Parliamnet Monitoring

  • Facebook
  • Twitter

News

Եռյակը ղեկավարների մակարդակով պետք է վերացնի թյուրիմացությունները

Եռյակը ղեկավարների մակարդակով պետք է վերացնի թյուրիմացությունները

Parliamentmonitoring.am-ի զրուցակիցը «Ժառանգություն» խմբակցության ղեկավար Ռուբիկ Հակոբյանն է:

- Պարոն Հակոբյան, «Ժառանգություն» կուսակցության ղեկավար Րաֆֆի Հովհաննիսյանը անհրաժեշտ համարեց, որ խորհրդարանական ուժերը ժողովրդի առջև հուշագիր ստորագրեն, որի մեջ կնշեն իրենց նպատակը, այդ նպատակը իրականացնելու միջոցներն ու որոշումներ կայացնելու մեխանիզմները: Նա հայտարարեց, թե ոչ իշխանական եռյակը պետք է հրապարակային գործի, դուրս գա միջանցքներից ու ժողովրդի հետ դեմ առ դեմ լինի: Այս առումով խնդիրներ կա՞ն եռյակում:

- Րաֆֆի Հովհաննիսյանը խոսում է հրապարակային, թափանցիկ գործունեության մասին: Եվ նրանք, ովքեր ծանոթ են նրա գործելաոճին, կհասկանան, որ նա, իսկապես, անկեղծորեն գտնում է, որ պետք է ապահովել թափանցիկություն, որպեսզի ոչ միայն ներսում նստածներն իմանան, թե ինչի մասին է խոսքը, այլև` հասարակության այն հատվածը, որն ընդառաջում, օգնում է եռյակին:

- Իսկ եթե եռյակի ուժերի լիդերների հանդիպումը տեղի չունենա, և այդ հուշագիրը չստորագրվի՞:

-Կարծում եմ՝ սրանք հարցերն են, որոնք կլուծվեն: Ես ասել եմ, որ եռյակը ղեկավարների մակարդակով պետք է վերացնի այս թյուրիմացությունները և կարողանա ամբողջությամբ տեր կանգնել շարժմանը: Իսկ դրա համար պետք չէ նոր հեծանիվ հորինել, պետք է հաճախակի հանդիպել, պետք է կարողանալ ցանկացած ձևակերպում դարձնել միասնական, որ տարընթերցումների տեղիք չտա: Եվ եթե եռյակի առաջնորդներից որևէ մեկը խուսափի կամ խոչընդոտի դրան, պետք է դիտարկել, որ նա այլ խնդիր է լուծում: Չի կարելի խոսել համաժողովրդական շարժման մասին, ժողովրդին ներկայանալ որպես միասնական թիմ, և անտեսել այս շատ պարզագույն հարցը, որը քաղաքական համագործակցության այբուբենն է: Եթե դա չլինի, ուրեմն, իսկապես, մենք խնդիր կունենանք շարժման հետագա ընթացքի հետ կապված:

- «Բարգավաճ Հայաստան» խմբակցության անդամ Միքայել Մելքումյանն անդրադառնալով Ր.Հովհաննիսյանի հայտարարություններին` հարց բարձրացրեց, թե եթե որևէ խնդիր կա, ապա «Ժառանգության» ներկայացուցիչներն ինչու այն չեն բարձրաձայնում եռյակի հանդիպումների ժամանակ:

- Ես չգիտեմ, թե Մ.Մելքումյանն ինչ է ասել, բայց ինքը հավանաբար ներկա չի լինում եռյակի հանդիպումներին և տեղյակ չէ, որ այդ հարցերը մշտապես բարձրացվում են եռյակի խորհրդարանական ձևաչափով հանդիպումների ժամանակ:

- Ր.Հովհաննիսյանն անդրադարձել է նաև «Ժառանգության» խմբակցությունում առկա տարաձայնություններին և հայտարարել, թե կարգապահության պակաս ունեք: Օրինակ, ձեր խմբակցության պատգամավոր Զ.Փոստանջյանը լիովին դեմ է եռյակի ձևաչափով համագործակցությանը, Դուք կանգնած եք հարթակում` եռյակի կողքին:

- Դասական ընկալման առումով՝ քաղաքական թիմը պետք է ներկայանա մեկ դիրքորոշումով: Սա պարզապես անհրաժեշտ է: Եվ այն, ինչ ներկայացվում է խմբակցության կողմից, թե վարչության, թե խմբակցության տեսակետն է: Այո, այդ առումով խնդիր ունենք, և կարծում եմ, որ ի վերջո հարթակ, խորհրդարան պետք է բերել միասնական կարծիք:

- Այդ դեպքում ինչպե՞ս եք մեկնաբանում Զ.Փոստանջյանի պահվածքը, որը խիստ տարբերվում է Ձեր` որպես խմբակցության ղեկավարի դիրքորոշումից թե եռյակի հետ համագործակցության, թե, օրինակ, Սերժ Սարգսյանի իմպիչմենտի և այլ հարցերում:

- Այդ բոլոր հարցերում խմբակցության դիրքորոշումը և վարչության դիրքորոշումն արտահայտել եմ այնպես, ինչպես որ կա: Ն.Փաշինյանը, կարծում եմ, որ նախապես պետք է զրուցեր այլ քաղաքական ուժերի հետ, ում ստորագրությունն ակնկալում էր։ Նման բան չի եղել: Եվ ես կարծում եմ, որ նա ի սկզբանե խնդիր չի դրել ապահովել այդ 44 ստորագրությունը:

- Համաձա՞յն եք Հանրապետական խմբակցության պատգամավոր Արտաշես Գեղամյանի այն դիտարկմանը, թե եթե Ն.Փաշինյանի նախաձեռնության տակ 131 հոգուց երեք հոգի է ստորագրել,  նշանակում է՝ ՀՀ նախագահի քաղաքականությունը վայելում է խորհրդարանի լիարժեք վստահությունը:

- Քաղաքական պայքարն այնպիսին է, որ յուրաքանչյուր ոք ցանկացած վիճակում փորձում է իր եզրահանգումներով ներկայանալ: Ես չեմ կարծում, որ Ա.Գեղամյանի այդ մեկնաբանությունը համապատասխանում է իրականությանը:

- Պարոն Հակոբյան, եռյակի գործունեությունը կարծես թե դադարի փուլում է:

- Ես չէի ասի, թե դադար է: Շտաբներ են ձևավորվում, նաև տեսնում եք, թե խորհրդարանում ինչ լարված օրակարգ է, կարևորագույն հարցեր են քննարկվում: Պարզապես ինչ-որ պահ է գալիս, որ նույն տեմպով չես կարող շարունակել:

- Այսինքն, մարտավարական այն տարաձայնությունը, որ առաջացել էր ԲՀԿ քաղխորհրդի նիստից հետո, դեռ չի՞ լուծվում:

- Պետք չէ արհեստականորեն հակադրել, որովհետև մեկը մյուսի հաշվին չի արվում: Քաղաքական պայքարն այնպիսին չէ, որ եթե ինչ-որ մի բան ես սկսել, պետք է միայն այդ ուղղությամբ գնաս: Այն շատ ավելի հարուստ է, կարող է զարգացման մեջ նոր տարրեր ընդգրկել: Ժամանակի և հնարավորության հարց է: Քաղաքական գործընթացները միայն հանրահավաքով չեն պայմանավորվում:

- Ր.Հովհաննիսյանը դեկտեմբերի 5-ին Ազատության հրապարակում հավաք է հրավիրել: Մինչ այդ այս հարցը քննարկվե՞լ է եռյակի մյուս ուժերի հետ: Նրանք մասնակցելո՞ւ են այդ հավաքին:

- Տարբեր առիթներով ասել ենք, որ եռյակում ընդգրկված ցանկացած ուժ ազատ է ինքնուրույն գործունեություն ծավալելու հարցում, և դա չի հակասում մյուսների սկզբունքներին: Ր.Հովհաննիսյանի այդ նախաձեռնությունը պետք է դիտարկել այս տրամաբանության շրջանակներում: Կմասնակցե՞ն մեր գործընկերները, թե՞ ոչ՝ դա իրենց խնդիրն է, այդ հարցը կա, բանակցում ենք: Բայց ցանկացած տարբերակի դեպքում չի նշանակում, որ դա հակասում է եռյակի սկզբունքներին: Իհարկե, ավելի լավ կլինի, որ մասնակցեն:

Քվեարկության պատմություն

Հակոբյան Ռուբիկ Կարապետի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Հակոբյան Ռուբիկ «Ժառանգություն» 388 172 149 113 141 21 54
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները