Parliamnet Monitoring

  • Facebook
  • Twitter

News

Ի՞նչ է, գերեվարվա՞ծ եմ. Լյուդմիլա Սարգսյանը՝ իր և ՀԱԿ-ի դիրքորոշումների տարբերության մասին

Ի՞նչ է, գերեվարվա՞ծ եմ. Լյուդմիլա Սարգսյանը՝ իր և ՀԱԿ-ի դիրքորոշումների տարբերության մասին

Հարցազրույց ՀԱԿ խմբակցության անդամ, ՎՍՀԴԿ ատենապետ Լյուդմիլա Սարգսյանի հետ: 

- Տիկին Սարգսյան, Դուք կողմ քվեարկեցիք Հայոց ցեղասպանության 100-րդ տարելիցի կապակցությամբ խորհրդարանի ընդունած հայտարարությանը, և Ձեր դիրքորոշումը տարբերվեց ՀԱԿ խմբակցության դիրքորոշումից:

- Ես ուզում եմ հիշեցնել, որ Ազգային ժողովում ներկայացնում եմ նաև Հնչակյան կուսակցությունը, որի ծրագրային դրույթների հիմնական ուղղությունը Ցեղասպանության ճանաչումն ու պահանջատիրությունն է: Հնչակյան կուսակցությունը Ցեղասպանություն վերապրած կառույց է, իր ամբողջ պատմության ընթացքում պայքարել է ճանաչման գործընթացն առաջ մղելու և պահանջատիրության խնդիրները բարձրացնելու համար: Հետևաբար` ես այդ հայտարարության հարցում չէի կարող համակարծիք լինել ՀԱԿ կուսակցության մոտեցումներին և «կողմ» քվեարկելով՝ արտահայտել եմ Վերակազմյալ սոցիալ-դեմոկրատական հնչակյան կուսակցության տեսակետը:

- Այդ դեպքում հիմա հակասություններ չունե՞ք ՀԱԿ-ի հետ, որի հետ սերտ համագործակցում եք և որի խմբակցության անդամն եք:

- Դուք անընդհատ ինչ-որ հակասություններ եք փնտրում, բայց անձամբ ես որևէ խնդիր չունեմ:

- ՀԱԿ-ում ըմբռնումո՞վ են վերաբերվում Ձեր դիրքորոշմանը:

- Իմ կարծիքով՝ պիտի այդպես վերաբերվեն: Անձամբ ես որևէ մեկի հետ հակասություն չունեմ:

- ՀԱԿ խմբակցության ղեկավար Լևոն Զուրաբյանը հայտարարել էր, որ ՀԱԿ-ը չի կարող «կողմ» քվեարկել այդ հայտարարությանը, քանի որ այն վտանգում է Հայաստանի Հանրապետության և Լեռնային Ղարաբաղի շահերը: Համաձա՞յն եք այս մտահոգությանը:

- Այսօր այդ մասին ես ոչինչ չեմ կարող ասել: Տարիներ շարունակ Լ.Զուրաբյանն արտահայտել է Լևոն Տեր-Պետրոսյանի մտահոգությունը, ինչը նորմալ է: Մենք դեռ չենք կարող ասել, թե ով է ճիշտ, ժամանակը պետք է ցույց տա: Ես կիսում եմ Լ.Տեր-Պետրոսյանի մտահոգությունները, սակայն որպես ավանդական կուսակցության ղեկավար, ես չէի կարող այլ կերպ քվեարկել:

- ՀԱԿ-ի ղեկավարությունն առայժմ ճիշտ չի համարում նաև պահանջատիրության հարցը:

- Ես ներկայացնում եմ մի կուսակցություն, որի ծրագրի հիմքում հենց պահանջատիրությունն է: Երբ ՍԴՀԿ-ն մտել է ՀԱԿ դաշինքի մեջ, այն ժամանակ նրանք իմացել են, որ մեր կուսակցությունը պահանջատիրության հիմքի վրա ստեղծված կուսակցությունն է: 2005թ. էլ՝ ցյուրիխյան արձանագրությունից հետո, մենք ՀԱԿ դաշինքից անկախ դատապարտող ու դիվանագիտական հարաբերությունները բացառող հայտարարությամբ ենք հանդես եկել: Այսինքն, մեր մոտեցումն ըմբռնողական էր, որ, այո, ՀԱԿ-ն իրավունք ունի ինքնուրույն հայտարարությամբ հանդես գալ, բայց ՍԴՀԿ-ն չի կարող դրան միանալ: Եվ մենք հանդես եկանք առանձին հայտարարությամբ: Իսկ հիմա մենք ենք կողմ ԱԺ-ի այս հայտարարությանը:

- Իսկ ի՞նչ նշանակություն կարող է ունենալ Ազգային ժողովի կողմից ընդունված հայտարարությունը:

- Այն չի կարող լուրջ ազդեցություն ունենալ գործընթացների վրա: Ցեղասպանության 100-րդ տարելիցն էր, և խորհրդարանը պետք է ընդուներ նման մի հայտարարություն:

- Դուք ՀԱԿ-ից տարբերվող դիրքորոշում ունեցաք նաև փետրվարի 5-ին, երբ մասնակցեցիք Գագիկ Ծառուկյանի հրավիրած համաժողովին:

- Իսկ ինչո՞վ ես պիտի կաշկանդված լինեի: Ինչու ես գերեվարվա՞ծ եմ: ՀԱԿ-ը՝ որպես կուսակցություն, որոշել էր չգնալ այդ համաժողովին, բայց ՍԴՀԿ-ն՝ որպես արտախորհրդարանական քաղաքական ուժ, որոշեց գնալ: Ես այդ քայլում որևէ վատ բան չեմ տեսնում: Մենք բոլորս էլ համագործակցում էինք ԲՀԿ-ի հետ:

- Հիմա ՀԱԿ-ի հետ ձեր հարաբերությունները նախկինի նման առանց տարաձայնությունների են:

- Իհարկե, նորմալ են: Ինձ համար ոչինչ չի փոխվել;

Քվեարկության պատմություն

Սարգսյան Լյուդմիլա Նարիմանի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Սարգսյան Լյուդմիլա «Հայ ազգային կոնգրես» 433 101 196 84 150 21 16
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները