Parliamnet Monitoring

  • Facebook
  • Twitter

News

Վարդան Այվազյանը հանրային դժգոհություն չի տեսնում

Վարդան Այվազյանը հանրային դժգոհություն չի տեսնում

Նոյեմբերի 10-ին խորհրդարանն ավարտեց մարտական գործողությունների ժամանակ զոհված կամ հաշմանդամ դարձած զինծառայողների ընտանիքների հատուցմանը վերաբերող օրենսդրական փաթեթի եռօրյա բուռն քննարկումը: Նոյեմբերի 11-ին փաթեթն առաջին ընթերցմամբ ընդունվեց ձայների 102 կողմ, 3 դեմ հարաբերակցությամբ: Parliamentmonitoring.am-ը թեմայի շուրջ զրուցել է ԱԺ տնտեսական հարցերի մշտական հանձնաժողովի նախագահ Վարդան Այվազյանի հետ:

- Պարոն Այվազյան, չե՞ք կարծում, որ զոհված կամ հաշմանդամ դարձած զինծառայողների ընտանիքներին հատուցում տալու վերաբերյալ նախագծի նկատմամբ առաջացած հանրային դժգոհությունն արդարացի է:

- Ես հանրային դժգոհություն չեմ տեսել: Այդ մասին տեղեկացված եմ այնքանով, որքանով Դուք եք ասում:

- Նախագծի քննարկման երեք օրերին ԱԺ-ում քննադատություններ հնչեցին, խորհրդարանի շենքի դիմաց բողոքի ակցիա տեղի ունեցավ, սոցիալական ցանցերում է դժգոհության մեծ ալիք է բարձրացել:

- Չեք համոզի ինձ: Ես հաճախ եմ լինում Հայաստանի տարբեր բնակավայրերում, երկու օր առաջ Չարենցավանում էի, և ինչ-որ միջավայրում այս հարցն էինք քննարկում: Որևէ մեկը չի ասում, թե այդ հազար դրամը պետք չէ տալ, պարզապես ասում են, թե հավասարաչափության խնդիր կա: ասում են, թե շատ ստացողը թող շատ տա, քիչ ստացողը՝ քիչ: Իսկ ֆեյսբուքում ովքե՞ր են քննադատում: Ես այդ բունտը չեմ տեսնում: Չկա մի իրավիճակ, չկա մի որևէ գործընթաց, որի նկատմամբ դժգոհություն չլինի: Համոզված եմ, որ այս դրական նախաձեռնությունը կընդունվի:

- Կընդունվի, քանի որ ԱԺ մեծամասնությունը Հանրապետական խմբակցությունն է, որը կառավարության ներկայացրած գրեթե բոլոր օրինագծերն է ընդունում:

- Դուք ինչ եք մտածում, կա՞ մեկը, որ չի ցանկանում օգնել մեր բանակին:

- Ոչ, բայց քննադատողներն ասում են` նախ բանակից թալանվածը հետ բերեք, դադարեցրեք թալանը, հետո նման առաջարկ ներկայացրեք:

- Ես տարբեր առիթներով հայտարարել եմ, որ ով թալանել է, անկախ ժամանակահատվածից, պետք է հետ բերի: Նույնն էլ հիմա եմ կրկնում, բայց խոսել ա-ի մասին՝ չասելով բ-ն, համամիտ չեմ: Եթե թալանածը հետ բերեն, այդ 1000 դրամները պե՞տք չէ վերցնել: Այսինքն, մեր մոտեցումն այն է, որ ցանկացած քաղաքացի իր մասնակցությունն ունենա բանակի խնդիրների լուծմանը, բայց ունենա նաև վերահսկողության մեխանիզմներ: Այն տարբերակը, որն առաջարկել է ՊՆ-ն, «մեկ ազգ՝ մեկ բանակ» գաղափարն է ներառում:

- Ձեզ համար հասկանալի՞ է, թե ինչու օրինակ ապրիլյան պատերազմում զոհված զինծառայողների ընտանիքները նման հատուցում պետք է չստանան:

- Այո, ես էլ եմ կարծում, որ կա խնդիր, և այդ մասին պետք է բարձրաձայնել: Որևէ մեկը չի կարող ինձ բացատրել, թե այդ հատուցումն ինչու պետք է միայն 2017 թվականից հետո տեղի ունեցող դեպքերին վերաբերի:

- Իսկ բյուջեի միջոցներով այս խնդիրը հնարավո՞ր չէր լուծել:

- Պետական բյուջեի ծախսային մասը 1 տրիլիոն 360 մլրդ դրամ է, իսկ մեկ տարվա այս 1000-ական դրամները մոտ 5,5 մլրդ դրամ են կազմելու: Կարծում եք` բյուջեից այսքանը տնտեսել և այդ ծրագրին հատկացնելը խնդի՞ր է: Չէ՞ որ մենք բանակին արդեն 280 մլրդ դրամ տալիս ենք: Այսինքն, խնդիրը ֆինանսական չէ կամ հազարական դրամները չեն, խնդիրը մասնակցությունն է, ազգ-բանակ կապի սիմվոլիկան է: Թեև այդ 1000-ական դրամները բոլոր դեպքերում արժեք են ներկայացնում, մեկի համար՝ մեծ, մյուսի համար՝ շատ չնչին:

- Չե՞ք կարծում, որ թե ընդհանուր առմամբ, թե կոնկրետ բանակում չարաշահումները, կոռուպցիան, պաշտոնյանների շքեղ ծառայողական մեքենաներն ու տներն այնքան սուր խնդիր են դարձել, որ ցանկացած նախագծի քննարկում վերածվում է այդ երևույթի քննադատությանը:

- Միանշանակ: Կառավարությունում արդեն ապօրինի հարստացման, պաշտոնյայի եկամուտների ու ծախսերի անհամարժեքության վերաբերյալ նախագծեր կան: Այ, երբ այդ նախագծերը կգան ԱԺ, ու հանկարծ Այվազյան Վարդանը կասի՝ ինչու եք բերել, այդ ժամանակ ինձ քննադատեք:

Քվեարկության պատմություն

Այվազյան Վարդան Սուրենի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Այվազյան Վարդան «Հայաստանի հանրապետական կուսակցություն» 747 7 8 36 166 37 34
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները