Parliamnet Monitoring

  • Facebook
  • Twitter

News

Ընտրություններին Մխիթարյանի նման պասեր ենք տալու

Ընտրություններին Մխիթարյանի նման պասեր ենք տալու

Parliamentmonitoring.am-ի զրուցակիցը ՀԱԿ խմբակցության քարտուղար Արամ Մանուկյանն է:

- Պարոն Մանուկյան, այս խորհրդարանական ընտրություններն ինչո՞վ են տարբերվում նախորդներից:

- Բավականաչափ թատերականացված են: Միշտ եղել է այդ էլեմենտը, բայց հիմա, բացի թատերականից, ուրիշ բան չի մնացել: Իշխանությունները մշակված գործիքներ են կիրառում՝ ընդդիմադիրներ են սարքում, որոնք սկսում են ընդդիմությունից բարձր հայհոյել, ու շփոթվում ես, թե էս ինչ է կատարվում: Սա իշխանական ծրագիր է, որը դեռ հաջողությամբ է իրականացվում: Մյուս կողմից էլ՝ թեպետ ֆորմալ առումով դա իրականացնում են, բայց բոլորը հասկանում են, որ ընդամենը մի քանի ամիս առաջ բարձր պաշտոն զբաղեցրած անձը, որը խոցելի է, հանկարծ հայտնվել է հակառակ բլոկում և կուրծք ծեծելով արդարություն է պահանջում:

- Նախկին պաշտպանության նախարար Սեյրան Օհանյանի՞ն նկատի ունեք:

- Ես խոսում եմ երևույթի մասին, դուք կարող եք անձեր ասել, իսկ այդ երևույթը համատարած է: Ժողովրդի մի մասը կհավատա, իսկ ավելի փորձված հատվածը լավ տեսնում է, թե ինչ խաղեր են գնում: Այս ընտրությունների մյուս առանձնահատկությունը, որը շատ է տխրեցնում, քաղաքական մրցակցության բացակայությունն է: Կա խմբերի ու թիմերի մրցակցություն, չկա ծրագրերի, տեսակետերի մրցակցություն: Մենք փորձելու քաղաքականացնել դաշտը և Հայաստանի զարգացման կոնցեպտ ներկայացնել, ինչը այլ ուժեր չեն անում: Մեր կոնցեպտը պատերազմից դուրս գալու, ԼՂՀ հարցի հնարավորինս արժանապատիվ լուծելու մոտեցումն է, ինչը առաջարկում ենք անել իշխանություններին: Չէ՞ որ իրենց ձեռքում է և առաջարկը, և լուծելու հնարավորությունը: Այլընտրանքը շատ տխուր է, հատկապես որ որևէ մեկը այլընտրանք չի ներկայացնում: Մարդիկ վախենում են ներկայացնել այն իրականությունը, որի մեջ ապրում ենք: Երբ գիտես, թե միջազգային հանրությունը, Ռուսաստանն այդ հարցի նկատմամբ ինչ դիրքորոշում ունեն, երբ գիտես, թե դրա պատճառով ինչ արտագաղթ է տեղի ունենում, քաղաքական գործիչները, բերանները ջուր առած, վախենում են խոսել այդ մասին:

- Լևոն Տեր-Պետրոսյանի ելույթից հետո մեղադրանքներ հնչեցին, թե դա հող տալու քաղաքականություն է:

- Առնվազն պետք է կույր լինել, որ չտեսնել, թե ինչ է առաջարկում Տեր-Պետրոսյանը: Նա ասում է, կա մի ծրագիր, որն այս 20 տարիների ընթացքում մշակվել է եռանախագահների կոմից, և որը դրված է իշխանության սեղանին: Դա փոխզիջումային տարբերակն է, և 20 տարի երեք իշխանություն փորձել է այդ փաստաթուղթը լավացնել: Դու կամ պետք է ասես ՝ գնում եմ այդ ծրագրի իրականացմանը, կամ ասես՝ չեմ գնում: Միջազգային հանրությանը ասում են, այո, գնում ենք, բայց սեփական հանրությանը վախենում են պատրաստել այդ փաստաթղթի կիրառմանը: Ստեղծել են ուռա-հայրենասիրական մի միջավայր և վախենում են ասել, որ փոխզիջումային տարբերակն ինչ է: Իսկ եթե գանք հակառակ կողմից, այդ ծրագիրը հնարավորություն է տալիս ԼՂՀ-ն անջատել Ադրբեջանից միջազգային զորքերով, միջազգային երաշխիքներով և միջանկյալ կարգավիճակով, որն այդ խնդիրները լուծելուց՝ շրջափակումը բացելուց, փախստականների վերադարձից, տնտեսական զարգացում ապահովելուց հետո ստանում է միջազգայնորեն միջանկյալ կարգավիճակ:

- Չե՞ք կարծում, որ ձեր այդ նախընտրական թեզը ձեր մրցակիցները ձեր դեմ կօգտագործեն, և ժողովուրդը այդպես էլ կընկալի:

- Եվ օգտագործում են, բայց այդ դեպքում մրցակիցներիդ ասում ես՝ շատ լավ, գուցե դուք եք ճիշտը, բայց ասեք ձեր ճիշտ տարբերակը: Խնդիր կա, շատ լուրջ է վիճակը, հնարավոր է, բացասական սցենարներ զարգանան, ապրիլը տեսել ենք և այսօր էլ սահմանին լարված է: Եթե կա առաջարկ, թող ներկայացնեն: 20 տարի առաջ էլ ասեցին լավ լուծում կբերեն, բայց բերեցին պարտությունների շարք: Իսկ մեր ծրագիրը թող մեզ վնասի, բայց չասել, որ մենք գնում ենք արագընթաց վայրեջքի ճանապարհով, և դա վտանգում է ոչ միայն ԼՂՀ, այլև ՀՀ անվտանգությունը, չենք կարող: Մենք համարձակ գնում ենք այս ծրագրի իրականացմանը, ես կարծում եմ ժողովուրդն այն կընկալի և կաջակցի դրան: Մեզ մնում է լավ աշխատել, այն հասցնել ժողովրդին և հասկացնել, որ դա քաղաքական ծրագիր է: Ժողովուրդն էլ թող կողմնորոշվի՝ մեծ-մեծ խոստումների՞ն է կողմ, թե՞ ռեալության վրա հիմնված երբեմն ոչ հաճելի ծրագրին:

- Նախորդ ընտրությունները ցույց են տվել, որ ժողովուրդը քաղաքական ծրագիրը, գաղափարները չի ընտրում, իր ընտրությունը կատարում է՝ ելնելով թաղային հեղինակության, վարչական լծակների և ֆինանսական ազդեցությունից:

- Իհարկե, այդ երևույթները կան: Ժողովրդին բերել են այնպիսի սոցիալական վիճակի, որ 10-20 հազար դրամը հարց է լուծում, բայց մենք այդ զանգվածին պետք է խորհուրդ տանք, որ եթե չի կարող այդ գումարը չվերցնել, թող վերցնի, դա իրենից գողացածի մի հարյուրերորդական մասն է, բայց քվեարկի, ում ուզում է:

- Դուք այս անգամ Գագիկ Ծառուկյանի հետ համագործակցելու փորձ չարեցի՞ք:

- Մենք ոչ մեկի հետ համագործակցելու փորձ չենք արել, մենք հայտարարել ենք մեր ծրագրային դրույթը: Խնդիրը մեխանիկական միացումներ չեն, մենք քաղաքական պայքարի մեջ ենք մտնում հստակ քաղաքական ծրագրով՝ խաղաղություն, բարիդրացիություն, հաշտություն: Եթե այս ծրագրին որևէ մեկը միանա, մենք կողջունենք:

- Ձեր այդ քաղաքական ծրագիրը կարող է պարտվել ոչ քաղաքական՝ ֆինանսական, վարչական ու այլ ռեսուրսներին:

- Պետք չի այդպես վատատես լինել, մենք ունենք երկու ամիս, և ես կարծում եմ, որ կկարողանանք հասարակությանը հասցնել այս ծրագրի կարևորությունը, անհրաժեշտությունը, բացել նրա աչքերը: Գործիքներ կան, որ դեռ կկիրառենք: Եթե այսպես գնա, մենք որոշ փակագծեր կբացենք: Հասարակությունը խաղաղության կողմն է, ոչ մի ծնող չի ուզում, որ իր երեխան ամերիկաներում և ֆրանսիաներում լինի ու տարին մի անգամ էլ նրան չտեսնեն: Տղա երեխաները Հայաստանից փախչում են: Ժամանակը կգա, ես կներկայացնեմ դպրոցների վիճակը, թե պատերազմը, սահմանին տիրող իրավիճակը ինչ խթան են արտագաղթի համար: Դա թիվ մեկ խթանն է:

- Իսկ չե՞ք կարծում, որ ռեյտինգային ընտրակարգով իշխանությունները ոչ իշխանական ուժերի հնարավորությունները խիստ սահմանափակել են:

- Մենք այդ ընտրակարգը կօգտագործենք հօգուտ մեզ, շատ թեկնածուներ կառաջարկենք: Ես Արաբկիրում առաջադրվելու եմ, որտեղ ևս 14-15 թեկնածու ունենք: Մեր սկզբունքը հետևյալն է՝ կուսակցությունը տվյալ ընտրատարածքում պետք է հավաքի առավելագույն ձայն: Ես աշխատելու եմ, որ Արման Մուսինյանը, Զոյա Թադևոսյանը շատ ձայն բերեն, և ոչ թե մեկս մյուսից փախցնենք: Սա ֆուտբոլի նման թիմային պայքար է: Հենրիխ Մխիթարյանը շատ գոլ չի խփում, բայց շատ պասեր է տալիս: Մենք միմյանց պասեր ենք տալու:

Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները