Parliamnet Monitoring

  • Facebook
  • Twitter

News

Մենք ինքնուրույն ենք, դրա համար են երկու կողմից հարձակվում մեզ վրա

Մենք ինքնուրույն ենք, դրա համար են երկու կողմից հարձակվում մեզ վրա

Հարցազրույց ԱԺ ՀՅԴ խմբակցության ղեկավար Արմեն Ռուստամյանի հետ:

-Պարոն Ռուստամյան, ԲՀԿ-ՀԱԿ-«ժառանգություն»-ՕԵԿ քառյակի արտահերթ նստաշրջան հրավիրելու նախաձեռնությանը ՀՅԴ-ն չմիացավ, փոխարենը արտահերթ հրավիրեց ՀՀԿ-ի հետ միասին: Ստացվում է, որ խորհրդարանում ՀՅԴ-ն է ՀՀԿ-ի հետ համագործակցող ուժը:


-Ստացվում է, որ մենք գնում ենք արդյունք ստանալու և ոչ թե ինքնանպատակ գործունեություն իրականացնելու ճանապարհով: Իսկ քառյակի նախաձեռնությանը չենք միացել երկու պարզ պատճառով. առաջինը, որ մեզ հետ չէին քննարկել այդ տեքստը, իսկ մենք հայտարարել ենք, որ բոլոր այն տեքստերը, որոնք մեզ հետ չեն քննարկվում, մենք դրանց չենք միանում: Երկրորդը, ակնհայտ էր, որ այդ նիստը տեղի չէր ունենալու, որովհետև քվորում չէր լինելու: Այդպես էլ եղավ: Մենք իրականացրեցինք մեր նախաձեռնությունը: Մեր մշակած նախագիծը ներկայացրինք բոլոր քաղաքական ուժերին: Քառյակը մերժեց, ՀՀԿ-ն միացավ: Այսինքն, ի՞նչ պիտի անեինք. իրենք միանում էին մեր տեքստին, մենք մեր ստորագրությունները հանեի՞նք: Ով ուզում է միանար, մեզ պետք էր, որ նիստը կայանար և հայտարարություն ունենայինք, իսկ առանց մեծամասնության, պարզ չէ՞, որ հնարավոր չէր լինի ոչ նիստ գումարել, ոչ հայտարարություն ընդունել: Մենք ինքնանպատակ բան չենք անում:

-Արդյո՞ք ինքնանպատակ չէր նույն հայտարարության ընդունումը, երբ հայտնի դեպքերից հետո արդեն բավական ժամանակ է անցել, իսկ քաղաքական ուժերն էլ առանձին-առանձին հանդես էին եկել կատարվածը դատապարտող հայտարարություններով:

-ԱԺ-ի հայտարարությունը երբեք ինքնանպատակ չի կարող լինել: Ընդունված հայտարարությունը ուղղված է բոլորին: Եթե նպատակը ոչ թե քննարկումների ընթացքն է և ոչ թե արդյունքը, այ, սա ինքնանպատակ է: Իսկ մեր դեպքում և քննարկումներ եղան, և արդյունք արձանագրվեց:

-Բայց մի քիչ զավեշտալի վիճակ է. ՀԱԿ-ը, որի անդամն է Արամ Մանուկյանը, հայտարարությանը չի միանում, փոխարենը ՀՀԿ-ն ու ՀՅԴ-ն են դատապարտում նրա նկատմամբ կատարված բռնությունը:

-Այո, իրավիճակը սա է, բայց թող մտածեն նրանք, ովքեր ուզում էին այս ամենը պարզապես շոուի վերածել՝ առանց իրական արդյունք ունենալու: Հիմա եթե ՀՅԴ-ն ու ՀՀԿ-ն դա արեցին, վա՞տ է: Իսկ առանց ՀՀԿ-ի՝ նորաստեղծ քառյակը պատկերացնում էր, որ կարելի է ԱԺ-ում որևէ բա՞ն անել:

-Քառյակը պահանջում էր փոխոստիկանապետի հրաժարականը, այդ պահանջը ՀՅԴ-ի տարբերակում չկար: Չե՞ք կարծում, որ այն կուժգնացներ հայտարարության բովանդակությունն ու ազդեցությունը:

-Ուժգնացնող այլ ձևակերպումներ էլ կարող էին լինել, բայց եթե ամենաուժգինը չես ստանում ու ստանում ես այն, ինչը պակաս կարևոր չէ, ուրեմն, արդյունք չկա՞: Կամ պիտի մաքսիմալիզմով տառապենք, կամ ոչինչ չանե՞նք: Քառյակն իր այդ մարտավարությամբ ստացավ ոչինչ, իսկ մենք ստացանք մի հայտարարություն, որը դատապարտում է բռնությունները: Հիմա ո՞րն է լավ. ոչինչ չունենա՞լ, թե՞ այս ունենալ:

-Պարոն Ռուստամյան, խորհրդարանում փոխատեղում է տեղի ունեցել. ՀՅԴ-ն հայտնվել է ՀՀԿ-ի կողքին, իսկ ՕԵԿ-ը ոչ իշխանական երեք ուժերի նիստին է մասնակցում. չե՞ք մտահոգվում, որ սա կասկածի տակ է դնում ՀՅԴ-ի ընդդիմադիր լինելը:

-Փոխատեղում տեղի չի ունեցել: Մենք միշտ մեր տեղում ենք, այդ ուրիշներն են մեր կողքերում տեղափոխություններ կատարում՝ այս դաշտից այն դաշտ և հակառակը: Մենք մեր հստակ արձանագրված ծրագրով առաջ ենք ընթանում, և ով միանում է այդ ծրագրին, մենք այդ համագործակցությունից չենք հրաժարվում: Սա ողջամիտ քաղաքականության մասին է վկայում և ոչ թե տանում ինքնանպատակ առճակատման: Իրենց հայտարարություններով բոլորը արյունահեղությանը դեմ են, բայց ծրագիր չեն առաջարկում: Չեն ասում՝ ինչպե՞ս անել, որ արյունահեղություն չլինի, բայց երկրում բան փոխվի:

-Փաստորեն, ելքը ՀՀԿ-ի հետ համագործակցե՞լն է:

-Ելքը ցանկացած համագործակցությունն է, որը կբերի ինչ-որ դրական փոփոխության: Եթե այսօր մեծամասնությունը ՀՀԿ-ն է, առանց նրա ԱԺ-ն չի կարող որևէ նախաձեռնությամբ հանդես գալ: Մենք ուզում էինք, որ ԱԺ-ն իր դերակատարումը ունենա այսօրվա իրավիճակում, դիրքորոշում հայտնի: Եթե մենք կարողացանք դա կատարել, նշանակում է, որ կարողացանք ունենալով ընդամենը 5 պատգամավոր՝ Ազգային ժողովին մղել, որ հանդես գա հայտարարությամբ: Սա ոչ թե սեպարատ կամ դավադիր բանակցությունների, այլ հետևողական քաղաքականության արդյունք է: Մենք չենք դնում անբավարարելի պահանջներ: Անհապաղ իշխանափոխության պահանջը ամենաուժգին, բարձրագույն պահանջն է, բայց եթե դրան չեն հասնում, ի՞նչ օգուտ:

-Բայց եռյակն այդպիսի պահանջ, կարծեք թե, էլ չի դնում:

-Եթե չի դնում, ուրեմն, գալիս է այն դաշտը, որտեղ մենք վաղուց կանք: Ուրեմն, դա փոխատեղում չէ: Գալիս է ամբողջական իշխանափոխության մեր տարբերակին:

-Այս երկու օրերի զարգացումներից տպավորություն է, թե ՀՅԴ ձգտում է այլընտրանք դառնալ:

-Այո, այլընտրանք՝ բոլորին:

-Բայց այլընտրանքը ԲՀԿ-ն չէ՞:

-Այլընտրանքը հայտարարությամբ չի լինում, այլ գործողություններով: Մենք ինքնուրույն ենք, ու երբ դա դրսևորվում է, երկու կողմերից էլ հարձակվում են մեզ վրա:

Քվեարկության պատմություն

Ռուստամյան Արմեն Եզնակի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Ռուստամյան Արմեն «Հայ Յեղափոխական Դաշնակցություն» 342 66 236 42 278 10 24
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները