Parliamnet Monitoring

  • Facebook
  • Twitter

News

Աղվան Վարդանյան. «Որտեղ շատ աշխատանք կա, Դաշնակցությունն այնտեղ իրեն լավ է զգում»

Աղվան Վարդանյան. «Որտեղ շատ աշխատանք կա, Դաշնակցությունն այնտեղ  իրեն լավ է զգում»

Parliamentmonitoring.am-ը ԱԺ խմբակցությունների հետ ամփոփում է 9-րդ նստաշրջանի արդյունքները: Մեր զրուցակիցը «Դաշնակցություն» խմբակցության քարտուղար Աղվան Վարդանյանն է:

- Պարոն Վարդանյան, Դաշնակցության համար ինչո՞վ նշանավորվեց գարնանային նստաշրջանը: Հիմնական փոփոխությունը Հանրապետական կուսակցության հետ համագործակցության հուշագիր ստորագրելն ու իշխանության մաս կազմե՞լն էր:

- Հերթական նստաշրջան էր` ընթացիկ օրակարգերով: Այո, հիմնական փոփոխությունը պայմանավորված է հանգամանքով, որ մենք այլևս քաղաքական համագործակցության համաձայնագիր ունենք Հանրապետական կուսակցության հետ, փորձում ենք մեր մոտեցումները համադրել, գտնել ընդհանուր եզրեր: Այլ առաջնահերթություններ ունեինք, բայց, ցավոք, ապրիլյան պատերազմը խանգարեց: Արդեն տեղի է ունեցել համակարգող խորհրդի առաջին նիստը, որին ՀՀԿ-ից մասնակցում էին հանրապետության նախագահը, վարչապետը, ԱԺ խորհրդարանական խմբակցության ղեկավար Վահրամ Բաղդասարյանը և կուսակցության փոխնախագահ Արմեն Աշոտյանը: ՀՅԴ-ից մասնակցում էինք Արմեն Ռուստամյանը, Սպարտակ Սեյրանյանը, Արսեն Համբարձումյանը և ես: Առաջին հանդիպման ժամանակ քննարկեցինք աշխատակարգային խնդիրներ, առաջարկեցինք, որ նախագահն այս ֆորմատում ոչ թե ներկայացնի ՀՀԿ-ն, այլ լինի արբիտրի դերում: Պայմանավորվեցինք, որ նվազագույնը ամիսը մեկ անգամ հանդիպումներ ունենանք: Այդ խորհրդում պետք է փորձենք քննարկել մեր երկրին առնչվող ցանկացած կարևորագույն հարց: Հիմա աշխատում ենք մի փաստաթղթի վրա, որը համագործակցության համաձայնագրի կետերը բացում և կոնկրետ քայլեր է նախանշում, որոնք վերաբերում են և օրենսդրական աշխատանքին, և արտաքին քաղաքականությանը, և անվտանգությանն ու ընդհանրապես երկրում տիրող բարոյահոգեբանական մթնոլորտը բարելավմանը:

- Ի՞նչ ժամանակահատվածում, ի՞նչ ժամանակացույցով պետք է իրականացնեք այդ աշխատանքը:

- Համաձայնագիրը երկարաժամկետ համագործակցություն է ենթադրում: 2017թ. սպասվում են խորհրդարանական ընտրություններ, որի արդյունքներն էլ կկանխորոշեն հետագա համագործակցության ձևերը: Ինչ վերաբերում է խորհրդարանական գործունեությանը, ապա սահմանադրական փոփոխություններից հետո հսկայական օրենսդրական աշխատանք կա: Միևնույն ժամանակ , խորհրդարանում արդեն ակնհայտ են դառնում նախընտրական տրամադրությունները՝ պոպուլիզմի որոշ չափաբաժնով:

- Աշնանային նստաշրջանում այդ տրամադրություններն ավելի գերիշխող են դառնալու:

- Անշուշտ, ունենք քաղաքական ուժեր, որոնք արդեն այդ տրամադրությունների մեջ են: ՀՅԴ-ն իր մոտեցումներով երբեք պոպուլիստական քայլեր չի արել. եթե ունեցել ենք ասելիք, հավասարակշիռ ենք եղել: Կարող է տպավորություն ստեղծվել, թե հիմա ավելի պասիվ ենք, բայց զբաղված ենք նախապատրաստական աշխատանքներով, որոնք բխում են համագործակցության համաձայնագրից:

- Ձեր պասսիվությունը չի՞ բխում նաև այն հանգամանքից, որ սովորաբար ընդդիմադիր ուժերն ավելի ակտիվ են, քան իշխանական խմբակցությունները:

- Դա էլ կա: Ընդդիմություն լինելը, թերևս, ավելի հեշտ է, ավելի քիչ պատասխանատու, կարող ես ասել՝ ինչ ուզես: Թեև մենք ընդդիմություն եղած ժամանակ էլ երբեք չենք տրվել այդ հոսանքին:

- Համագործակցության համաձայնագրից հետո ՀՅԴ-ն կարծես իրեն ավելի հանգիստ է զգում:

- Ընդհակառակը: Օրերս Չեխիայի նախագահը հանդիպման ժամանակ հարցնում էր, թե այս նոր իրավիճակում կուսակցությունն իրեն ինչպես է զգում, ես ասեցի, որ կա հսկայական աշխատանք: Իսկ որտեղ կա աշխատանք, այնտեղ ՀՅԴ-ն իրեն լավ է զգում:

- Պարոն Վարդանյան, կառավարությունը մեկ ամիս առաջ կոռուպցիայի, մենաշնորհների դեմ պայքարի նոր փուլ սկսելու մասին հայտարարեց: Ինչպե՞ս հավատալ այդ նախաձեռնությանը, երբ նույն վարչապետը երկու տարի առաջ կրկին նույն բանն էր հայտարարել:

- Խնդիրները հասունանալու հատկություն ունեն, հասնելու մի սահմանագծի, որից այն կողմ արդեն անհնար է դրանց չարձագանքելը: Այս ամենը, կարծում եմ, սկսվել է սահմանադրության բարեփոխումներից, հանրապետության նախագահի փետրվարի 12-ի ելույթից: Հասել ենք մի սահմանագծի, երբ որակական փոփոխություններն ուղղակի անհրաժեշտություն են: Սա չի ենթադրում որակական փոփոխություններ շատ կարճ ժամանակահատվածում, բայց ենթադրում է աշխատանք: Արագ արդյունքներ որևէ մեկը չի խոստացել, և դա իրատեսական չի էլ լինի: Ապրիլյան պատերազմն ավելի սրեց այս խնդիրները: Մենք այլ ելք չունենք, քան երկրում կարգուկանոն հաստատելը:

- Փաստորեն ապրիլյան պատերազմը նաև դրական ազդեցություն ունեցավ:

- Չասեմ դրական, բայց սրեց բոլոր խնդիրները, ցնցում առաջացրեց հասարակության մեջ: Այսօր իշխանությունն այդ համախմբվածությունը չփոշիացնելու, չկորցնելու պատասխանատվություն ունի: Տարբեր փուլերում ունեցել ենք համախմբվածության, ոգևորվածության նման օրինակներ, բայց հաճախ մսխել ենք դրանք կամ չենք կարողացել մինչև վերջ պահել: Մեր ժողովուրդն այլ վերաբերմունքի է արժանի, և դա պետք է հասկանան թե իշխանությունները, թե քաղաքական ուժերը:

- 9-րդ նստաշրջանի դիտարկման արդյունքները կրկին փաստում են, որ ԱԺ-ն շարունակում է մնալ կառավարության կցորդը: 2017-ից անցնելու ենք կառավարման խորհրդարանական մոդելի, Ազգային ժողովի դերն առանցքային է դառնալու: Ի՞նչ եք կարծում` իրականությունը կփոխվի՞:

- Կցորդ բառը չէի օգտագործի: Ցանկացած երկրում կառավարությունն է օրինագծերի հիմնական մասի հեղինակը, օրակարգ թելադրողը: Բաց նաև վստահ եմ, որ նոր ընտրական համակարգը, ձևավորվելիք խորհրդարանն իր նոր լիազորություններով, նաև ընդդիմության էական դերակատարմամբ, որակական փոփոխություն կապահովի: Գիտեք, որ նոր խորհրդարանում ընդդիմությունը ցանկացած դեպքում տեղերի մեկ երրորդը կունենա: Կարծում եմ` կառավարությունն ավելի կախված կլինի խորհրդարանից ու ավելի հաշվետու կլինի:

Քվեարկության պատմություն

Վարդանյան Աղվան Արշավիրի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Վարդանյան Աղվան «Հայ Յեղափոխական Դաշնակցություն» 393 73 245 83 170 32 23
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները