Parliamnet Monitoring

  • Facebook
  • Twitter

News

Կոալիցիան ընկալվում է որպես պաշտոնների շուրջ համաձայնություն

Կոալիցիան ընկալվում է որպես պաշտոնների շուրջ համաձայնություն

Հարցազրույց ՀՅԴ խմբակցության անդամ Արծվիկ Մինասյանի հետ:

- Պարոն Մինասյան, ՍԴ-ն թեև ոչ իշխանական ուժերի կողմից վիճարկվող դրույթները հակասահմանադրական ճանաչեց, բայց որոշեց, որ «Կուտակային կենսաթոշակների մասին» օրենքն այս տեսքով պետք է գործի մինչը սեպտեմբերի 30-ը: ՍԴ-ի որոշումը Ձեզ ավելի շատ հարցե՞ր, թե պատասխաններ տվեց:


- ՍԴ-ն հայեցակարգային մակարդակով բավարարել է մեր պահանջը. պարտադիր բաղադրիչն այն տեսքով, որով նկարագրված է օրենքում, ճանաչվել է Սահմանադրությանը հակասող և անվավեր: Երկրորդ խոշոր ձեռքբերումն այն է, որ ՍԴ-ն դրել է ամբողջ համակարգի հիմնարար վերանայման խնդիր: Երրորդ` արձանագրել է, որ իրավական համակարգը, այս դեպքում 50-ից ավելի օրենքներ, որոշակի խնդիր կարող է ունենալ, եթե անվավեր ճանաչված նորմերը գործադրվեն անմիջապես հրապարակման պահից: ՍԴ այս տեսակետը, ստեղծելով երկիմաստ մտածելու հնարավորություն, որոշ մարդկանց կողմից մեկնաբանվում է, թե իբր այն չի վերացրել պարտադիր բաղադրիչը: Իրականում ՍԴ որոշումը հիմնված է հետևյալ տրամաբանության վրա. որպեսզի իրավական անվտանգության խնդիր չառաջանա, գործադրման են ենթակա այն նորմերը, որոնք կապված չեն քաղաքացու սեփականության կամ մեկ այլ իրավունքի ոտնահարման հետ: Այդ համատեքստում պարտադիր բաղադրիչը հրապարակման պահից կարող է չգործադրվել, և դրա արդյունքում համակարգի անվտանգության որևէ մակարդակ չի կարող նվազել: Եվ անտրամաբանական է 9 ամիսների համար գանձումներ կատարելը, քանի որ այն շարունակություն չի ունենալու: Մի քանի դրույթներ էլ կան, բայց կարևորագույն խնդիրը հետևյալն է. ՍԴ որոշման մեջ պարտադիր բաղադրիչը գնահատվել է որպես սեփականության իրավունքի սահմանափակում: Այս համատեքստում որևէ մեկնաբանություն չի կարող տրվել հիմնավորելու համար, թե ինչու պետք է գանձում կատարվի:

-Բայց ՍԴ նախագահ Գագիկ Հարությունյանն ու դատարանի անդամ Ֆելիքս Թոխյանն ասում են, որ աշխատավարձերից կենսաթոշակային գանձումները պետք է կատարվեն:

-ՍԴ որևէ անդամ, ինչպես և ՀՀ պաշտոնատար որևէ անձ, իրավունք չունի մեկնաբանել ՍԴ որոշումը: Այն ենթակա է կատարման` գերակայություն ունենալով մարդու և քաղաքացու՝ Սահմանադրությամբ ամրագրված հիմնարար ազատությունը: Որոշումը ես դիտարկում եմ այս համատեքստում և պնդելու եմ մինչև վերջ: Իսկ որպեսզի համակարգային առումով լուծում տրվի այս իրավիճակին, կառավարությունը, նախ, պարտավոր է դադարեցնել հակասահմանադրական մեկնաբանությունը, ապա` ենթաօրենսդրական ակտերում ձեռնարկել փոփոխություն, որի գործադրմամբ բացառապես քաղաքացու կամաարտահայտմանը կթողնվի կուտակային վճար կատարելու ինստիտուտը: Եթե կառավարությունը սա չի անում կամ դանդաղում է, ԱԺ-ին էլ է տրված այդ հնարավորությունը: Կարծում եմ, որ քաղաքական ուժերը առաջիկա օրերին հանդես կգան օրենսդրական նախաձեռնությամբ` «Կուտակային կենսաթոշակների մասին» օրենքում ամրագրելով նորմ, որ մինչև սեպտեմբերի 30-ը օրենքի 5-րդ հոդվածի դրույթները գործում են բացառապես կամավորության սկզբունքով:

-ՍԴ որոշումը Ձեզ համար անսպասելի՞ էր:

-Ի սկզբանե ասել եմ, որ անհրաժեշտ է հավատալ սահմանադրական արդարադատությանը: Ես ուրախ եմ, որ իմ սպասումները դրական ելք ունեցան, որովհետև կոնցեպտուալ մակարդակում շատ լուրջ գործ է արված: ՍԴ անդամ Ֆելիքս Թոխյանը հեռուստատեսային իր հարցազրույցում շատ տրամաբանական շղթա կառուցեց և ասաց, թե ՍԴ որոշումից հետո անմտություն է կուտակային վճարներ կատարելը, իսկ թե ինչու հետագայում փոխեց իր տեսակետը, չեմ կարող ասել: ՍԴ-ն կոնցեպտուալ առումով գտնվեց իր բարձունքին, միաժամանակ բոլոր այն անձինք, ովքեր ունեին ճնշում գործադրելու հնարավորություն, դա չարեցին: Այսպիսով՝ ստեղծվել է լավ նախադեպ, որ հետագայում էլ, քաղաքացիական հասարակության տեսակետները հաշվի առնելով, հիմնարար փոփոխություններ իրականացնենք սոցիալական պաշտպանության ոլորտում: Եվ ոչ թե ընդունենք այն կեցվածքը, որը մինչ այժմ ցուցաբերում է քաղաքական մեծամասնությունը և կառավարությունը`սկսած գործազրկության նպաստը կտրելուց, մայրերի նպաստները նվազեցնելուց մինչև կուտակային կենսաթոշակային համակարգի այս ոչ սահմանադրական լուծումը:

- Ոչ իշխանական քառյակի պայքարն ու ՍԴ որոշումը ազդեցություն ունեցա՞ն վարչապետ Տիգրան Սարգսյանի հրաժարականի վրա:

- Ես միայն կարող եմ փաստել, որ 2010թ., երբ ԱԺ-ում քննարկվում էր «Կուտակային կենսաթոշակների մասին» օրինագիծը, ես և մեր խմբակցության մի քանի պատգամավորներ արձանագրել ենք, որ այն երկրներում, որտեղ անտեսելով մասնագիտական շրջանակներին, արհամարհելով կոնսենսուսի անհրաժեշտությունը` առաջարկվել է պարտադիր բաղադրիչը կամ կենսաթոշակային համակարգում ոչ երկարաժամկետ ռազմավարական լուծում, բերել է այդ պահի կառավարության հրաժարականին: Եվ եթե կա օրգանական կապ վարչապետի հրաժարականի և այդ պայքարի միջև, շատ կցանկանայի, որ իշխանություններն այդ մասին բարձրաձայնեին: Դա մեր երկրում հանրային պատասխանատվության լուրջ ինստիտուտ կձևավորի:

-Քառյակը պատրաստվում էր ապրիլի 28-ից 30-ը Ազատության հրապարակում շուրջօրյա հանրահավաքներ անցկացնել: Տիգրան Սարգսյանի հրաժարականից հետո դրանք լինելո՞ւ են:

-Ես քառյակի անունից չեմ կարող պատասխանել, բայց ինձ թվում է, որ ապրիլի 28-ի ոչ հանրահավաքը, ոչ էլ օրակարգում առաջադրված հարցերն ինքնանպատակ չէին: Ի վերջո` տեղի է ունեցել կառավարության հրաժարականի ընդունում, նշանակում է կա հնարավորություն, որ նոր կառավարությունը, հաշվի առնելով հասարակության մեջ դժգոհության չափազանց մեծ աստիճանը, ներկայացնի ծրագիր, որը հաշվի կառնի ստեղծված վիճակից դուրս գալու անհրաժեշտությունը: Մինչև ապրիլի 28-ը կա ժամանակ: Եվ եթե ապրիլի 28-ին կառավարության հրաժարականի փոխարեն կառավարության ծրագրի հարց քննարկվի, ես չեմ զարմանա:

-Իշխանություններն արդեն չեն բացառում ազգային համաձայնության կառավարություն ձևավորելու հնարավորությունը: Հնարավո՞ր է կամ նպատակահարմար համարո՞ւմ եք, որ քառյակը մասնակցի նման կառավարության ձևավորմանը:

-Իմ կարծիքով՝ մեր երկրում օր առաջ անհրաժեշտ է հանրային հանդուրժողականության հենքի վրա ձևավորել կառավարություն` անկախ կուսակցական պատկանելությունից, անկախ քաղաքական հայացքներից: Գլխավորն այն է, որ յուրաքանչյուր մարդ, քաղաքական գործիչ ինքը զգա իր պատասխանատվությունը հանրության, պետության առջև: Եթե նման սկզբունք է դրվում, կարծում եմ՝ ոչ միայն քառյակը, նաև քառյակից դուրս ցանկացած քաղաքական ուժ իր պատասխանատվության բաժինը պետք է ունենա երկրի զարգացման գործում: Ընդ որում, բոլորովին պարտադիր չէ, որ դա լինի կառավարության կազմի մեջ:

-Հնարավոր համարո՞ւմ եք, որ ձևավորվի նոր կոալիցիա:

-Քանի որ կոալիցիա տերմինը հեղինակազրկվել է, և կոալիցիան ցավալիորեն ընկալվում է որպես պաշտոնների շուրջ որոշակի համաձայնություն, ես շատ կուզենայի, որ այդ բառը չօգտագործվեր: Իսկ զուտ համաձայնության տեսակետից, համաձայնության կառավարության մակարդակով` ինչու չէ, հնարավոր է:

-Դաշնակցությունը նման դեպքում մաս կկազմի՞ նոր կառավարությանը:

-Ես չեմ կարող պատասխանել կուսակցության անունից: Մենք այս պահին գտնվում ենք ընդդիմադիր դաշտում: Մեր ծրագրերը չեն փոխվել, մեր պահանջներն ու առաջարկությունները մնում են նույնը, իսկ քաղաքական մակարդակում դրանց հիմնական խնդիրը հետևյալն է. անհրաժեշտ է, որ հանրային, պետական յուրաքանչյուր ինստիտուտ սահմանադրական մակարդակում կատարի իր առաքելությունը: Դա նշանակում է, որ ընդդիմությունը պետք է իշխանությանը վերահսկելու արդյունավետ լծակներ ունենա, որ սահմանադրական փոփոխությունների հենքի վրա պետք է անցում կատարվի պառլամենտական հանրապետության, որ ԱԺ ընտրություններում պետք է բացառվի մեծամասնական ընտրակարգը և այլն:

Քվեարկության պատմություն

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
0 0
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները