Parliamnet Monitoring

  • Facebook
  • Twitter

News

Գյումրեցիների ընդվզումը տեղին էր

Գյումրեցիների ընդվզումը տեղին էր

Parliamentmonitoring.am-ի զրուցակիցը Հանրապետական խմբակցության գյումրեցի պատգամավոր Սուքիաս Ավետիսյանն է:

- Պարոն Ավետիսյան, Ձեզ բավարարեցի՞ն Գյումրիում ռուսական 102-րդ ռազմաբազայի զինծառայող Վալերի Պերմյակովի կատարված ոճրագործության քննության մասին գլխավոր դատախազ Գևորգ Կոստանյանի պարզաբանումները:

- Ընդհանուր առմամբ՝ այո: Մեզ մոտ այնպիսի կարծիք էր ստեղծվել, որ վերջ, ռուսներն իրենց ստահակին վերցրին իրենց վերահսկողության տակ: Բայց Գ.Կոստանյանն ասաց, թե նախաքննության ընթացքում ձեռք կբերվեն կոնկրետ փաստեր, որոնց հիման վրա կարող է դիմել Ռուսաստանի իր գործընկերոջը և փորձել Պերմյակովին պահանջել: Պատգամավորների կողմից շատ կարևոր հարցադրումներ եղան, որ խախտվել են հայ-ռուսական պայմանագրի որոշ կետեր: Եվ համոզված եմ, որ մեր պատգամավորները գրավոր կդիմեն դատախազություն, որ այդ մասով նույնպես գործ հարուցվի: Հուսով եմ, որ առաջիկայում Գ.Կոստանյանը կունենա բավարար հիմքեր, որպեսզի դիմի իր ռուս գործընկերոջը:

- Դուք՝ որպես գյումրեցի պատգամավոր, ունե՞ք Վ.Պերմյակովին Հայաստանի արդարադատությանը հանձնելու պահանջ:

- Կարծում եմ ճիշտ կլիներ, որ այդ զինվորն ի սկզբանե հանձնվեր ՀՀ արդարադատությանը: Բայց այսօր շատ մեծ պահանջ չունեմ, որովհետև նա գտնվում է Գյումրիում, մեր քննիչներն արդեն ներգրավված են նրա հարցաքննության գործում:

- Իսկ չե՞ք կարծում, որ զինծառայողին հայ-թուրքական սահմանից բերման ենթարկելուց հետո և մինչև հայ քննիչների հարցաքննությունը, հնարավոր է, ռազմաբազայում այդ զինծառայողին արդեն որոշակիորեն նախապատրաստել են, թե կատարած հանցագործության վերաբերյալ ինչ պատասխաններ տա:

- Հանցագործության հետ կապված շատ խնդիրներ կան, որոնց պատասխանները մինչ օրս չեմ գտել: Միգուցե այդ պատասխանները կունենամ նախաքննության ավարտին կամ մինչ այդ, կամ արդյոք կիմանա՞նք, թե՞ ոչ: Մինչև օրս բազմիցս փորձել եմ պատասխանել հարցադրմանը, թե ինչպես կարող էր մեկ-մեկուկես ամիս ծառայող 19 տարեկան զինվորը գիշերով մտնել Ավետիսյանների տուն, բոլորին գնդակահարել ու հետո հասնել հայ-թուրքական սահման: Իհարկե, ես չէի ակնկալում, որ լսումներին իմ բոլոր հարցերի պատասխանները կլսեմ: Եթե անգամ որոշ հարցերի պատասխանները կան, ապա դրանք, հավանաբար, դեռ հրապարակման ենթակա չեն: Բայց լսումները կարևոր էին, որ և հասարակությունը, և ռուսական կողմը տեսնեն ու իմանան, որ գործը Ազգային ժողովի ուշադրության կենտրոնում է: Եվ որ ԱԺ-ն հետևողական է լինելու ու փորձելու է օգտակար լինել իրավապահ մարմիններին: Ճիշտ է, ես նրանց պրոֆեսիոնալիզմին չեմ կասկածում, բայց երբ ԱԺ-ն՝ որպես օրենսդիր, վերահսկիչ մարմին, փորձում է իր դերակատարումն ունենալ, բնական է, որ այս դեպքում պատկան մարմինները զգոն կլինեն:

- Ձեզ բավարարե՞ց ռուսական կողմի արձագանքը: ՌԴ նախագահ Վլադիմիր Պուտինը դեպքին արձագանքեց ոճրագործության վեցերորդ օրը, այն էլ ոչ թե պաշտոնական հայտարարությամբ, այլ հեռախոսազանգով:

- Ցանկալի կլիներ, որ պաշտոնական արձագանքն ավելի շուտ լիներ: Հիմա էլ կարծում եմ՝ որքան շուտ գործուն քայլեր իրականացնեն, այնքան մեր ժողովրդի մտահոգությունները շուտ կփարատվեն: Իհարկե, վերջին օրերին արդեն տեսնում ենք ՌԴ արտգործնախարարի արձագանքը: Պատգամավորներ, քաղաքական ու մշակույթի գործիչներ են զանգում ու ցավակցում: Բայց այս ամենի կողքին պետք է տեսնենք գործնական քայլեր, որ քննությունն ավելի շուտ իրականացվի, ավելի շուտ պատժեն այն մարդիկ, ովքեր պատասխանատու են Պերմյակովի դասալքության կամ նրան Գյումրի ուղարկելու համար: Սրանք կարևոր հարցեր են, որոնք զգաստացնելու են, որ հաջորդ անգամ նման դեպքեր չլինեն:

- Ռուսական կողմից այդ արձագանքները եղան գյումրեցիների դժգոհությունից հետո միայն: Այդ դժգոհությունից հետո միայն նրանք հասկացան, որ դեպքն արտառոց է, սովորական հանցագործություն չէ:

- Կարծում եմ՝ գյումրեցիների ընդվզումը, բացի քարանետման դեպքերից, շատ տեղին և բնական էր: Դրանից հետո միայն ՌԴ քննչական կոմիտեի ղեկավար Բաստրիկինը եկավ Հայաստան, մեր քննիչները սկսեցին իրենց քննչական գործողությունները: Գ.Կոստանյանն ասաց, որ գործը լինելու է իր վերահսկողության ներքո և չբացառեց՝ բավարար հիմքեր ունենալու դեպքում պահանջներ կառաջադրվեն ՌԴ համապատասխան մարմիններին:

- Իսկ ինչպիսի՞ն է հիմա ռուսական ռազմաբազայի նկատմամբ գյումրեցիների վերաբերմունքը: Ամեն դեպքում այդ ոճրագործությունը բացասական տրամադրվածություն առաջացրեց:

- Ռուսական ռազմաբազայում լարվածություն նկատվում է: Դժբախտաբար պարբերաբար նման դեպքեր լինում են, և դրանք սեփ են խրում մեր հարաբերությունների մեջ: Ամեն դեպքում բացասական ելևէջներ դրսևորվեցին: Բայց չմոռանանք, որ ՌԴ-ում էլ մենք ունենք շատ հայրենակիցներ: Այնտեղ էլ ռուսները հայերին ցավակցեցին ու փորձեցին սփոփել, իրենք էլ շատ վատ տարան այդ դեպքը: Ռուս զինվորականները միշտ հնարավորություն են ունեցել Գյումրիում ազատ շրջելու, շփվելու, բայց այսօր մտավախություն ունեն, թե կարող է դուրս գան, և իրենց հետ ինչ-որ բան պատահի: Պետք է կարողանանք այդ ամենը զսպել և պահի ազդեցության տակ չլարել իրավիճակը, որովհետև դա որևէ լավ բանի չի բերի: Այսօր բազմահազար հայեր կարողանում են իրենց ընտանիքները պահել ՌԴ-ում կամ ՌԴ-ում աշխատելով: Բազմաթիվ գյումրեցիներ այսօր աշխատում են ռազմաբազայում:

- Չե՞ք կարծում, որ այդ ռազմաբազայում տիրող բարքերը կամ ռուսների՝ Հայաստանում ամեն ինչ անել կարողանալու զգացողությունն է, որ նման իրավիճակներ է ծնում: Այսօր անգամ ռազմաբազան մեր երկրից հանելու կոչեր են հնչում:

- Պատճառը ժամանակին ու ճիշտ պատիժ չկրելն է: Թե գյումրեցիները, թե իրենց ծառայակիցները պետք է տեսնեն, որ խախտում կամ հանցագործություն կատարողները խիստ պատժվում են: Իսկ ինչ վերաբերում է ռազմաբազան հանելուն, ապա ես դեմ եմ նման կոչերին: Այսօր մենք ավելի շատ օգտվում ենք այդ ռազմաբազայից, այն անվտանգության որոշակի խնդիր է լուծում: Բացի դրանից՝ մի քանի հազար հոգի են այնտեղ, որ առևտուր անում են Գյումրիում, իրենց բոլոր հոգսերն այնտեղ են հոգում, աշխուժացնում են քաղաքի սոցիալ-տնտեսական վիճակը: Երկուստեք պետք է այնպես անել, որ այդ միջադեպը խորը հետք չթողի մեր հարաբերություններում:

Քվեարկության պատմություն

Ավետիսյան Սուքիաս Հեգելի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Ավետիսյան Սուքիաս «Հայաստանի հանրապետական կուսակցություն» 912 9 1 14 28 44 17
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները