Parliamnet Monitoring

  • Facebook
  • Twitter

News

Նախագահի ելույթը սադրեց իրավիճակը

Նախագահի ելույթը սադրեց իրավիճակը

Parliamentmonitoring.am-ի զրուցակիցը «Ժառանգություն» խմբակցության ղեկավար Ռուբեն Հակոբյանն է:

- Պարոն Հակոբյան, ի՞նչ է սպասվում փետրվարի 20-ին, գործողությունների ի՞նչ ծրագիր ունի ոչ իշխանական եռյակը:

- Մեր ծրագրերի մասին կխոսենք փետրվարի 20-ին, բայց դա չի նշանակում, որ ծրագիր չունենք: Այն պետք է խմբագրվի, որովհետև մեզ համար անսպասելի էր, որ իշխանությունների կողմից այսպիսի սադրիչ քայլ կձեռնարկվի ոչ միայն ոչ իշխանական ուժերի, «Բարգավաճ Հայաստան» կուսակցության ղեկավար Գագիկ Ծառուկյանի, այլև՝ ընդհանրապես պետության նկատմամբ: Մեր ծրագրերը որոշակիորեն խմբագրվում են, և փետրվարի 20-ին մենք ավելի մանրամասն կխոսենք այդ մասին:

- Հաջորդ շաբաթ տեղի է ունենալու ԱԺ հերթական քառօրյան: Եռյակը քննարկո՞ւմ է նիստերը բոյկոտելու հարցը:

- Շաբաթը նոր է սկսվել, այդ հարցն էլ բնականաբար կքննարկենք: Խորհրդարանական ոչ իշխանական ուժերն անպայման միասնական ծրագիր կմշակեն, թե ինչպես դիմավորել քառօրյան: Բայց հասկանալի է, որ սովորական քառօրյա չի լինի:

- Իսկ «Օրինաց երկիր» և «Դաշնակցություն» կուսակցությունների հետ քննարկե՞լ եք որոշակի հարցերում համագործակցելու տարբերակը:

- Վերջին շրջանում ՕԵԿ-ի հետ գոնե խորհրդարանական ձևաչափով խորհրդակցել ենք, և եթե ուշադրություն դարձրել եք, գրեթե բոլոր հարցերում միասնական դիրքորոշում ունենք: Կարծում եմ, որ առաջիկայում էլ այդպես կլինի: ՀՅԴ-ի հետ` առայժմ ոչ, բայց չենք բացառում, որ կլինեն բանակցություններ, որովհետև այն, ինչ տեղի է ունենում Հայաստանում, չի կարող դիտարկվել երկու անձերի պայքարի հարթության մեջ, դա վերաբերում է պետության ճակատագրին: Եվ բնական է, որ բոլոր քաղաքական ուժերն էլ այս հարցում պետք է ասելիք ունենան:

- Հնարավո՞ր է մանդատները վայր դնելու հարց քննարկեք:

- Բոլոր հարցերն էլ կքննարկվեն, կգտնենք համարժեք քայլեր: Հայաստանն այսօր ոչ ստանդարտ իրավիճակում է:  Պարոն Սերժ Սարգսյանի  ելույթը բավական անսպասելի էր: Ասվեց, թե ծրագրային է, բայց վերաբերեց ընդամենը մեկ անձի, նրան վարկաբեկելուն: Ապրիլի 24-ի հարցում բոլորս կարծես թե միակարծիք էինք, որ սա ոչ միայն համապետական, այլև համազգային տարելից է: Ունենալու ենք բազում հյուրեր: Իշխանությունները պետք է շահագրգռված լինեին, որ դեպի ապրիլի 24 միասնաբար գնանք, բայց տեղի ունեցածը սադրանք էր այդ օրվա և ընդհանրապես քաղաքական դաշտի նկատմամբ:

- Իսկ որքա՞նով օրինաչափ կլինի Գ.Ծառուկյանին մանդատից զրկելու գործընթացն այն դեպքում, երբ Ազգային ժողովի նախագահ Գալուստ Սահակյանն արդեն հարգելի է համարել նրա բացակայությունները:

- Գիտեք, ես արդեն ոչ մի բանի վրա չեմ զարմանում: Ցավոք, այս ընթացքում մենք ականատես եղանք հակաօրինական շատ գործողությունների: Որպես օրենսդիր մարմնի ներկայացուցիչ` նման որոշման մեջ ես օրինականություն չեմ տեսնում: Բայց իմանալով այսօրվա իշխանությունների ձեռագիրը, չեմ զարմանա, եթե հակաօրինական քայլեր ձեռնարկվեն:

- ԲՀԿ-ական մի քանի պատգամավորներ կուսակցությունից դուրս գալու մասին հայտարարություններ են տարածել: Արդյո՞ք սա իշխանությունների ճնշման ադրյունք եք համարում:

- Փիլիսոփայորեն եմ մոտենում այն հարցին, որ, իհարկե, իշխանությունն ունի պատգամավորների և քաղաքացիների վրա ազդելու լծակներ: Որոշակի տեղաշարժեր հնարավոր են, բայց դրանք ընդհանուր գործընթացի վրա լուրջ ազդեցություն չեն թողնի: Միգուցե շահարկման թեմա դառնան:

- Չե՞ք կարծում, որ զանգվածային միջոցառումների դեպքում հնարավոր է ուժ գործադրվի: Հատկապես այն դեպքում, երբ իշխանությունները չեն բացառում, որ եթե իրավիճակը սրվի, անվտանգության նկատառումներից ելնելով, ինչ-որ միջոցառումներ կիրականացվեն:

- Նախ դեռ որոշված չէ, թե մենք ինչ սցենար կիրագործենք, բայց չեմ կարծում, որ իշխանությունը չի գիտակցում, որ այս պահին նման քայլերի դիմելը պետության նկատմամբ հանցագործություն կլինի: Այս դեպքում կարող է նաև հարց առաջանալ, թե ընդդիմությունը կարո՞ղ է հակաօրինական քայլերի դիմել: Ես կարծում եմ` ոչ: Նորից հիշելով Ս.Սարգսյանի ելույթը` մինչև հիմա չեմ կարողանում հասկանալ, թե որտեղ է ծնվել այդ գաղափարը, ով է գրել նման տեքստ, ինչով են առաջնորդվել խորհրդատուները: Փետրվարի 5-ի խորհրդաժողովից երբ դուրս եկանք, մասնակիցներից շատերը դժգոհ էին, թե ինչու արմատական քայլերի մասին չխոսվեց:

- Փաստորեն իշխանություններին է շատ արմատական թվացել:

- Հավանաբար: Եթե հետևել եք խորհրդաժողովին հնչած ելույթներին, նորմալ էվոլիուցիոն զարգացում էր: Իսկ այն, ինչ հետո կատարվեց, բացարձակ անհամարժեք էր: Նաև դրա համար է պատասխանատվությունն ընկնում իշխանության վրա: Ս.Սարգսյանի ելույթը սադրեց հետագա գործողությունները: Եթե քննարկենք հայտարարության կետերը, կտեսնենք, որ բոլորը Սահմանադրույթունից դուրս են: Իշխող քաղաքական ուժն իրեն իրավունք է վերապահում ասել, թե ով ինչ հավակնություն պետք է ունենա: Բայց նման հարցերը որոշվում են ոչ թե ՀՀ նախագահի կամ որևէ քաղաքական ուժի կողմից, այլ՝ Սահմանադրությամբ:

Քվեարկության պատմություն

Հակոբյան Ռուբիկ Կարապետի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Հակոբյան Ռուբիկ «Ժառանգություն» 388 172 149 113 141 21 54
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները