Parliamnet Monitoring

  • Facebook
  • Twitter

News

Մենք կուզենայինք, որ ՀՅԴ-ն մասնակցեր հանրահավաքին

Մենք կուզենայինք, որ ՀՅԴ-ն մասնակցեր հանրահավաքին

Հարցազրույց Ազգային ժողովի ԲՀԿ խմբակցության քարտուղար Նաիրա Զոհրաբյանի հետ

-Այն, որ ՀՅԴ-ն չի մասնակցելու երկար սպասված միասնական հանրահավաքին, նշանակո՞ւմ է, որ խոսակցությունները քառյակի պառակտման մասին իրական են դառնում:

-Ոչ: Մենք հասկանում ենք ՀՅԴ-ի մոտեցումը և ըմբռնումով ենք մոտենում դրան: Ավելին, հասկանալի չէր լինի, եթե հանրահավաքին շրջանցվեր այնպիսի առանցքային թեմա, ինչպիսին սահմանադրական փոփոխություններն են, և քանի որ այս լրջագույն խնդրի վերաբերյալ ՀՅԴ-ի և քառյակի մյուս 3 ուժերի միջև կան լուրջ հակասություններ, ՀՅԴ-ն որոշեց չմասնակցել հանրահավաքին, և ՀՅԴ-ի պահվածքը ադեկվատ չէր լինի, եթե անգամ հանրահավաքից առաջ պայմանավորվեինք շրջանցել այդ թեման:

-Իսկ այլ հարցերի շուրջ համագործակցություն կլինի՞:

-Մնացած բոլոր հարցերում մեր համագործակցությունը շարունակվելու է: Դիմելու ենք ՍԴ՝ կուտակայինի խնդրով, ունենք համատեղ որոշման նախագիծ՝ «Նաիրիտի» հարցով հանձնաժողով ստեղծելու մասին: Այնպես որ, մնացած հարցերում համագործակցություն լինելու է:

-Կառավարությանը ներկայացված 12 կետերի վերաբերյալ և՞ս միասնական դիրքորոշում կլինի:

-Մենք քառյակի անունից կամփոփենք այդ պահանջների իրականացումը, և մեր միասնական գնահատականը կհնչեցվի հանրահավաքում: Այնպես որ, պետք չէ ինտրիգներ փնտրել այստեղ: Իհարկե, մենք կուզենայինք, որ ՀՅԴ-ն մասնակցեր և՛ հանրահավաքին, և՛ առաջիկա օրերին կայանալիք մարզային հանդիպումներին, բայց իրավիճակն այսպիսին է:

-ՀՅԴ-ի այս քայլը չի՞ անդրադառնալու քառյակի հետագա համագործակցության վրա:

-Ես իրատես քաղաքական գործիչ եմ ու միամիտ կլինեի, եթե հայտարարեի, որ անդրադարձ չի ունենա: Ամեն բան կախված է դաշնակցության որոշումներից և նրանից, թե իշխանությունը ինչպես կարձագանքի ՀՅԴ-ի պահանջներին:

-Մամուլը գրում էր, թե քառյակի ներսում կա նախնական պայմանավորվածություն միասնական հանրահավաքը հոկտեմբերի 17-ին անցկացնելու մասին: Ինչո՞ւ այսօր որոշվեց հանրահավաքի օրը 1 շաբաթով առաջ գցել:

-Քառյակում երբեք հոկտեմբերի 17-ը չի քննարկվել: Ամենայն պատասխանատվությամբ եմ ասում: Ի սկզբանե 3 քաղաքական ուժերր առաջարկել են հոկտեմբերի 10-ը, իսկ ՀՅԴ-ն ասել է, որ իր տեսակետը կհայտնի սեպտեմբերի 17-ի նիստում:

-Իսկ հոկտեմբերի տասնհի՞նգը: Այդ օրը սահմանադրական փոփոխությունների հայեցակարգի ներկայացման վերջնաժամկետն է. ՀՅԴ-ն չի՞ առաջարկել սպասել մինչև 15-ը, տեսնել՝ իրենց առաջարկությունները կընդունվեն թե ոչ, նոր հանրահավաք անել:


-Հոկտեմբերի 15-ը ևս չի քննարկվել: Այդպիսի հստակ առաջարկ ՀՅԴ-ն չի արել: Իրենք ակնարկել են, թե լավ կլինի, որ հանրահավաքը լինի 15-ին, բայց մենք լավ գիտենք, որ իշխանությունները 15-ին էլ դաշնակցությանը վերջնական պատասխան չեն տալու: Իշխանությունը կօգտվի մանևրելու իր հնարավորությունից: Այդ պատասխանը կարող է լինել սահմանադրական հանրաքվեից մեկ-երկու ամիս առաջ, հետևաբար, տրամաբանական չէր լինի հանրահավաք չանցկացնելը:

-Կարելի՞ է ենթադրել, որ հանրահավաքին չմասնակացելու՝ ՀՅԴ-ի որոշմամբ արդեն ուրվագծվում են ներքաղաքական դաշտի փոփոխությունները՝ ընտրություններին ընդառաջ:

-Հստակ ջրբաժանը կլինի այն ժամանակ, երբ պարզ կլինի՝ ընդունում է իշխանությունը դաշնակցության առաջարկած փաթեթը: Ես գիտեմ, որ ՀՅԴ-ն ունի առաջարկություններ, որոնցից չի հրաժարվի ոչ մի դեպքում: Ինչպե՞ս կվարվի իշխանությունը. այ, դրանից հետո կարելի է խոսել ներքաղաքական դաշտում հստակեցումների մասին: Ես վստահ եմ, որ ՀՅԴ-ի համար սկզբունքային առաջարկությունները չեն ընդունվելու:

-ՀՅԴ-ն հայտարարում է, թե եթե իշխանությունը չընդունի իրենց առաջարկությունները, ինքը նորից կդառնա քառյակի լիիրավ աանդամ. այստեղ ՀՅԴ-ի նկատմամբ վստահելիության խնդիր առաջ չի՞ գալիս:

-Համագործակցության հիմքը, իհարկե, վստահությունն ու կանխատեսելիությունն է գործընկերոջ նկատմամբ՝ անկախ նրանից, թե այդ գործընկերոջ հետ պայմանավորվածությունների ինչպիսի մեխանիզմ ունես: Բայց ասել ենք, որ քառյակը քառյակ է միայն այն դեպքերում, երբ կոնկրետ հարցի վերաբերյալ 4 քաղաքական ուժերը ունեն համաձայնություն: Դե յուրե դաշնակցությունը կարող է հստակ հղում անել քառյակի այս ջենտլմենական պայմանավորվածությանն ու օրակարգից դուրս հանել վստահության և կանխատեսելիության խնդիրը:

Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները