Parliamnet Monitoring

  • Facebook
  • Twitter

News

Կասեմ՝ եկեք համակարգը փոխենք, որ դու էլ լավ մեքենայով գաս, որ դու էլ ատամներ ունենաս

Կասեմ՝ եկեք համակարգը փոխենք, որ դու էլ լավ մեքենայով գաս, որ դու էլ ատամներ ունենաս

Հարցազրույց Հանրապետական խմբակցության պատգամավոր Մանվել Բադեյանի հետ:

- Պարոն Բադեյան, դուք Գեղարքունիկի մարզից մեծամասնական ընտրակարգով ընտրված պատգամավոր եք: Ձեր մարզում, ձեր ընտրատարածքում ինչպե՞ս եք պատրաստվում մասնակցել սահմանադրական փոփոխությունների քարոզարշավին:

- Ակտիվորեն: Մարդկանց հետ հանդիպումներ, բացատրական աշխատանք, քարոզչություն: Սահմանադրական փոփոխությունները ներկայացնելու եմ որպես քայլ առաջ դեպի ժողովրդավարական ինստիտուտների զարգացում, դեպի ժողովրդավարության սահմանում, դեպի ավելի էֆեկտիվ կառավարում, դեպի ավելի արդար ու թափանցիկ հասարակություն:

- Ո՞ր դրույթներն են նման հնարավորություն տալիս:

- Բոլորը: Առհասարակ խորհրդարանական կառավարումը ենթադրում է ավելի մեծ թափանցիկություն, ավելի շատ հակակշիռներ և կառավարմանը ավելի լայն զանգվածների մասնակցություն, քան  նախագահականը, որի փորձը մենք ունենք անցած 25 տարիների ընթացքում, և որն ապացուցեց, որ մեր հասարակության համար կառավարման այնքան էլ արդյունավետ ձև չէ:

- Բայց կարծիք կա, թե խորհրդարանական կառավարման համակարգն այնքան էլ հարազատ չէ մեր մենթալիտետին, մտավախություն կա, որ այն մեր երկրում այնպես արդյունավետ չի աշխատի, ինչպես  եվրոպական  երկրներում: 

- Ոչ, իրականում մենք ազատատենչ ժողովուրդ ենք, և մեր մենթալիտետը բացարձակապես չի համապատասխանում ձեր պատկերացրածին: Ձեր ասածը խանական երկրներն են: Իրականում հայ մենթալիտետը ենթադրում է ազատություն, բազմակարծություն, որովհետև հայն իր էությամբ ինդիվիդուալիստ ժողովուրդ է: Եվ կառավարման այս համակարգը կհամապատասխանի մեր մենթալությանը:

- Նաև կարծիք կա, թե Հայաստանը կիսապատերազմական վիճակում  է, և  այս պայմաններում մեզ ոչ թե խորհրդարանական  համակարգ, այլ  ուժեղ նախագահ է պետք:

- Ոչ, դա հարատև վեճ է բոլոր ժողովուրդների և բոլոր ժամանակների համար: Ամուր ձեռքի պահանջը բոլոր ժամանակների և բոլոր շերտերի մեջ էլ ծագում է: Դա ամենակարճ ճանապարհն է, որ կգա մի հերոս փրկիչ և իր երկաթյա բռունցքով ամեն ինչ կկարգավորի: Այդպես չի լինում, իսկ եթե անգամ լինում է, ապա շատ կարճատեև է լինում և շատ մեծ անելիքներ է թողնում հետագա սերունդների համար: Մենք անցել ենք այդ ստալինյան ժամանակները, երբ, իսկապես, ինչ-որ հարցեր արդյունավետ լուծվեցին: Մասնավորապես այն իր արդյունավետությունը ցույց տվեց պատերազմական վիճակում, բայց երկիրը շատ հետ ընկավ: 

- Կառավարման համակա՞րգն է պատճառը, որ Հայաստանը չի զարգանում:

- Այո, այս տարիներն էլ մեզ բավականին լճացման վիճակի մեջ դրեցին: Դրա մասին նախագահ Սարգսյանը դեռևս 2008-ին ասեց: Եվ այսօր համակարգային փոփոխության անհրաժեշտություն կա, ինչին էլ ուղղված են Սահմանադրության փոփոխությունը:

- Կարծում եք, ձեր մարզի բնակիչներին հետաքրքրո՞ւմ են սահմանադրական փոփոխությունները, և Դուք կարող եք դրանք այնպես մատուցել, որ նրանք գնան ու ԱՅՈ քվեարկեն:

- Կարծում եմ, որ այդ փոփոխություններն ամբողջ հայ ժողովրդի համար են շատ կարևոր: Ընդ որում՝ ոչ միայն մեր մարզի կամ Հայաստանի հանրապետության բնակչության համար, այլ ողջ հայության համար, որ մենք ունենանք ավելի արդյունավետ երկիր, ապրելու, աշխատելու և զարգացնելու համար ավելի գրավիչ երկիր: Եվ իհարկե, մարզի բնակչությանն էլ է դա հետաքրքիր:

- Բայց սոցիալական այս ծանր վիճակի, արտագաղթի պայմաններում նրանց ինչի՞ն է պետք այս փոփոխությունները:

- Ախր այդ արտագաղթի պատճառը հենց այն է, որ մենք համակարգային սխալ ունենք: Մենք փորձում ենք հատվածային խնդիրներ լուծել, բայց համակարգային սխալները հենց կառավարման սկզբունքի մեջ են, որ գոյություն ունեն արդեն 25 տարի: Մենք դա ենք ուզում փոխել, կառավարման ամբողջ համակարգն ենք ուզում փոխել:

- Ու նոր Սահմանադրությունը կլուծի՞ Հայաստանի սոցիալ-տնտեսական խնդիրները:

- Սահմանադրությունը դրա համար նախադրյալներ կստեղծի:

- Կնպաստի՞ կոռուպցիայի, մենաշնորհների վերացմանը: Տնտեսությունը կդառնա՞ ավելի մրցունակ:

- Այո: Երբ մենք ավելի բաց, ավելի թափանցիկ կառավարման համակարգ ունենանք, ավելի շատ հակակշիռներ ու զսպումներ ունենանք, կունենանք նաև ավելի արդյունավետ տնտեսություն: Սահմանադրության փոփոխություններով նախատեսված համակարգային փոփոխությունները կլուծեն այդ խնդիրը: Եվ ոչ թե հատվածային փոփոխությունները, որ մենք Ազգային ժողովում անընդհատ փորձում ենք օրենսդրական փոփոխություններով կարգավորել և որոնց զգալի մասը չի աշխատում:  Պատճառն այն է, որ դրանք  գալիս, դեմ են առնում մեր ձևավորած համակարգին:

- Իսկ ինչպե՞ս եք վերաբերվում այն կարծիքին, թե  փոփոխությունները նախաձեռնվել են ՀՀԿ-ի իշխանությունը հավերժացնելու կամ   «գենսեկի» իշխանություն ձևավորելու համար:

- Դա որոշ մարդկանց կարծիքն է, որը տարածվում է, բայց  ձևավորվել է ոչ թե իրական փաստերի, այլ իրենց նկրտումների վրա: Մարդիկ, ովքեր քննադատում էին կիսանախագահական համակարգը, և ովքեր ժամանակին կոչ էին անում անցնել խորհրդարանական կառավարման համակարգին,  հիմա դեմ են: Այսինքն՝ իշխանության ցանկացած քայլին նրանք դեմ են լինելու: Միայն  մի դեպքում դեմ չեն լինի՝ երբ իշխանություններն ասեն, դուք եկեք իշխանության: 

- Իսկ եթե  հանդիպումների ժամանակ մարդիկ Ձեզ ասեն, թե՝ Դուք այսպես ապահովված, շքեղ մեքենաներով, իսկ մենք անապահով, մեզանից ոմանք անգամ ատամներ չունեն, հիմա եկել եք, որ ի՞նչ անեք, ի՞նչ եք պատասխանելու:

- Կասեմ՝ եկեք համակարգը փոխենք, որ դու էլ լավ մեքենայով գաս, որ դու էլ ատամներ ունենաս:


Քվեարկության պատմություն

Բադեյան Մանվել Հենրիկի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Բադեյան Մանվել «Հայաստանի հանրապետական կուսակցություն» 526 4 0 123 93 5 3
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները