Parliamnet Monitoring

  • Facebook
  • Twitter

News

Մեր թիրախը ՀՀԿ խմբակցությունն է՝ գումարած մեկ հոգի

Մեր թիրախը ՀՀԿ խմբակցությունն է՝ գումարած մեկ հոգի
Շարունակում ենք ամփոփել գարնանային նստաշրջանի արդյունքները: Մեր զրուցակիցը  ԱԺ ՀԱԿ խմբակցության քարտուղար Արամ Մանուկյանն է:

-Ինչպե՞ս եք գնահատում Ազգային ժողովի 5-րդ գումարման գարնանային նստաշրջանում ՀԱԿ խմբակցության աշխատանքը:
-Հատկապես վերջին 4 ամսվա ընթացքում ՀԱԿ-ը կարողացավ հուժկու հարվածներ հասցնել ՀՀԿ-ին և իշխանությանը` խորհրդարան բերած փաստաթղթերը դարձնելով  լրջագույն քննարկման առարկա, կարողացանք նաև մեր նախաձեռնություններով պատին սեղմել ՀՀԿ-ին ու ցույց տալ իշխանության ոչ դեմոկրատ էությունը: Մեր նախագծերը, իհարկե, տորպեդահարվել են ու չեն ընդունվել, բայց դրանք կարևորագույն խնդիրների լուրջ լուծումներ էին առաջարկում` փոփոխություններ Ընտրական օրենսգրքում, աշխատավարձի հետ կապված մի քանի նախաձեռնություններ և վերջինը` քաղաքական. «Հանրապետականը» խոստացավ օրակարգ մտցնել ու քննարկել մարտի 1-ի հանձնժողով ստեղծելու հարցը, բայց պարզվեց, որ ՀՀԿ-ն հավատարիմ է իր գցելու, խաբելու իմիջին ու մերժեց նախագիծը:  Մեր ակտիվությունը մեծ է եղել, ունեցել ենք ոչ պոպուլիստական, գրագետ ելույթներ, ինչը նորություն էր խորհրդարանի համար: Մեր աշխատանքը միանշանակ դրական էր ու օգնեց մյուս քաղաքական ուժերին ավելի համարձակ դառնալ,  քվեարկել նույն կերպ: Մեր աշխատանքը ավելի զգոն դարձրեց ՀՀԿ-ին և համախմբեց ոչ իշխանական ուժերին:

-Ձեր վերջին դիտարկման հետ` ՀԱԿ-ի համախմբող դերակատարման մասին,  մյուս ընդդիմադիրները կարող են չհամաձայնել :
-
Չէ, ինչո՞ւ: Նույն վերաբերմունքով մենք պատասխաանել ենք մեր մյուս գործընկերներն: Եթե, օրինակ, ՀՅԴ-ն որևէ նախագիծ է ներկայացրել, բացատրել, հիմնավորել, մենք  միասնական մոտեցում ենք հանդես բերել:

-Ինչո՞ւ ոչ իշխանականները սկսեցին խորհրդարանում  միասնական հանդես գալ:
-Որովհետև տեսնում ենք, որ համախոհ լինելու դեպքում կարելի է ավելի շատ ձայն ստանալ, դրանով ավելանում է քո քաղաքական ակցիան հաջողության հասցնելու հնարավորությունը: Նախորդ խորհրդարաններում իշխանությանը դեմ քվեարկող պատգամավորների թիվը հազիվ էր հասնում 20-ի, այս դեպքում կարողանում ենք 48-50 ձայն հավաքել:

-Բայց այդքան ձայնով, միևնույն է, ընդդիմության որևէ նախագիծ ընդունել չհաջողվեց, և ոչ էլ իշխանության որևէ նախաձեռնություն տապալվեց: Այսինքն, շոշափելի արդյունք չունեցաք:
-Այդ առումով ճիշտ եք, բայց 131-ից 48 ձայնը ընդհանուր առմամբ չի կարող նկատելի չլինել: Մեզ նույնիսկ ՀՀԿ-ից միացողներ եղան: Առաջիկայում, այսպես շարունակվելու դեպքում, մի 10 ձայնի փոփոխությամբ կարելի է անգամ բլոկ դնել:  Սա մեզ ոգևորում է, միասնական դաշտ է ստեղծում: Այսինքն, չլինելով գաղափարական համախոհներ ոչ իշխանական ուժերի հետ` շատ հարցերում մենք միասնական ենք եղել: Օրինակ, առաջիկայում էլ խորհրդարան է բերվելու գազի` մեր 20 %-ը ռուսներին տալու փաստաթուղթը, պիտի աշխատենք եղած դեմերին նորերն ավելացնել: Պիտի հրապարակենք բոլոր նրանց անունները, ովքեր կողմ կքվարկեն դրան, թող հանրությունը իմանա:

-Դրանից ի՞նչ պիտի փոխվի:
-Գուցե իմ ասածները որակական տեսանելի փոփոխություն չեն բերում, բայց գոնե բարոյական դաշտում քաղաքացու մեջ կարող են հույս արթնացնել, եթե տեսնեն, որ պայքարող ու կռիվ տվող մարդիկ կան: Այո, ստացվում է, որ մենք մարդկային արժեքների վրա ենք աշխատում, բայց սա էլ է արժեք:

-ՀՀԿ խմբակցության ղեկավար Գալուստ Սահակյանը, ընդունելով հանդերձ, որ խորհրդարանում քննարկումների որակ է փոխվել, ասում է, որ դա ոչ թե ընդդիմության միասնական գործունեության արդյունքն է, այլ ընդամենը մի քանի ընդդիմադիր պատգամավորների աշխատանքի:   
-Թող ՀՀԿ-ն դրանից չուրախանա: Եթե ձևաչափով միասնական ընդդիմություն չկա, ապա Սերժ Սարգսյանին հեռացնելու հարցում այս ուժերը հաստատ միասնական են:  ՀՀԿ-ում  էլ կան շատ դժգոհներ, նրանց վրա էլ է ազդում երկրի վիճակը: Մարդիկ ունեն բիզնես, բայց ունեն նաև վախ, որ մի օր դատախազությունը կարող է իրենց դուռը բախել, որովհետև այս երկրում հնարավոր չէ առանց անօրինականությունենրի բիզնեսի տեր լինել: Այդ մարդիկ ուզում են իրավիճակ փոխել, բայց մաֆիայի օրենքը չի թողնում: Ես համոզված եմ` պահը որ գա, պայթելու է, նրանք թողնելու են փախչեն:

-ԲՀԿ-ում այդ խնդիրը այսօր չկա՞:  
-Բոլոր տեղերում կա,  ՀՀԿ-ում էլ նույն վիճակն է: ՀՀԿ-ն չափից դուրս լկտիացավ վերջին ընտրություններից հետո, բայց սա վերջի սկիզբն է, ու սկսում են հոտել ներսից:

-Ձեր նշած պայթունը ե՞րբ է լինելու:
-Ժամկետ չեմ կարող ասել: Սերժ Սարգսյանը կամ պետք է ավելի սեղմի օղակը,կամ պիտի մի քիչ թուլացնի, որ ժողովրդավարություն խաղան: Երկու ճանապարհն էլ լարումներ է բերելու` մի դեպքում` բացահայտ, մի դեպքում`թաքնված:  

-Ո՞րն էր գարնանային նստաշրջանում ընդունված ամենակարևոր օրենքը:
-Ես  կարող եմ ասել, թե որն էր ամենատխուր օրենքն ու քվեարկությունը. Դիլիջանի միջազգային դպրոցին վերաբերող օրենքը, որով հերթական անգամ արհամարհվեց հայոց լեզուն :

-Ո՞րն էր գարնանային նստաշրջանի ամենահետաքրքիր քննարկումը:
-Վերահսկիչ պալատի քննարկումը` բայց ընդամենը արձագանքների, հնչած ելույթների առումով:

-Իսկ ինչպե՞ս եք մեկնաբանում խոսակցությունները, թե սա հատուկ վարչապետի դեմ կազմակերպված քայլ է, ինչը հաճելի է հատկապես ԲՀԿ-ին ու ՀԱԿ-ին:
-Կազմակերպված լինելը կարող է ընդամենը տարբերակներից մեկը լինել: Բոլորն էլ գիտեն, որ մեր թիրախը Սերժ Սարգսյանն է: Երբ ասում եմ Սարգսյան, ես երկուսին էլ պատկերացնում եմ: Բացառվում է, որ Տիգրան Սարգսյանը մախինացիաներ անի, ու Սերժ Սարգսյանը դրանց մասին չիմանա: Մենք էլի պնդում ենք, որ որպեսզի երկրում իրավիճակ փոխվի, պետք է փոխել մեկ մարդու, և այդ մարդը Սերժ Սարգսյանն է:

-Մեկ տարի առաջ, երբ այս Ազգային ժողովը սկսեց աշխատանքները, ակնհայտ էր, որ ՀՀԿ-ի ու ՀԱԿ-ի միջև շփում չկա: Իսկ այսօ՞ր:  
-Այսօր կա, շատ լարված: Իրենց թիրախը մենք ենք, շատ հստակ, և իրենք էլ գիտեն, որ մեր թիրախը իրենք են: Գումարած մեկ հոգի:

Քվեարկության պատմություն

Մանուկյան Արամ Վիգենի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Մանուկյան Արամ «Հայ ազգային կոնգրես» 279 157 142 56 330 74 88
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները