Parliamnet Monitoring

  • Facebook
  • Twitter

News

Կոռուպցիայի բարձր մակարդակի պատճառով Հայաստանի վրա միջազգային ճնշում կա

Կոռուպցիայի բարձր մակարդակի պատճառով Հայաստանի վրա միջազգային ճնշում կա

Դեկտեմբերի 13-ի արտահերթ նստաշրջանի ընթացքում Ազգային ժողովն ընդունեց Քրեական և Քրեական դատավարության մասին օրենսգրքերում կառավարության առաջարկած փոփոխությունները, որոնցով ապօրինի հարստացման քրեականացում է նախատեսվում: Սա կառավարության խոստացած հակակոռուպցիոն փաթեթի քայլերից մեկն է: Նախաձեռնության առաջին քայլով կարգավորվեց բարձրաստիճան պաշտոնյանների գույքի ու եկամուտների հայտարարագրման ինստիտուտը. պատասխանատվություն նախատեսվեց հայտարարագրերը Բարձրաստիճան պաշտոնյաների էթիկայի հանձնաժողով սահմանված ժամկետում չներկայացնելու, դրանցում ոչ ամբողջական կամ կեղծ տվյալներ ներկայացնելու համար: Երկրորդ փաթեթով կառավարությունն առաջարկում է քրեականացնել ապօրինի հարստացումը: Մասնավորապես, 3-ից 6 տարի ազատազրկում է նախատեսվում այն դեպքերի համար, երբ էական անհամապատասխանություն է բացահայտվում պաշտոնյայի գույքի և օրինական եկամուտների միջև: Որպես անհամապատասխանության էական շեմ սահմանվում է 5 միլիոն դրամը:

Թեմայի շուրջ Parliamentmonitoring.am-ը զրուցել է պատգամավոր Էդմոն Մարուքյանի հետ:

- Պարոն Մարուքյան, քննարկմանը կարծիք հայտնեցիք, որ գույքի ու եկամուտների անհամապատասխանության 5 մլն դրամի շեմը պետք է նվազեցվի: Մինչդեռ պատգամավորների մի մասը կարծում է, որ այդ սահմանաչափը պետք է ավելի բարձրացնել:

- Ես 460.000 դրամ աշխատավարձ եմ ստանում և գտնում եմ, որ այդ 5 մլն դրամը մեծ գումար է: Եթե մարդիկ կան, որոնք դոլարով միլիոնատեր են, կարող են նման հայտարարություններ անել: Երկրի սոցիալ-տնտեսական վիճակից ելնելով պետք է գնահատենք՝ մե՞ծ գումար է, թե՞ ոչ: Ես ասում եմ, որ մեծ գումար է: Եթե ամեն տարի ես 5 մլն դրամ չհիմնավորված փող ունենամ, հինգ տարում դա բավական մեծ գումար կկազմի:

- Բայց, մյուս կողմից էլ, երբ ուսումնասիրում ենք բարձրագույն պաշտոնատար անձանց գույքի ու եկամուտների հայտարարագրերը, տեսնում ենք, որ 5 մլն դրամը փոքր գումար է:

- Հաշվի առեք, որ օրենքը հետադարձ ուժ չունի, և խոսքն ապագայի մասին է: Եթե ապագայում մեկը 5 մլն դրամ չհիմնավորված գումար ունենա, մենք նրան կհարցնենք, թե որտեղից, իսկ էթիկայի հանձնաժողովը կզբաղվի դրանով: Մյուս կողմից էլ՝ պնդում կա, որ եթե իրավապահների ջանքերը վատնենք այդ մանր բաների վրա, խոշորներին չենք կարողանա բռնել: Բայց այսօր 100 դոլար կաշառքի մասին ենք խոսում, երբ ԱԷԿ-ի նախկին տնօրենը 780 մլն դրամ հափշտակության գործով պայմանական ազատազրկման է ենթարկվել ու ազատ արձակվել: Ամեն դեպքում նախագիծը շատ կարևոր է, բայց՝ ուշացած:

- Համաձա՞յն եք այն գնահատականին, որ եթե օրենքը հետադարձ ուժ չունի, ապա մինչև այժմ ապօրինի ճանապարհով կուտակված հարստության համաներում է:

- Ոչ, համաձայն չեմ, որովհետև պատկերն այլ կլինի, եթե ապագա խորհրդարանում մեզ հաջողվի հանձնաժողով ստեղծել և ուսումնասիրել նման դեպքերը: Այդ նյութերի հիման վրա քրեական գործերը կարող են հարուցել ոչ թե ապօրինի հարստացման, այլ ուրիշ հատկանիշներով: Եթե մեկը մի քանի մլն դոլարի չարաշահում է թույլ տվել, դա ապօրինի հարստացման գործ չէ, դա արդեն պետք է քրեական այլ հոդվածով հետապնդվի:

- Իսկ առկա՞ են այն մեխանիզմները, որոնք թույլ չեն տա ունենալ այսօրվա պատկերը, երբ պաշտոնյաններն իրենց զոքանչների ու այլ բարեկամների անունով են գրանցում ձեռք բերած գույքը, ունեցվածքի դեպքում էլ հայտարարում, թե նվեր կամ ժառանգություն են ստացել:

- Այսօրվա պատկերը ոչ այնքան մեխանիզմների բացակայության, որքան եղած մեխանիզմները կիրառելու քաղաքական կամքի բացակայության արդյունք է:Մամուլն ամեն օր պաշտոնյաների գույքի ու եկամուտների վերաբերյալ բազմաթիվ հրապարակումներ է անում, բայց դրանց վերաբերյալ որևէ քննություն չկա:

- Կարելի՞ է ասել, որ այս օրենքներով արդեն իշխանությունները ցանկանում են քաղաքական կամք դրսևորել:

- Ոչ, իշխանությունները պարզապես նոր մեխանիզմ են ներդնում: Բայց կլինի՞ այդ նոր մեխանիզմն օգտագործելու քաղաքական կամք, դա կախված կլինի իշխանափոխությունից, համակարգային փոփոխություններից: Եթե չլինի, ապա այդ մեխանիզմներն էլ կմնան թղթի վրա:

- Այդ դեպքում ինչո՞ւ է իշխանությունը նախաձեռնում այս քայլը:

- Իշխանություններն այս մեխանիզմը ներդնում են նաև միջազգային ճնշման ներքո: Այնպես չէ, որ քնել-զարթնել են ու որոշել, որ դրա կարիքը կա: Պետք է ֆիքսել, որ կոռուպցիայի բարձր մակարդակի պատճառով Հայաստանի վրա միջազգային ճնշում կա: Նաև կարծում եմ, որ սա ընդդիմության ձեռքին լավ մեխանիզմ է:

- Կարծո՞ւմ եք, որ նոր ստեղծվող հակակոռուպցիոն մարմնի ղեկավարումը պետք է հանձնվի ընդդիմությանը, որ դրա գործունեությունն ավելի արդյունավետ լինի:

- Ճիշտն ասած, ես չեմ լսել, որ ընդդիմությունը ցանկանում է ղեկավարել այդ մարմինը: Մեր քաղաքական պատմության մեջ կա նման մի փաստարկ՝ եթե ընդդիմությունը գնում է ինչ-որ տեղ ղեկավարելու, ուրեմն ծախված է: Քանի դեռ այս պիտակը կա, շատ բարդ կլինի նման գործընթացներում ընդդիմադիր գործիչներ կամ հասարակական կազմակերպություններ ներառելը: Տեսեք՝ օրեր առաջ ՀԿ-ները հրաժարվեցին ընտրական գործընթացները վերահսկող հանձնաժողովին մաս կազմելուց: Այս նույն խնդիրն է, բայց ինքս կողմնակից եմ մասնակցային գործընթացներին:

Քվեարկության պատմություն

Մարուքյան Էդմոն Հրաչիկի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Մարուքյան Էդմոն Խմբակցություններում չընդգրկված 497 109 94 81 182 136 103
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները