Parliamnet Monitoring

  • Facebook
  • Twitter

News

Որոշ ուժեր փորձում են ձերբազատվել մարտիմեկյան ծանր բեռից

Որոշ ուժեր փորձում են ձերբազատվել մարտիմեկյան ծանր բեռից

Հարցազրույց Մարտի 1-2-ի դեպքերն ուսումնասիրող խորհրդարանական ժամանակավոր առաջին հանձնաժողովի  նախագահ Սամվել Նիկոյանի հետ:

- Պարոն Նիկոյան, Ձեր կարծիքով կա՞ 2008-ի մարտիմեկյան դեպքերն ուսումնասիրող ևս մեկ ժամանակավոր հանձնաժողով ստեղծելու անհրաժեշտություն:

- Նայած թե ինչ խնդիրներ են դրվում այդ հանձնաժողովի առաջ: Յուրաքանչյուր պետական մարմին ունի Սահմանադրությամբ իրեն տրված լիազորություններ: Խորհրդարանը քննչական գործառույթ չունի: Այսինքն, սպանության դեպքերը բացահայտելու համար խորհրդարանական որևէ հանձնաժողով չի կարող քննչական գործողություններ կատարել: ԱԺ հանձնաժողովը կարող է դիմել համապատասխան պետական մարմիններին, որպեսզի նրանք կատարեն քննչական գործողություններ: Իսկ եթե նրանք կատարեն այդ գործողությունները, և ամեն ինչ պարզ լինի, իրենք էլ կբացահայտեն մահվան դեպքերը: Ուզում եմ ասել, որ հարցի լուծումը քննչական դաշտում է: Խորհրդարանական կամ որևէ այլ հանձնաժողով քրեական հանցագործությունների դեպքում կարող է միայն մոնիթորինգ իրականացնել ու ժողովրդին տեղեկացնել իրավիճակի մասին:

- Նախաձեռնողներն ասում են, որ հանձնաժողովը ոչ թե մահվան դեպքերն է բացահայտելու, այլ ուսումնասիրելու է մարտի 1-2-ին իրավապահների գործողությունների հիմնավորվածությունն ու օրինականությունը: Միգուցե այդ ուսումնասիրությունները նպաստեն բացահայտմանը:

- Մարտի 1-ի դեպքերն ուսումնասիրող ժամանակավոր առաջին հանձնաժողովն իր եզրակացության մեջ խոստովանել է, որ ցավոք, սպանությունների բացահայտման խնդիրը հանձնաժողովը չկարողացավ լուծել լիազորությունների անբավարարության պատճառով: Եվ կոչ է արել ստեղծել մոնիթորինգի հանձնաժողով, որը կվերահսկի քննչական գործողությունների ընթացքը և պարբերաբար հանրությանն ու խորհրդարանին այդ մասին տեղեկություններ կներկայացնի: Ես հասկանում եմ, որ խորհրդարանը խնդրի հրապարակայնացման, հրապարակային խնդիրների առաջադրման խոսափող է, բայց ոչ քննչական գործողություններ իրականացնող մարմին: Ես ուսումնասիրել եմ այլ երկրների փորձը. խորհրդարանը կարող է նման գործառույթ ունեցող հանձնաժողով ստեղծել, բայց ոչ թե պատգամավորների, այլ փորձագետների մասնակցությամբ:  

- ՀՀԿ խմբակցության պատգամավոր Արտակ Դավթյանը հայտարարեց, որ մարտի 1-ի էջը փակված է և ընդդիմադիրներին կոչ արեց չբացել այն: Մարտի 1-ի էջն անձամբ Ձեզ համար, ՀՀԿ-ի ու ողջ իշխանության համար փակվա՞ծ է:

- Նրանց համար, ովքեր փորձում են գարնանային սրացումների ժամանակ օգտագործել մարտի 1-ը, էջը միշտ էլ բաց է: Իսկ մարտի 2-ին, 3-ին մոռանում են այդ մասին, ինչպես վերջին տարիներին է լինում: Վեց տարի առաջ կար բարձրացված բոլոր հարցերին պատասխան տալու բացառիկ հնարավորություն: Այդ ժամանակ իրադարձությունները նոր էին կատարվել, իշխանությունը նոր էր ձևավորվել, իշխանական համակարգում կար շփոթ, կար միջազգային և հանրային ճնշում: Բոլոր հնարավորություններն ու պայմանները ստեղծվել էին իրենց համար, որ գային և օգնեին հանձնաժողովին, բայց չեկան: Վեց տարի հետո նոր ի հայտ եկած հանգամա՞նք կա, ինչ-որ մեկի հիշողությունը պայծառացե՞լ է, ինչ-որ մեկը նոր փաստական տվյալնե՞ր է բերում:

- Եթե ընդդիմությունը մասնակցեր, Ձեր գլխավորած հանձնաժողովն ավելի՞ն կարող էր անել: Իրավապահ մարմինները հանձնաժողովին ավելի շա՞տ տեղեկություն կտրամադրեին:

- Միանշանակ: Ընդդիմությունը տիրապետում էր իրադարձություններին, գործի ողջ նյութերին: Իսկ մենք ամիսներ շարունակ առաջնորդվել ենք ընդդիմադիր թերթերի հոդվածներով, որովհետև չենք տիրապետել մարտի 1-ի իրադարձություններին:

- Քիչ է մնում ընդդիմությանը մեղադրեք, թե քանի որ չեկան ու չմասնակցեցին հանձնաժողովի աշխատանքներին, այդ պատճառով էլ մարտի 1-ը չբացահայտվեց:

- Բայց ինչու քիչ է մնում, ես ուղիղ ասում եմ, որ դա եզակի հնարավորություն էր: Կար միջազգային և հանրային ճնշում, իրավապահ մարմինների շփոթված վիճակը լավագույնն էր, որ ժամանակավոր հանձնաժողովը արդյունքի հասներ:

- Իշխանությունները, որի ներկայացուցիչն եք Դուք, կամ իրավապահ համակարգը, որը գտնվում էր այդ իշխանությունների ճնշման ներքո, կտայի՞ն այդ հնարավորությունը:

- Ես համաձայն չեմ այդ դիտարկման հետ: Փոխվել էր Ոստիկանության ղեկավարությունը, որն իրեն այնքան էլ պատասխանատու չէր զգում կատարված իրադարձությունների համար: Դա կարևոր հանգամանք է: Ըստ էության, փոխվել էր նաև քաղաքական իշխանությունը: Այդ իրավիճակում հնարավոր էր ավելին անել, քան հիմա է հնարավոր: Բա ո՞րն է նպատակը, որ նման նախագիծ են ներկայացրել: Առջևում մարտի 1-ն է, և փորձում են ինչ-որ հանրային, զանգվածային միջոցառումներ իրականացնել: Սա նաև լրացուցիչ գործոն է, որ միջոցառումները զանգվածային դառնան:

- Պարոն Նիկոյան, չե՞ք կարծում, որ մինչև մարտի 1-ը չբացահայտվի, ՀԱԿ-ը պարտավոր է հարցը բարձրացնել և պահանջատեր լինել. ժամանակավոր հանձնաժողով ստեղծելու առաջարկի տեսքով, հանրահավաքի կամ մեկ այլ միջոցառման և անկախ հանգամանքից, թե իշխանությունները դա գարնանային սրացում թե քաղաքական շահարկում կհամարեն:

- Համաձայն եմ, բայց առաջ դա անում էր միայն ՀԱԿ-ը: Հիմա նրանց միացել են նախկին կոալիցիայի անդամները, և նրանք էլ են դնում նույնպահանջները, իսկ ՀԱԿ-ը սա դրական է գնահատում: Նախկինում բարիկադների տարբեր կողմերում կանգնած մարդիկ հիմա միասին են այդ խնդրին անդրադառնում: Եթե այս տրամաբանությամբ առաջնորդվենք, ապա կգա մի պահ, որ միգուցե հանրապետականների՞ց էլ այնտեղ լինեն:

- Իսկ ինչո՞ւ ոչ: Մենք տեսանք, թե ինչպես Ուկրաինայում օրերս այդ երկրի նախկին նախագահ Վիկտոր Յանուկովիչի «Ռեգիոններ» կուսակցությունը հայտարարություն տարածեց, ղեկավարին  մեղադրեց մեծ մեղքերի մեջ:

- Քաղաքական անախրոնիզմի արդյունքում է այդպես լինում: Ես չէի ցանկանա, որ մարդկանց հիշողությունը խամրեր: Եվ չէի ցանկանա, որ քաղաքական այս կամ այն ուժը կամ գործիչը քննարկման համար ստորագրեր այն նպատակով, որ իրեն ձերբազատի մարտիմեկյան իրադարձություններից: Ստորագրահավաքը, որի արդյունքում տեղի ունեցավ քննարկումը, ես դիտարկում եմ հենց այդ համատեքստում. որոշ անձինք և քաղաքական ուժեր հասարակական գիտակցության մեջ փորձում են իրենց ձերբազատել մարտիմեկյան իրադարձությունների ծանր բեռից: Չեմ ուզում քաղաքական կոնյուկտուրայի դաշտ մտնել, բայց լավ կլիներ, որ իրենք միասին նստեին ու քննարկեին: Նույն թևում այսօր և ցույցերի կազմակերպիչներն են, և Ներքին զորքերի նախկին հրամանատարը, նախկին արտգործնախարարը և այլն: Ի՞նչ է, հանձնաժողո՞վ պետք է ստեղծեք, որ գաք, բան պարզեք: Երկու կողմից էլ կարկառուն ներկայացուցիչներ կան, բա միմյանց հարցրեք:

Քվեարկության պատմություն

Նիկոյան Սամվել Պարգեւի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Նիկոյան Սամվել «Հայաստանի հանրապետական կուսակցություն» 902 9 1 15 36 1 4
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները