Parliamnet Monitoring

  • Facebook
  • Twitter

News

Պաշտպանը մտել է իշխանության տարածք

Պաշտպանը մտել է իշխանության տարածք

Հարցազրույց Ազգային ժողովի «Ժառանգություն» խմբակցության պատգամավոր Ռուբեն Հակոբյանի հետ:

-Դժվար է հիշել ուրիշ որևէ դեպք, որ խորհրդարանական մեծամասնությունը այնպես քննադատեր իր իսկ ընտրած պաշտոնյայի գործունեությունը, ինչպես եղավ Մարդու իրավունքների պաշտպանի պարագայում: Ձեր կարծիքով՝ ո՞րն էր մեծամասնության այս պահվածքի պատճառը:

-Ես այս օրերի քննարկումը առանձնահատուկ չէի համարի: Այն ընդհանուր առմամբ առողջ քննարկում էր, թեպետ սուբյեկտիվ էլեմենտներ կային: Դրանց չեմ ուզում անդրադառնալ: Ակնհայտ է մի բան. Պաշտպան Կարեն Անդրեասյանը իր պաշտոնավարման ընթացքում կարողացել է գործ անել, իհարկե, եթե նկատի ունենանք, որ այս համակարգում ընդհանրապես կարելի է ինչ-որ բան անել: Ուղղակի նրա զեկույցի քննարկումը առիթ էր՝ խոսելու ամեն ինչի մասին: ես իմ ելույթում էլ ասացի՝ նախ պետք է հիշել, թե ինչ ասել է պաշտպան: Նրա գործառույթն է արձանագրել մարդու իրավունքների հետ կապված խախտումներն ու ներկայացնել դրանք համապատասխան մարմիններին՝ գործադիր, օրենսդիր, իրավապահ: Այդ մարմինները պետք է կարողանան ընթացք տալ, շարունակել պաշտպանի արձանագրումները, այլ հարց է, որ դա չի լինում:

-Ո՞րն է պատճառը, գուցե օրենսդրական բացե՞ր կան:

-Չեմ կարծում: Կարեն Անդրեասյանն ինքն ասաց, որ «Մարդու իրավունքների պաշտպանի մասին» օրենքը եղած լավագույն օրենքներից մեկն է: Խնդիրն այլ տեղ պետք է փնտրել. պետաիրավական համակարգը կայացած չէ:

-Խոսեցիք քննարկումների ընթացքում սուբյեկտիվիզմի մասին. Ձեր կարծիքով՝ ինչո՞վ էր դա պայմանավորված՝ քաղաքական թե անձնական նկատառումներով:

-Չեմ ուզում խորանալ, թեպետ ասեմ՝ դա մտնում է քաղաքական խաղի կանոնների մեջ: Ակնկալել, թե կարող է լինել բացառապես առողջ որևէ քննարկում, իրատեսական չէ. մարդկային գործոնն անտեսել հնարավոր չէր ընդհանրապես:

-Պաշտպանը հայտարարեց, թե ՀՀԿ-ականներից մեկի ելույթը պատվերով էր: Ձեր կարծիքով հաճա՞խ են ԱԺ-ում պատվերով ելույթներ հնչում:

-Պատահում է: Դուք այդ ո՞ր մոլորակից եք իջել: Լինում են ելույթներ, որոնք հստակ ինչ-որ մարդկանց, ինչ-որ ցանկությունների արտահայտությունն են, պետք չի զարմանալ:

-Մի քանի պատգամավոր, նաև ընդդիմությունից, խոսեցին Պաշտպանի հրաժարականի մասին: Կարծում եք՝ ինչ-որ տեղ նման հա՞րց է հասունանում:

-Ես այդպիսի տպավորություն չստացա: Ավելին, հենց ընդդիմության ներկայացուցիչներին պետք էր հարցնել՝ իսկ ձեր բարձրացրած ո՞ր հարցն է խորհրդարանում ավարտին հասցվել, ինչո՞ւ դուք հրաժարական չեք տալիս: Իսկ մեծամասնության քննադատական ելույթներից ես հասկացա, որ Պաշտպանը նաև մեծամասնության նկատմամբ է օբյեկտիվ եղել: Սա նշանակում է, որ նա մտել է, այսպես կոչված, իշխանության տարածք, ու ես կարծում եմ, որ պետք է այդպես էլ շարունակի:

-Բայց այս դեպքում ստացվում է, պաշտպանը մնում է առանց քաղաքական թիմի, հենարանի, ինչպես որ ինքը հայտարարեց:

-Պաշտպանը քաղաքական թիմ չպետք է ունենա ու պետք է նաև քաղաքականության հետ կապ չունենա:

-Բայց նա ընտրվել է քաղաքական մեծամասնության կողմից, կամ՝ հնարավո՞ր է մեր իրականության մեջ առանց քաղաքական հենարանի նման պաշտոնում ընտրվել, պաշտոնավարել:

-Զուտ օրենքի տեսանկյունից՝ այո, պրակտիկ առումով՝ չի լինում այդպես: Իսկ այն, որ պաշտպանին ընտրել է մեծամասնությունը, իսկ նա քննադատում է իշխանությանը, պետք է միայն ողջունել: Երիտասարդ է, որը իրականացնում է իր լիազորությունները՝ առանց copy paste անելու ավագների պահվածքը:

Քվեարկության պատմություն

Հակոբյան Ռուբիկ Կարապետի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Հակոբյան Ռուբիկ «Ժառանգություն» 388 172 149 113 141 21 54
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները