Parliamnet Monitoring

  • Facebook
  • Twitter

News

Ես աշխատել եմ ձեր ասած «գենսեկի» ժամանակներում և լավ գիտեմ, թե այնտեղ ոնց էր

Ես աշխատել եմ ձեր ասած «գենսեկի» ժամանակներում և լավ գիտեմ, թե այնտեղ ոնց էր

Հարցազրույց Հանրապետական խմբակցության անդամ Հակոբ Հակոբյանի հետ:

- Պարոն Հակոբյան, սահմանադրական փոփոխությունների հանրաքվեի քարոզարշավի ընթացքում այցելե՞լ եք Տավուշի մարզի թիվ 41 ընտրատարածք, որտեղից պատգամավոր եք ընտրվել: Գիտե՞ք այդ փոփոխությունների նկատմամբ տավուշցիների վերաբերմունքը:

- Դեռ չեմ հանդիպել: ԱԺ այս նիստերից հետո պետք է հանդիպեմ ժողովրդի հետ, որպես նրանց կողմից ընտրված պատգամավոր` փորձեմ բացատրական աշխատանք տանել, ներկայացնել նոր սահմանադրական փոփոխությունների նախագծի դրական և գործող Սահմանադրության բացասական կողմերը:

-Որպես դրական կողմ ի՞նչ եք ներկայացնելու:

- Դրական եմ համարում այն, որ իշխանությունը միանձնյա չի լինելու: Այսօր ՀՀ նախագահը միանձնյա ղեկավարում է և պատասխանատու է ամեն ինչի համար: Նոր Սահմանադրությամբ երկիրը կառավարելու է վարչապետը, բայց հաշվետու է լինելու Ազգային ժողովին: Սա հիմնական փոփոխությունն է: Բնականաբար, սրա բացակայություն էլ համարում եմ գործող Սահմանադրության հիմնական բացասական կողմը: Ես չեմ կարող ասել, որ նոր Սահմանադրության ընդունումից հետո ամեն ինչ լավ է լինելու: Ընդունվելուց հետո մի քանի տարիների ընթացքում պարզ կդառնա՝ լավ է թե վատ: Բացի այդ՝ լավ օրենքը եթե չի կիրառվում, դառնում է ամենավատը: Կարևոր է, թե ով է կիրառելու: Անձերից շատ բան է կախված:

- Կիրառելու են նույն մարդիկ, ովքեր այսօր չեն կիրառում գործող Սահմանադրությունը:

- Ես այդպես չէի ասի: Այսօր ՀՀ նախագահը Սերժ Սարգսյանն է, ով հայտարարել է, որ չի լինելու ոչ վարչապետ, ոչ նախագահ,  և ոչ էլ ԱԺ նախագահ: Ես անձամբ լսել եմ նրա այս հայտարարությունը ՀՀԿ խորհրդի նիստի ժամանակ: Վստահ եմ, որ  իր խոսքը կկատարի: Այսինքն, անձը փոխվեց:

- Այսինքն այդ ա՞նձն է խանգարում, որ Սահմանադրությունն ու օրենքները չեն կիրառվում:

- Ոչ, ոչ: Ես միայն ասում եմ, որ Ս.Սարգսյանը չի ցանկանում ստանձնել այս երեք պաշտոններից որևիցե մեկը: Հիմա թե ով կդառնա ԱԺ նախագահ, ով կընտրվի ՀՀ նախագահ, չեմ կարող ասել: Բնականաբար, լուսնից ոչ մեկը չի գալու, լինելու են մեր երկրից: Կարևոր է, որ ով էլ լինի, ծառայի մեր երկրին:

- Դուք նշում եք, որ նախագծում կառավարման համակարգի փոփոխությունն է դրականը, բայց մտահոգություն կա, որ այդպիսով գոծող իշխանությունները ցանկանում են խնդիրների լուծման կամ առկա խնդիրների պատասխանատվությունը բաժանել: Իսկ այդ փոփոխություններին ընդդիմացողներն էլ ասում են, որ կոլեկտիվ պատասխանատվությունը նշանակում է խուսափել պատասխանատվությունից:

- Ազգային ժողովն է ընտրում վարչապետ, իսկ երկիրը ղեկավարում է վարչապետը: Հիմա երկիրը ղեկավարող նախագահը ընտրվում է հինգ տարով: Լավ կաշխատի, թե վատ՝ այդ հինգ տարին նա մնում է իր պաշտոնին: Այս դեպքում կլինի խորհրդարան, որը հաշվետվություն կպահանջի իր ընտրած վարչապետից: Իհարկե, շատ կուզեմ, որ լինի ուժեղ խորհրդարան, որը ցանկացած պահին կկարողանա վարչապետից հաշվետվություն պահանջել, իսկ վարչապետն էլ կիմանա, որ կա ԱԺ, որը ցանկացած պահի կարող է իրենից հաշվետվություն պահանջել: Լավը սա է, իսկ թե ընթացքում ինչպես կկիրառվի, չեմ կարող ասել:

- Երբ գնաք Տավուշի մարզ ու այդ դրույթները ներկայացնեք, կարծում եք դրանք կհետաքրքր՞են Ձեր ընտրողներին:

- Ես ընտրողների հոգեբանությունը շատ լավ գիտեմ, քանի որ անընդհատ շփվում եմ նրանց հետ: Սահմանադրության փոփոխությունն ու ընտրությունը տարբեր հարցեր են: Սոցիալական հարցերը բարձրացվում են, դրանց լուծումները տրվում է հնարավորության սահմաններում, անկախ այն հանգամանքից՝ այս նախագիծը կնդունվի, թե ոչ: Ես այս ընթացքում հաշվետու եմ եղել նրանց առաջ: Ես համոզված եմ, որ այդ հարցը կկարողանամ իմ ընտրողների հետ տարանջատել:

- Ընտրողներն էլ այնքան միամիտ չեն և կարող են ընդդիմության նման հակադարձել, թե այդ փոփոխությունները նախաձեռնել է Սերժ Սարգսյանը, որ ստեղծի «գենսեկի» իշխանություն, մնա ՀՀԿ-ի նախագահը, ապահովի իր կուսակցության մեծամասնությունը, նշանակի վարչապետ, ԱԺ նախագահ ու նախագահ և այդպես շարունակի ղեկավարել երկիրը:

- Խորհրդային տարիներին ես աշխատել եմ ձեր ասած «գենսեկի» ժամանակներում և շատ լավ գիտեմ, թե այնտեղ ոնց էր: Հիմա բազմակուսակցական համակարգ է: Այն ժամանակ միայն Կոմունիստական կուսակցությունն էր, և լավ, թե վատ՝ գենսեկն էր:

- Բայց նախագիծը ԱԺ ընտրությունների երկրորդ փուլի դրույթ սահմանելով՝ ապահովում է մի կուսակցության մեծամասնությունը: Սա արդեն մյուս կուսակցությունների հնարավորություններն էականորեն սահմանափակում է:

- Այսքան տարի ընտրություն է եղել, ո՞ր մի անգամ է, որևէ կուսակցություն 50+1% ձայն հավաքել: Ոչ մեկը: Եվ այս դեպքում մեծ է հավանականությունը, որ կձևավորվի կոալիցիոն կառավարություն: Բայց դա կախված է մեր ընտրողներից: Այսօր էլ Հանրապետական խմբակցությունում կան հինգ-վեց կուսակցության ներկայացուցիչներ: Սա էլ չերևացող կոալիցիա է:

- Իսկ ինչպիսի՞ն է Ձեր ընտրողների տրամադրվածությունն այս փոփոխությունների նկատմամբ:

- Իմ տպավորությամբ մարդիկ կան, ովքեր ամբողջությամբ անտարբեր են՝ իմ հաշվարկներով մոտ 20 տոկոսը: Մարդիկ կան, որ լավ էլ ծանոթացել են նախագծին: Կան նաև ընդդիմացողներ, բայց իմ տպավորությամբ մեծամասնությունը կողմ է այս փոփոխություններին:

- Կարծում եք, ՀՀԿ-ի համար դժվար չի՞ լինի անցկացնել այդ նախագիծը:

- Ես համաձայն չեմ ձևակերպմանը, թե իշխանությունները կանցկացնեն նախագիծը: Երբ այդ փոփոխությունների վերաբերյալ առաջին խորհրդի նիստը եղավ, և ՀՀ նախագահը ներկայացրեց նախագիծը, ես հասկացա, որ նա չի ասում, թե այն անպայման պետք է անցնի: Նա նաև հայտարարեց, թե ոչ մեկը թող չմտածի, որ ես ինձ համար եմ անում այս փոփոխությունները: Ասաց, որ ինքը չի հավակնում այդ պաշտոններին:

- Այդ դեպքում 2012թ. աշնանը ընդդիմադիր կուսակցություններն էին առաջարկում ընդունել խորհրդարանական կառավարման համակարգը, ինչո՞ւ էիք ընդդիմանում:

- Այն ժամանակ նրանք առաջարկում էին Սահմանադրության մեջ որոշ կետեր փոփոխել, այդ թվում՝ նաև կառավարման համակարգն ու ընտարակարգը: Նոր նախագծում այդ հարցերն ընդունվել են: Այն ժամանակ մենք ասում էինք, թե դրա ժամանակը չէ, ու ճիշտ էինք ասում, քանի որ խորհրդարանական ընտրությունները նոր էին ավարտվել, և մինչև նոր ընտրությունները հինգ տարի էլ կար: Ինչո՞ւ պետք է Սահմանադրություն փոխեինք, եթե այն պետք է ուժի մեջ մտներ հաջորդ ընտրություններից հետո: Հիմա մոտեցել են ԱԺ հաջորդ ընտրությունները, մեկուկես տարի է մնացել: Մինչև ընդունվի, մինչև Ընտրական օրենսգիրքը փոխվի, կգա խորհրդարանական ընտրությունների ժամանակը:

- Որպես մեծամասնական ընտրակարգով ընտրված պատգամավոր՝ ԱԺ-ում կողմ եք քվեարկել նախագծին և պատրաստվում եք քարոզել նաև այդ ընտրակարգի վերացման օգտին, որ հաջորդ անգամ չկարողանա՞ք առաջադրվել:

- Ես կարծում, եմ որ եթե մեծամասնական համակարգը չի գործելու, միևնույնն է, այդ 41 ընտրատարածքները լինելու են: Հավանաբար պետք է մեկը կցված լինի այդ տարածքներին, որ ընտրողն իմանա, թե իր հարցերն ում միջոցով է Երևանում բարձրացնելու: Իսկ եթե դա չլինի, կարծում եմ ճիշտ չի լինի: Նախագծի ընդունումից հետո կփորձենք այս հարցն ինչ-որ կերպ կարգավորել, որ ընտրողների հետ կապը չկտրվի: Թե չէ Չինար գյուղում ապրողն իր հարցը ո՞ւմ միջոցով պիտի բարձրացնի: Համայնքի պետերը չեն կարող: Իհարկե, կան նաև մարզպետեր, բայց պատգամավորի հետ շփումն ավելի հեշտ է:

Քվեարկության պատմություն

Հակոբյան Հակոբ Գառնիկի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Հակոբյան Հակոբ «Հայաստանի հանրապետական կուսակցություն» 873 5 6 29 50 7 6
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները