռեֆորմների մասին, մարդիկ սկզբից ծիծաղել են, հետո դարձել է քննարկման առարկա, բայց հետո դա դարձել է անբեկանելի իրողություն: Այդպես էր ԽՍՀՄ ավանդների փոխհատուցման հարցը: Ամեն օր մարդիկ դիմում են փոխհատուցման համար: Նույն վիճակն էր երեխայի ծնվելու դեպքում միանվագ գումարները ավելացնելու ժամանակ: Սա էլ լավ բարեփոխում է, որ բոլորն ստանան արժանապատիվ կենսաթոշակ, որ կարողանան գոնե իրենց նվազագույն հարցերը լուծել: Հիշեք` ԱՊՊԱ-ի ներդրման ժամանակ ինչքան դժգոհ էին, սվիններով էին ընդունում: Այս հարցն էլ ընդունվել է երկար քննարկումների արդյունքում, ընդ որում՝ կողմ են քվեարկել նաև մեր այն գործընկերները, որոնք հիմա դժգոհում են:

-Նկատի ունեք «Բարգավաճ Հայաստան» խմբակցությա՞նը:

-Չէ, ընդհանուր առմամբ մեր գործընկերներին: Օրենքով սահմանված կարգով՝ յուրաքանչյուր քվեարկության արդյունք դրվում է ԱԺ պաշտոնական կայքում, և մարդիկ կարող են բացել-նայել, թե տվյալ օրենքին որ պատգամավորն ինչպես է քվեարկել: Օրենքը երբ մտնի գործողության մեջ, կարող է փոփոխություն կատարելու անհրաժեշտություն առաջանալ: Պետք է օրենքը գործի, որ հասկանանք` ինչ փոփոխությունների անհրաժեշտություն կա: Մենք սկզբում ասում էինք, որ ֆոնդերի կառավարիչները գումարների 50-60 տոկոսը պետք է ներդնեն Հայաստանում, կարող է վաղը որոշենք 80-100 տոկոսն էլ այստեղ ներդնել: Սա մեր ձեռքին է: Մենք պետք է գնանք այս ճանապարհով, ամբողջ աշխարհն է դրա վրա հիմնված, գնանք ու տեսնենք` որտեղ է բացթողումը:

-Իսկ փորձե՞լ եք հասկանալ նաև այն մարդկանց, ովքեր ասում են, որ ցածր աշխատավարձ են ստանում, վճարում են հարկեր ու հավելյալ 5 տոկոս էլ պետք է վճարեն կենսաթոշակային համակարգին:

-Ես այդպես չեմ կարծում: Ես ժողովրդի հետ զրուցել եմ: Ուղղակի եթե մեր քաղաքացին զգա, որ իր գումարն ապահովագրված է ու կարող է հետագայում ինքը կամ իր ժառանգը օգտվել դրանից, չեմ կարծում, որ որևէ մեկը դեմ կարող է լինել դրան: Ինչ վերաբերում է ֆոդերին ապա նրանց նկատմամբ վստահությունը ժամանակի ընթացքում կձևավորվի:

-Այս համակարգի շահառու կա՞ Ձեր ընտանիքում:

-Այո, ավագ որդիս է:

-Չի՞ բողոքում համակարգից:

-Նա իրավաբան է և միշտ ասում է` կյանքը իր հետ բերում է առաջընթաց, և սա ինձ թվում է դեպի ապագայի միտված քայլ է: Նա ըմբռնումով է մոտենում, և էլի եմ կրկնում` պետք չի վախենալ, այս համակարգը կիրառվել է տարբեր երկրներում: Մի խոսքով, իմ կարծիքով, մենք պետք է ժողովրդի վերահսկողության ներքո գնանք այս բարեփոխման:

-Պարոն Մարգարյան, ՕԵԿ խմբակցությունը  նոր անդամ ունի, ում հետ կապված, ինչպես դուք հայտարարեցիք, դիմելու եք իրավապահ մարմիններին: Իսկապե՞ս, որոշել եք դիմել դատախազություն:

-Հաճախ, երբ վիրավորել են, զգուշացրել ենք, կանգ են առել: Բայց էս դեպքում կանգ չառան, գործը հասավ իմ գործընկերոջը (նկատի ունի Լևոն Դոխոլյանին) վիրավորելուն, իսկ նման վերաբերմունքն ինձ համար անընդունելի է:

-Նկատի ունե՞ք մականունն օգտագործելը:

-Իհարկե: Իմ պատկերացումներով՝ դա զրպարտություն է և խորը վիրավորանք: Ես Ձեզ վստահեցնում եմ, որ զրպարտելուց վտանգավոր հարված չկա, երբ դու դա չես, բայց ասում են, դրանից մեծ վիրավորանք չկա, վտանգավոր հարված չկա մարդու համար: Յուրաքանչյուր հայ տղամարդու, արժանապատվություն կրող մարդու համար ամենամեծ վիրավորանքը դա է (նշենք, որ մամուլում ՕԵԿ խմբակցության շարքերը վերջերս համալրած  Լևոն Դոխոլյանը նշվում է Քույրիկ Լևոն մականունով): Նա մեր տասնյակ տարիների կուսակից գործընկերն է, պարկեշտ, երկու երեխաների ծնող, մի քանի լեզվի տիրապետող հայ տղամարդ: Չէի ցանկանա, որ այդպես դիմավորեին իրեն:

Քվեարկության պատմություն

Մարգարյան Հովհաննես Հայկի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Մարգարյան Հովհաննես «Օրինաց երկիր» 432 44 125 181 179 179 143
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները