Parliamnet Monitoring

  • Facebook
  • Twitter

News

Ոչ իշխանական ուժերին հաջողվել է օրակարգ թելադրել

Ոչ իշխանական ուժերին հաջողվել է օրակարգ թելադրել

Հարցազրույց «Ժառանգություն» խմբակցության քարտուղար Թևան Պողոսյանի հետ:

-Պարոն Պողոսյան, ի՞նչն եք կարևորում կամ առանձնացնում Ազգային ժողովի գարնանային նստաշրջանից:

-Հավանաբար պետք է նշել այն, որ առաջին անգամ երեք ընդդիմադիր և մեկ այլընտրանքային ուժերին, հետո ՕԵԿ-ին հաջողվեց օրակարգ թելադրելու մի քանի փորձ կատարել: Երբ իշխանությունների բերած օրակարգն ամբողջովին կանգնում էր, և մենք կարողանում էինք մեր հարցերն առաջ քաշել: Այդպիսով, խորհրդարանի ընդդիմադիր թևը կարողացավ մի քանի նախաձեռնություն քննարկման դնել: Նաև հաջողվեց հասնել կառավարության ու վարչապետի փոփոխությանը: Ճիշտ է, դա կոնկրետ «Ժառանգության» նպատակը չէր, մեր խնդիրն ամբողջ, համակարգային փոփոխությունն էր, այնուամենայնիվ քայլ առ քայլ հնարավոր է ինչ-որ փոփոխությունների հասնել: Ունեցել ենք նաև չհաջողված դեպքեր, որից պետք է դասեր քաղել, որպեսզի աշնանը սխալները չկրկնենք:

- Կառավարության հրաժարականը համարում եք քառյակի համատեղ գործունեության արդյո՞ւնքը:

- Այդ գործում կար նաև մեր դերակատարումը: Այն արդեն հասունացած խնդիր էր և քառյակի, և հանրային հատվածի համար: Այդ գիտակցմանը եկավ նույնիսկ իշխող կուսակցությունը: Հասկանալի է՝ եթե Հանրապետականը չցանկանար, միգուցե այդ փոփոխությունը չլիներ, բայց եկանք հասանք այն կետին, որ նրանց մոտ էլ ձևավորվեց այն գիտակցումը, որ այլևս չեն կարող շարունակել հին ձևերով և պետք է փոփոխություններ անել:

- Եվ նախորդ, և ներկա կառավարությունը ներկայացնում է նույն կուսակցությունը: Ի՞նչն է փոխվել, որ ասում եք՝ «այլևս չեն կարող շարունակել հին ձևերով»:

- Նոր կառավարությունն ավելի շատ է փորձում հարցերի դեպքում քննարկումներ կազմակերպել, որոշ զիջումների գնալ: Օրինակ, «Կուտակային կենսաթոշակների մասին» օրենքում կատարված փոփոխությունները: Ճիշտ է, այնտեղ ամբողջությամբ չարտացոլվեցին մեր ներկայացրած առաջարկները, բայց նաև չմնաց այն տեսքով, ինչպես կար: Մի կողմից կարող ենք ասել, որ ոչինչ չի փոխվում, բայց իրականում այս փոքրիկ քայլերի միջոցով փոփոխությունների հնարավորություն է ստեղծվում: Եվ գիտակցությունը, որ այլևս հին ձևով հնարավոր չէ շարունակել, արդեն ավելի ակնհայտ է:

- Ասում եք, թե փոփոխություն կա, բայց նոր կառավարությունն էլ նախորդի նման արտահերթ նիստով և հրատապ քննարկման ռեժիմով ԱԺ բերեց բազմաթիվ օրինագծեր, այդ պատճառով էլ ոչ իշխանական ուժերը բոյկոտեցին այն: Այսինքն՝ ԱԺ-ի հետ համագործակցության հարցում կառավարության գործելաոճը կարծես թե չի փոխվել:

- Ոչ, իրականում փոխվել է, որովհետև ներկայացրած նախագծերի մի մասը հետ տարան: Բայց վստահ եմ, որ իրենք էլ հաճույք չեն ստանում իրենց արածից, հատկապես խորհրդարանական մեծամասնությունը, որ կառավարության բերած յուրաքանչյուր նախագիծ սեղմում և անցկացնում է: Պարզապես պարտականության նման խնդիր են փորձում լուծել: Հասկանալի է, որ այսօր ունենք տնտեսական ծանր վիճակ, ինչը բերում է այն խոսակցություններին, թե այսպես աշխատել այլևս չի կարելի: Հուսով ենք, որ այդ բոլոր խոսակցությունները կկարողանանք իրականության վերածել: Իսկ ինչ վերաբերում է ոչ իշխանական ուժերին, ապա մենք ինքներս էլ դեռ ունենք խնդիրներն ընկալելու, ինստիտուցիոնալ աշխատանքի խնդիրը: Եթե կարողանանք շարունակել տարբեր հարցերի շուրջ միասնական դիրքորոշում ցուցաբերելու գործելաոճը, շատ հետաքրքիր զարգացումներ կարող են լինել: Հիմա էլ կան հարցեր, որոնց համար մենք ունենք միասնական մոտեցումներ, ինչը նաև մեզ համար է նորություն, և մենք էլ ենք սովորում այդպես աշխատել: Պետք է վերլուծենք ու հասկանանք մեր բոլոր սխալներն ու բացթողումները, որ սեպտեմբերից չկրկնենք:

-Քառյակի՝ իշխանություններին ուղղված 12 կետերի հրապարակումից մոտ մեկուկես ամիս է անցել: Դուք մոնիթորինգ արե՞լ եք, թե իշխանությունները այդ ուղղությամբ ինչ-որ քայլ ձեռնարկել են:

- Դեռ որևէ բան չի կատարվել, թող աշխատեն: Ավանդույթ կա, թե նշանակումից հետո պետք է 100 օր անցնի, հետո գնահատենք, թե ինչ են անում: Բայց կարծես թե դեբատի մակարդակը փոխվել և ավելի քաղաքական է դարձել: Իսկ այդ քաղաքական դեբատի շրջանակներում պետք է կարողանալ խնդիրներ առաջ քաշել և ոչ թե դրանք անձնավորել: Անձին հարվածելով՝ որևէ փոփոխություն չես բերի: Այդ գիտակցությունը նաև մենք պետք է ունենանք, որ կարողանանք խնդիրները թիրախավորել: Օրինակ, նույն «Որոտանի ՀԷԿ»-ի գործարքը: Ինձ այդ գործարքը չի հետաքրքրում, և ուրախ եմ, որ առաջին անգամ ամերիկյան ներդրումներ են եկել: Բայց այդ գործարքն ինչպիսի ընթացակարգ է անցել, դա է կարևոր: Մենք ինքներս էլ պետք է հասկանանք, թե այսօր իրականացնելու համար ինչ պահանջ է պետք ներկայացնել:

Քվեարկության պատմություն

Պողոսյան Թեւան Ժիրայրի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Պողոսյան Թեւան «Ժառանգություն» 325 243 97 28 249 151 114
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները