Parliamnet Monitoring

  • Facebook
  • Twitter

News

«Ժառանգությունն» իր սխալներից դասեր է քաղել

«Ժառանգությունն» իր սխալներից դասեր է քաղել

Parliamentmonitoring.am-ը ԱԺ խմբակցությունների հետ ամփոփում է 9-րդ նստաշրջանի արդյունքները: Մեր զրուցակիցը «Ժառանգություն» խմբակցության պատգամավոր Զարուհի Փոստանջյանն է:

- Տիկին Փոստանջյան, ավարտված նստաշրջանն ըստ էության նախավերջինն էր այս խորհրդարանի համար: Ինչպե՞ս եք ամփոփում այն, ո՞ր իրադարձություններն եք կարևորում:

- Առանցքայինը ապրիլյան պատերազմն էր: Այն ցույց տվեց, որ խնդիր ունենք քաղաքական ողջ համակարգում: Պատերազմը հենց այնպես չեղավ՝ բաց հայտարարություններ արվեցին, թե 80-ականների զենքով ենք պաշտպանվում: Մինչդեռ վերջին օրերին, երբ ԱԺ-ում քննարկվում էր Ռուսաստանի հետ միավորված հակաօդային պաշտպանական համակարգ ստեղծելու նախագիծը, ասում էին, թե ՀԱՊԿ-ը մեզ հնարավորություն է տվել ունենալ ժամանակակից սպառազինություն, Ռուսաստանից մատչելի գնով զենք գնելու հնարավորություն: Բայց պարզվում է, մենք ոչինչ չունենք, դարձել ենք արբանյակ պետություն, որը չունի այլընտրանքներից օգտվելու որևէ հնարավորություն:

- Օրենսդրական տեսանկյունից նստաշրջանն ինչպիսի՞ն էր:

- Զրո օրենսդրական գործունեություն, որովհետև մեր քաղաքացիների կյանքում այդ նախաձեռնությունները որևէ առաջընթաց չեն արձանագրել: Ընտրական օրենսգիրք ընդունեցին, որը չի վերացնում քաղաքական մենաշնորհը, իշխանություններին տալիս է վերարտադրվելու հնարավորություն: Նույնը վերաբերում է տնտեսական օրենսդրությանը. առաջին ընթերցմամբ Հարկային նոր օրենսգիրք ընդունվեց, որը նպաստում է քրեաօլիգարխիկ համակարգի պահպանմանը, քաղաքացիներին լիարժեք գործունեություն ծավալելու հնարավորություն չի ընձեռում:

- Ազգային ժողովի ընդունած օրենքների մոտ 90 տոկոսը կառավարության նախաձեռնություններն են: Այսինքն` օրենսդիրը շարունակում է մնալ գործադրի հեղինակած նախագծերի դակողը: Եթե անգամ պատգամավորների հեղինակած նախագծեր են ընդունվում, ապա դրանք մեծամասնության նախաձեռնություններն են:

- Այո, այդպես է, քանի որ քաղաքական մենաշնորհ գոյություն ունի: Նման պայմաններում ԱԺ-ն պետք է լինի դակիչ մարմին, որն ուղղակի նախագծերի նոտարական վավերացում է իրականացնում: Քաղաքական մենաշնորհը թելադրում է իր պայմանները:

- 2017թ. խորհրդարանական ընտրություններով անցում ենք կատարելու կառավարման խորհրդարանական համակարգի: Կարծում եք` ձևավորվելիք Ազգային ժողովը գործունեության նո՞ւյն պատկերն է ունենալու:

- Չեմ կարծում, որ հասնելու ենք այնպիսի իրավիճակի, որ իշխանությունը իր վարքագիծը կրկին դրսևորելու հնարավորություն ունենա, ցնցումներն անխուսափելի են: Մենք տեսանք, թե արաբական հեղափոխություններից հետո տարածաշրջանում ինչպիսի վերափոխումներ եղան: Եթե մենք չկարողանանք ինքնակազմակերպվել և քաղաքականապես պատրաստվել, որ վերցնենք այս իշխանությունը, ապա այս համակարգը, միևնույնն է, իր ժամկետն ավարտել է: Տեղը պետք է գա նորը, և շատ կարևոր է, որ այդ նորը կազմակերպված լինի:

- Մենք կամ նորը ասելով՝ ում նկատի ունեք: «Ժառանգությո՞ւն» կուսակցությանը:

-Ոչ: Մեր հասարակությանն ի նկատի ունեմ:

- Իսկ ցնցումներ ասելով՝ արտաքի՞ն, թե ներքին մարտահրավերները նկատի ունեք:

- Ներքին ու արտաքին մարտահրավերները այսօր խիստ սերտաճած են: Եթե անդամակցում ես մի միության, որի հիմնական անդամը գտնվում է արևմուտքի պատժամիջոցների տակ, ապա ինքդ էլ կրում ես դրանց բացասական ազդեցությունը: Իսկ այդ ամենն իր անդրադարձն է թողնում նաև քաղաքական համակարգի վրա: Փոփոխություններ լինելու են:

- Տիկին Փոստանջյան, «Ժառանգություն» խմբակցությունում նույնանուն կուսակցությունից միայն դուք եք: Խմբակցությունը, ինչպես այսօր շատ է ասվում, գոյություն չունի: Սա դաս եղա՞վ , որ հաջորդ ընտրություններին փոխեք ձեր մարտավարությունը: Եթե, իհարկե, մասնակցելու եք ընտրություններին:

- Այո, իհարկե, մասնակցելու ենք: Իհարկե, դա մեր ամենակոպիտ սխալն է եղել, մենք մեր սխալներն ընդունում ենք: Ասում են` խելացին սովորում է ուրիշի սխալների վրա, հիմարը՝ իր: Հիմա մենք, այո, պետք է սովորենք մեր սխալներից:

- Դա գիտակցում է նաև ձեր կուսակցության ղեկավարությո՞ւնը:

- Այո, ես կուսակցության վարչության անդամ եմ, ես գիտակցում եմ: Բոլորն են գիտակցում:

Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները