Parliamnet Monitoring

  • Facebook
  • Twitter

News

ՀՀԿ-ի միասնական քվեարկության վերջը գալու է

ՀՀԿ-ի միասնական քվեարկության վերջը գալու է

Հարցազրույց Ազգային ժողովի ՀԱԿ խմբակցության քարտուղար Արամ Մանուկյանի հետ:


-ՀԱԿ խմբակցությունը հայտարարել է մեծամասնության նախաձեռնած գազի հանձնաժողովը բոյկոտելու մտադրության մասին: Տպավորություն է, թե ՀԱԿ-ը չի ուզում միանալ ՀՀԿ-ի նախաձեռնությանը, որովհետև նրանք էլ մերժեցին ձերը: Այս ինքնանպատակ հակադրությունը կարո՞ղ է արդյունավետ լինել:

-Սա չի կարող ինքնանպատակ հակադրություն կոչվել, որովհետև մենք շատ կոնկրետ առաջարկ ենք ներկայացրել` հանձնաժողովը պետք է գործի բաց ու հրապարակային: Մեծամասնությունը ասում է, որ նիստերը պետք է լինեն փակ, իսկ փաստաթղթերը պիտի չհրապարակվեն: Նման գաղտնիության պայմաններում են ծնվել աննորմալ պայմանագրերը ու գները: Մենք այդ գաղտնիության դեմ ենք պայքարել ու հիմա խայծը կուլ տանք և գնանք փակ գործունեությա՞մբ զբաղվենք: Բա մեր պայքարը ինչի՞ համար էր: Մենք ուզում ենք աշխատել այդ հանձնաժողովում, բայց ամեն բան կախված է մեծամասնության որոշումից: Երկուշաբթի կտեսնենք` ընդունել են մեր առաջարկությունը թե ոչ, ու ըստ դրա էլ վերջնական դիրքորոշում կհայտնենք: Ավելին, եթե ուզում են այդպես փակ աշխատել, ուրեմն, թաքցնելու ինչ-որ բան կա. սրա մասին էլ պետք է մտածել:

-Պարոն Մանուկյան, բայց անցյալ տարի, երբ իշխանությունը մի պահ որոշեց ընդունել ՀԱԿ-ի` մարտի 1-ի հանձնաժողով ստեղծելու նախաձեռնությունը, առաջարկեց, որ այն պետք է փակ գործի, և դուք դա ընդունեցիք: Այսինքն, հանձնաժողովի փակ գործելաոճը ընդհանրապես ձեզ համար ընդունելի է:

-Մարտի 1-ի հանձնաժողովում պիտի խոսվեր քրեական գործերի մասին: Դա ուրիշ էր: Այստեղ խնդիրն այլ է`պարզել, թե ինչպես է գոյացել 300 մլն դոլար պետական պարտքը և ինչպես է ձևավորվել գազի սակագինը:

-Ձեզ համար հասկանալի՞ է, թե ինչու ընդհանուր մոտեցումների համաձայնեցումից հետո Դավիթ Հարությունյանը հանկարծ առաջարկեց, որ հանձնաժողովի նիստերը պետք է դռնփակ լինեն:

-Դա ոչ այլ ինչ էր, քան տարօրինակ անլրջություն: Ստացվում է, որ մի խմբակցությունից իրար հակասող երկու տարբեր առաջարկություն է եկել:

-Պարոն Մանուկյան, անդրադառնանք մարտի 1-ի ժամանակավոր հանձնաժողով ստեղծելու հարցին: Առաջիկա քառօրյայում 4 ուժերի միասնական նախաձեռնությամբ այս հարցը կընդգրկվի օրակարգ: Մեկ անգամ այս որոշման նախագիծը արդեն քննարկվել ու մերժվել է: Կարծում եք` այս անգամ կարող է ընդունվե՞լ:

-Իհարկե, դժվար է ու ռեալ չէ: Բայց կարծում եմ, որ ՀՀԿ-ի ներսում որոշ պատգամավորների մոտ փոփոխություններ են լինում: Ամեն դեպքում` մենք նորից կոչ ենք անելու նրանց կողմ քվեարկելու, ու չեմ բացառում, որ միացողներ լինեն: ՀՀԿ-ն էլ պետք է գիտակցի, որ մի օր իրենց միասնական քվեարկությունները ավարտվելու են:

-ՀԱԿ-ի` մարտի 1-ի հանձնաժողով ստեղծելու նախաձեռնությունը 4 ուժերը որոշեցին պաշտպանել, երբ չկարողացան միասնական եզրակացության գալ կառավարությանը անվստահություն հայտնելու նախաձեռնության շուրջ: Ինչո՞ւ չստացվեց այս ընդհանուր նախաձեռնությունը:

-Ես այդպիսի ամփոփում չէի անի`թե չստացվեց, որովհետև այն, ինչ ստացվել է, առաջիկա քառօրյայում կտեսնենք: Մենք 3 տարբեր հարցերի շուրջ արդեն միասնական եզրակացության ենք եկել` պարտադիր կուտակայինի վերացում, մարտի 1-ի ու «Նաիրիտի» հանձնժողովների ստեղծում, իսկ կառավարությանն անվստահություն հայտնելու խնդիրը քննարկման փուլում է ու փակված չէ:

-Բայց ի՞նչ երաշխիք, որ այդ քննարկումները արդյունք կտան:

-Ոչ մի բանի երաշխիք ոչ մեկը չի տա: Բայց մենք ունենք սկզբունք` աշխատել համաձայնությունների վրա ու տարաձայնությունների վրա չսևեռվել: Կարևորը` կա համատեղ նախաձեռնություններ իրականացնելու քաղաքական կամք:

Քվեարկության պատմություն

Մանուկյան Արամ Վիգենի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Մանուկյան Արամ «Հայ ազգային կոնգրես» 279 157 142 56 330 74 88
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները