Parliamnet Monitoring

  • Facebook
  • Twitter

News

Արմեն Կարապետյան. Գյուղերում մտածելու են, թե իրենց զրկել են պատգամավոր ընտրելու իրավունքից

Արմեն Կարապետյան. Գյուղերում մտածելու են, թե իրենց զրկել են պատգամավոր ընտրելու իրավունքից

Parliamentmonitoring.am-ը սկսում է հարցազրույցների շարք՝ մեծամասնական ընտրակարգով ընտրված պատգամավորների հետ: 5-րդ գումարման Ազգային ժողովի գործունեության ավարտին ընդառաջ՝ փորձում ենք ամփոփել խորհրդարանի համարյա 1/4-ը կազմող մեծամասնական հատվածի գործունեության պատկերը. ի՞նչ են խոստացել ընտրողներին, ի՞նչ են կարողացաել անել, ի՞նչ չեն արել և ինչո՞ւ: Մեծամասնական պատգամավորները գնահատում են ընտրակարգի փոփոխությունը և ամփոփում իրենց գործունեությունը:

Շարքի առաջին զրուցակիցը թիվ 38 ընտրատարածքի պատգամավոր Արմեն Կարապետյանն է: Նա պատգամավոր է ընտրվել 2013 թվականի սեպտեմբերին՝ նույն ընտրատարածքից ընտրված Վահե Հակոբյանի՝ գործադիրում աշխատանքի անցնելուց հետո:

-Նշեք Ձեր նախընտրական ծրագրի մի քանի առաջնահերթություն:

-Գիտեք, որ հանրապետությունում հանքաարդյունաբերական, լեռնաարդյունաբերական աշխատանքները իրականացվում են Սյունիքի մարզում, և այս հարցը մեր ուշադրության կենտրոնում է: Պետք էր մշակել այնպիսի ծրագրեր, որ բնության շահագործման պատճառով բնապահպանական խնդիրներ առաջ չգան: Մենք գրել ենք, որ հետևողական ենք լինելու այս հարցում:

-Ինչպե՞ս եք հետևողական լինում:

-Ունենք բնապահպանական տարբեր օրենքներ` հանքերի շահագործման, լիցենզիաներ տալու մասին, գրել ենք, որ մնացած մյուս շահագործումները պետք է կատարվեն ըստ օրենքի:

-Այսինքն, Դուք այդ օրենքներում փոփոխություննե՞ր եք առաջարկել:

-Բոլոր օրենքները կան, խնդիրներն էլ բնապահպանության, էներգետիկայի նախարարությունների ուշադրության կենտրոնում են:

-Քանի՞ տոկոսով է հաջողվել իրականացնել Ձեր նախընտրական ծրագիրը:

-Ես այդ տոկոսը չեմ հաշվել: Շատ ժամանակ հասարակությունը չի պատկերացնում պատգամավորի աշխատանքի բնույթը: Մեծ մասը, որ սոցիալական դժվարին պայմաններում է, կարծում է, թե պատգամավորի պարտականությունը սոցիալական խնդիրների լուծումը կամ ուսման վճարը տալն է: Պատգամավորը ոչ թե ֆինանսական, այլ օրենսդրական հարցեր պետք է լուծի, նրա գործը չպիտի նման լինի գործադիրի աշխատանքին:

-Բայց Դուք օրենսդրական գործունեությամբ աչքի չեք ընկնում. ոչ մի օրենքի նախագծի հեղինակ չեք:

-Մարդ կարող է 10 տարի լինել պատգամավոր, օրենք չգրել, բայց պասիվ չլինել: Եվ հետո՝ օրենքները ավելի շատ գրվում են համահեղինակությամբ:

-Բայց համահեղինակ էլ չեք:

-Ես ընդամենը 3 տարվա պատգամավոր եմ: Իմ գործընկերոջ՝ Վահրամ Մկրտչյանի հետ տարբեր նախագծեր ենք գրել, բայց դեռ չեն քննարկվել, նախագծերը շատ են, սպասում ենք, որ հերթը գա:

-Բայց Դուք ելույթներ էլ չեք ունենում, հարցեր չեք տալիս:

-Ամեն մարդ պետք է զբաղվի իր գործով: Ես ինձ վերաբերող խնդիրներով եմ զբաղվում: Այնպես չէ, որ ով ելույթ է ունենում, խնդիր է լուծում: Դրանք հիմնականում ցուցադրական ելույթներ են: Խնդիրը կարելի է լուծել ոլորտի նախարարի հետ խոսելով, նրան մանրամասն նամակ գրելով: Ես գրում եմ, ու փառք Աստծո՝ պատասխանում են: Այս ֆորմատով աշխատանքը ավելի ճիշտ է ստացվում:

-Այսինքն, Դուք ստվերային ճանապարհո՞վ եք հարցերը լուծում:

-Ինչո՞ ւ ստվերային: Հարցերը բարձրացնում եմ, լուծվում են:

-Օրինակ, Ձեր բարձրացրած ո՞ր հարցն է լուծվել:

-2016թ. բյուջեի նախագծում ես մարզին վերաբերող 8 առաջարկություն եմ ներկայացրել:

-Ընդունվե՞լ են:

-Բոլորն ինչպե՞ս կընդունվեին. 1 միլիարդից ավելի գումար էր պահանջվում: Ընդունվել է միայն 1-ը՝ Կապանի փակ մարզադպրոցի հատակը փոխելու վերաբերյալ՝ 46 միլիոն արժե: Մյուսներն էլ, ժամանակի ընթացքում եթե գումար գտնվի, կընդունվեն: Տարբեր տարիներին համատեղ ներկայացված բազմաթիվ խնդիրներ կան. մարզպետարանն էլ է ներկայացնում, համայնքապետարանն էլ է ներկայացնում: Օրինակ, տանիքների խնդիրը: Մեր տարածաշրջանում տանիքներ, վերելակներ են վերանորոգվել, Մեղրիում բժշկական կենտրոն է կառուցվում:

-Դո՞ւք եք առաջարկել, որ կառուցեն:

-Ոչ, դա շուտ են սկսել: Բայց պետք չէ բաժանել մերը և ձերը: Եթե տվյալ ընտրատարածքում կառավարության կողմից խնդիր է լուծվում, դա հենց կարելի է համարել մերը:

-Այսինքն, նկատի ունեք պատգամավոր Արմեն Կարապետյանի՞նը:

-Չէ: Ես անգամ սխալ եմ համարում, որ բյուջեի փաթեթում գրում են՝ ներկայացրել է Արմեն Կարապետյանը կամ որևէ պատգամավոր: Եթե մարզում աշխատանք է կատարվում, այն բոլորինս է: Ինչո՞ւ առանձնացնենք: Դա ոչ իմ աշխատավարձից է, ոչ վարչապետի, ոչ նախարարի: Ինձ համար նշանակություն չունի, թե ով է հարցը բարձրացրել, կարևորը լուծվել է:

-
Մի հատ էլ չլուծված խնդիր ասեք

-Ախր, մի հատ չի, շատ են: Մենք ունենք սողանքային գոտիներ, հատկապես Կապանում: Դրանց վրա աշխատանքը շատ թանկ կարժենա՝ 500-600 միլիոնից է սկսում, կամ սելավատարների հարցը: Սրանք մեծ գումարների հետ են կապված: Ուզում եմ ասել, որ չի լինի մարդ, որ ասի՝ այ, այսքան մեծ գործեր եմ արել ու դրա համար նորից պիտի գամ խորհրդարան. բյուջեի գումարները սահմանափակ են:

-Ո՞րն է ընտրողներին տված ամենակարևոր խոստումը, որ անցնող ժամանակահատվածում իրականացրել եք:

-Ես շատ վաղուց եմ քաղաքականության մեջ, ու չի եղել այդպիսի բան, որ խոստում տամ: Գուցե միայն նախնական շրջանում, իսկ վերջերս զուսպ եմ ու ոչ մի նախընտրական խոստում չեմ տվել:

-Կամ գուցե խոստացել եք ինչ-որ խնդիր լուծել:

-Ես կոնկրետ խնդիր չեմ առանձնացնի: Բոլորն էլ կարևոր են: Դժվար ժամանակներ են: Միջազգային տնտեսական իրավիճակ, նավթի գներ. սրանք բոլորն ազդում են երկրի վրա, ու միշտ չէ, որ կարողանում ենք բարձրացված խնդիրները լուծել: Բոլոր պատգամավորները այսօր ապրում են այդ դժվարությունները:

-Ձեր գործունեությունը 5 բալանի սանդղակով կգնահատե՞ք:

-Ես չեմ ցանկանա ինձ գնահատել: Ընտրողը պետք է գնահատի:

-Ընտրողի գնահատականը կարող էր արտահայտվել, եթե նա դարձյալ մեծամասնականով ընտրելու հնարավորություն ունենար: Փոփոխված Սահմանադրությամբ, փաստորեն, այդ հնարավորությունը չի ունենալու: Դուք ինչպե՞ս եք գնահատում մեծամասնական ընտրակարգից հրաժարվելը:

-Պետք է ասեմ, որ մեծամասնական ընտրակարգը մեծ նշանակություն ունի այն առումով, որ ապահովում է կապը մարզերի հետ: Չեմ ասում, թե ընտրակարգի չլինելուց հետո կապը կվերանա, որովհետև սա այնքան կարևոր կապ է, որ որևէ եղանակով պետք է պահպանվի: Քաղաքական ուժերը համամասնական ցուցակները պետք է կազմեն՝ մարզերից չկտրվելով: Այդ ցուցակների անցողիկ տեղերում պետք է ընդգրկված լինեն մարզերի պատգամավորները: Եթե ընդունվի ցուցակները վարկանիշային կարգով կազմելու եղանակը, ճիշտ կլինի: Թե չէ համամասնական ցուցակով խցկվում են Ազգային ժողով՝ անկախ այն բանից՝ ունեն վարկանիշ թե չունեն:

-Կուզե՞ք շարունակել Ձեր պատգամավորական գործունեությունը:

-Դեռ չեմ որոշել, բայց քաղաքականությունից դուրս չեմ գա, որովհետեւ անելքի կա:

-Օրինակ, ի՞նչ անելիք:

-Տարիների ընթացքում խնդիրներ են առաջնում, որոնց վրա աշխատում ես, մասնակցում ես դրանց կարգավորմանը: Հատկապես համայնքների խնդիրներին ես լավ ծանոթ եմ, ունեմ կուտակած փորձ, որը կարող եմ օգտագործել:

-Որևէ քաղաքական ուժի, Ձեր դեպքում ՀՀԿ-ի համամասնական ցուցակով խորհրդարան գալը չի՞ սահմանափակի Ձեր գործունեության հնարավորությունները:

-Սահմանափակում, իհարկե, կլինի: Մեծամասնականները ավելի վստահ են, որովհետև իրենք գիտեն՝ ում կողմից են ընտրված: Ես գիտեմ, որ ինձ ընտրել են կապանցիները:

-Բայց եթե կուսակցություն չաջակցեր, կընտրվեի՞ք:

-Կուսակցությունը, իհարկե, ինձ աջակցել է, բայց գիտի, թե ինչի համար է աջակցել: ՀՀԿ-ն ամեն մարդու չի աջակցում: Մի 20 տարի պետք է, որպեսզի համամասնականը կայանա, մինչդեռ կան գյուղեր, որ կուսակցություններից, նրանց ծրագրերից, ուղղվածությունից գաղափար անգամ չունեն, մարդուն են ճանաչում: Այդ գյուղերում մտածելու են, թե իրենց զրկել են պատգամավոր ընտրելու իրավունքից:

Քվեարկության պատմություն

Կարապետյան Արմեն Սերյոժայի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Կարապետյան Արմեն «Հայաստանի հանրապետական կուսակցություն» 668 6 1 36 36 8 2
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները