Parliamnet Monitoring

  • Facebook
  • Twitter

News

Նախկին ԲՀԿ-ից միայն անունն է մնացել. Գ. Ջհանգիրյան

Նախկին ԲՀԿ-ից միայն անունն է մնացել. Գ. Ջհանգիրյան

Հարցազրույց ՀԱԿ խմբակցության պատգամավոր Գագիկ Ջհանգիրյանի հետ:

- Պարոն Ջհանգիրյան, ԱԺ արտահերթ նիստում քննարկվեցին Քրեական և Քրեական դատավարության օրենսգրքերում առաջարկող փոփոխությունները, որոնցով նախատեսվում է խստացնել խոշտանգումների համար նախատեսված պատժամիջոցները: Այս նախաձեռնությունը կարծես թե պաշտպանում էիք:

- Այո, մենք դրան դեմ չէինք: Պատասխանատվության խստացումն անհրաժեշտ է: Պարզապես պետք է համադրել այդ տիպի այլ արարքների, Քրեական օրենսգրքի ընդհանուր պատժային համակարգի հետ և ընդունելի լուծում գտնել: Պատժի որոշումը քրեական իրավունքում քամ քրեական օրենսդրության մեջ ամենաանվիճելի խնդիրն է:

- Խոշտանգումների համար նախատեսված պատժամիջոցների խստացման անհրաժեշտությունն ինչո՞վ եք բացատրում՝ դեպքե՞րն են ավելացել, թե՞ խնդիրը Հայաստանի ստանձնած պարտավորություններն են:

- Նախ՝ կար միջազգային փաստաթղթերին համապատասխանեցնելու անհրաժեշտություն: Ինչ վերաբերում է նման դեպքերի ավելացմանը, ապա, ըստ էության, այդ գործերով պրակտիկա գոյություն չունի: Կարելի է ասել, որ անգամ վիճակագրություն գոյություն չունի: Տարեկան կտրվածքով մեկ, երկու, երեք նման դեպք է արձանագրվում: Բայց չեմ կարծում, որ նման փաստերն իրականում հազվադեպ են: Խնդիրը դրանք արձանագրելն է, համապատասխան ընթացքն ապահովելը: Ես անգամ կարող եմ ասել, որ գործող օրենսդրությունը խոշտանգումը պատժելու համար բավարար լծակներ ու հնարավորություններ նախատեսում է: Բայց ինչպես այլ ոլորտներում, այս դեպքում էլ մենք կաղում ենք ոչ թե օրենսդրության, այլ օրենքը կիրառելու հարցում: Թեև օրենսդրության կատարելագործումը միշտ էլ լավ բան է, մի քիչ էլ անվտանգ բան է:

- Փաստորեն, ինչպես Դուք եք նշում, խոշտանգման փաստերն արձանագրելու առումով Հայաստանում խնդիր կա: Ձեր կարծիքով՝ այդ դեպքերի մեծ մասն ինչո՞ւ հայտնի չի դառնում:

- Նախ՝ դատավարական առումով դրանք շատ դժվար են ապացուցվում, որովհետև ոչ ոք վկաների ներկայությամբ բռնություն չի գործադրում: Եթե բռնություն են գործադրում, ապա դա անում են «ապահով» պայմաններում: Բայցի այդ, հաճախ նաև նրանք, ում նկատմամբ բռնություն են գործադրում հրաժարվում են ցուցմունքներ տալուց, հայտարարություն անելուց՝ հազար ու մի պատճառաբանությունից ու մտավախություններից ելնելով: Բայց այս դեպքում շատ կարևոր է, որ մեզանում հասարակական կարծիքը չի դատապարտում քննության ընթացքում կիրառվող բռնությունները: Իրավագիտակցության մեջ, հատկապես իրավապահ մարմինների աշխատակիցների շրջանում, դրանք «թույլատրելի արտադրական ռիսկեր» են համարվում : Այդ պատճառով էլ դժվար է բացահայտել:

- Պարոն Ջհանգիրյան, նույն արտահերթի ժամանակ դուք ընդդիմացաք Քրեական օրենսգրքում փոփոխություններ նախատեսող մեկ այլ նախագծի: Նաև դժգոհեցիք, որ պատգամավորները չեն հասցրել ծանոթանալ նախագծին:

- Այդ դեպքում փոփոխության անհրաժեշտություն կար: Կառավարությունն, ի պատիվ իրեն, հասկացավ խնդիրը և նախագիծը հետ վերցրեց: Պետաիրավական հարցերի մշտական հանձնաժողովն էլ էր դեմ այդ նախագծին: Առաջարկվում էր համապատասխանեցնել Քրեական օրենսգրքի որոշ դրույթներ Մարդու իրավունքների եվրոպական կոնվենցիային և միջազգային այլ փաստաթղթերին: Ես բավական լուրջ խնդիր, անհամապատասխանություն տեսա այդ նախագծում, դրա համար էլ այդպես արտահայտվեցի: Բացի այդ՝ նախագիծը հենց այդ պահին էին բաժանել, և դեռ չէինք հասցրել ծանոթանալ: Ես վրդովվեցի, որ շարունակվում է այն պրակտիկան, երբ նախագծերը արագ ընդգրկվում են օրակարգ, և մենք չենք հասցնում ծանոթանալ դրանց բովանդակությանը:

- Պարոն Ջհանգիրյան, չե՞ք նկատում, որ իշխանության առաջարկած սահմանադրական փոփոխությունների շուրջ քաղաքական ուժերի համախմբումը ստվարանում է: «Օրինաց երկիր» կուսակցությունը ներկայացրեց իր առաջարկությունները, մինչդեռ ոչ վաղ անցյալում մերժում էր սահմանադրական բարեփոխումների գործընթացը: ՀՅԴ-ն ավելի վաղ էր ներկայացրել իր առաջարկությունները:

- Ես չեմ տեսնում այդ համախմբումը, ավելի շատ անորոշություն եմ տեսնում: ՀՅԴ-ն ի սկզբանե կողմ էր այդ փոփոխություններին, և այդ կուսակցության դիրքորոշման մեջ որևէ փոփոխություն չեմ տեսնում: Հակառակը, ՀՅԴ գործիչների արտահայտություններում տեսնում եմ մտավախություն, որ այնքան էլ վստահ չեն, թե այդ փոփոխությունները կարող են ընթանալ պառլամենտական համակարգի ներդրման ուղղությամբ:

- «Բարգավաճ Հայաստան» կուսակցությունն էլ այդ փոփոխությունների դեմ նախկին էնտուզիազմով չի պայքարում:

-Եթե կուզեք՝ ԲՀԿ-ն նախկին ԲՀԿ-ն չէ, որ ես հիմա այդ կուսակցության դիրքորոշումը համեմատեմ իր նախկին դիրքորոշման հետ: Ավելին՝ ԲՀԿ-ին պետք է փորձենք համեմատել նախկին ԲՀԿ-ի հետ, տեսնենք, թե նո՞ւյնն է:

- Պարզապես ԱԺ փոխնախագահ Էդուարդ Շարմազանովն էր հայտարարել , թե այն հանգամանքը, որ մարտի 12-ին 7 կուսակցություններ Բաղրամյան 26-ում հանդիպել են Սերժ Սարգսյանի հետ, արդեն համախմբում է:

- Ես չեմ կարող այդպիսի բան ասել: ՕԵԿ-ը թեև ինչ-որ առաջարկություններ է ներկայացրել, բայց կրկին կիսանախագահական կառավարման մոդելի կողմնակից է: ԲՀԿ-ից էլ նախկին անունն է մնացել:

- Ամեն դեպքում սահմանադրական փոփոխությունների նկատմամբ նախկին դիմադրությունը կոտրվել է:

- Իշխանական այդ ողջ օպերացիայի իմաստն այն էր, որ միասնական ճակատը քանդվեր:

- Փաստորեն իշխանություններն այժմ կարող են ավելի վստահ քայլերով գնալ դեպի այդ փոփոխությունները:

- Ես այդպես չեմ կարծում: Պառլամենտական կառավարման համակարգը, եթե նույնիսկ նախընտրելի է իշխող քաղաքական ուժի համար, միևնույնն է, մեծ վերապահումներ ունի: Այն Հայաստանի, այսօրվա մեր ռեալ քաղաքական, աշխարհագրական իրավիճակի համար և Եվրասիական տնտեսական միությանն անդամակցելու, Լեռնային Ղարաբաղի հակամարտության և վտանգի առկայության պայմաններում խիստ ռիսկային որոշում կլինի:

- Այսինքն, չե՞ք բացառում, որ իշխանություններն այնուամենայնիվ չգնան խորհրդարանական կառավարման համակարգը ներդնելու քայլին:

- Ես այդպիսի հավանականություն տեսնում եմ, հատկապես այն պարագայում, երբ սահմանադրական փոփոխությունների մասնագիտացված հանձնաժողովին հանձնարարվեց զուգահեռաբար մշակել նաև գործող համակարգը կատարելագործելու տարբերակը:

Քվեարկության պատմություն

Ջհանգիրյան Գագիկ Վրեժի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Ջհանգիրյան Գագիկ «Հայ ազգային կոնգրես» 393 154 196 73 148 84 61
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները