Parliamnet Monitoring

  • Facebook
  • Twitter

News

Ի՞նչ է անում Ի.Զաքարյանը, այդ մարդուն այլևս թույլ չե՞ն տալիս գալ Ազգային ժողով

Ի՞նչ է անում Ի.Զաքարյանը, այդ մարդուն այլևս թույլ չե՞ն տալիս գալ Ազգային ժողով

Հարցազրույց ՀԱԿ խմբակցության ղեկավար Լևոն Զուրաբյանի հետ:

- Պարոն Զուրաբյան, Հյուսիս-հարավ ճանապարհային միջանցքի կառուցման ընթացքին վերաբերող խորհրդարանական լսումների ժամանակ մտահոգություններ հայտնեցիք ծրագրում տեղ գտած չարաշահումների մասին: Ինչի՞ մասին է խոսքը:

- Այդ լսումների ժամանակ ներկայացվեց հոյակապ, տպավորիչ մի կլիպ, գլամուրային մի պատկեր, ֆանտաստիկ մի տեսարան, որը մեզ բոլորիս ոգևորում էր: Մենք հասկանում ենք, թե ինչպիսի կարևոր ռազմավարական օբյեկտ է կառուցվում, որն, իսկապես, կնպաստի տնտեսության զարգացմանը և ժողովրդի համար աշխատատեղերի ստեղծմանը: Այո, այդ ամենի հետ մենք համաձայն ենք: Բայց եթե գումարների մեծ մասը թալանվում է և եթե վտանգ կա, որ այդ ֆանտաստիկ ձեռնարկը չի հասնի ավարտին կամ չի պսակվի հաջողությամբ, ինչպե՞ս կարելի է դրա մասին չխոսել: Ինչպե՞ս կարելի է խոսել վերը նշված դրականի մասին և անտեսել Վերահսկիչ պալատի բացահայտումները: Եվ ես հիմա հարց եմ բարձրացնում. լսումներին ինչո՞ւ ներկա չէին ՎՊ ներկայացուցիչները: Որ այսպես ֆանֆառներով նիստ են կազմակերպել, իրենց մտքով չի՞ անցել, որ պետք է հրավիրեն նաև ՎՊ ներկայացուցիչներին:  Այնքան բացահայտումներ եղան, դրանց մասին լրատվամիջոցներում այնքան գրվեց: Եթե հրապարակված բացահայտումները չեն լուծվելու, ուրեմն ի՞նչ նպատակ է հետապնդում այս ներկայացումը, ո՞ւմ է պետք այդ քարոզչությունը: Այդ վիրտուալ իրականությա՞նը պիտի խաբվենք, երբ գիտենք որ իրականում թալան է տեղի ունենում:

- Ինչո՞ւ եք համոզված, որ թալան է տեղի ունենում, որի արդյունքում տուժում է  որակը:

- Դրա մասին իր հաշվետվությունը ներկայացնելու ժամանակ բարձրաձայնել է ՎՊ նախագահ Ի.Զաքարյանը: Նա չարաշահումների մասին փաստեր է արձանագրել, դրանց մասին համապատասխան զեկույցներ է ներկայացրել: Այդ չարաշահումների ու զեկույցների հիման վրա Ծրագրի իրականացման գրասենյակի տնօրեն Արա Հովսեփյանն ազատվեց աշխատանքից:

- Բայց Ի.Զաքարյանն այդ աղմկոտ հայտարարությունից հետո այլևս չշարունակեց պնդել, որ Հյուսիս-հարավ ճանապարհային միջանցքի կառուցումն ընթանում է չարաշահումներով:

- Այո, դա էլ է հետաքրքիր հանգամանք: Ինչո՞ւ: Իսկ հիմա ի՞նչ է անում Ի.Զաքարյանը, ո՞ւր է նա: Քանի՞ անգամ պետք է մենք այդ հարցը բարձրացնենք: Ի՞նչ է, այդ մարդուն այլևս թույլ չեն տալիս գալ Ազգային ժողով: Ինչպես նախկինում էր գալիս խորհրդարան, շփվում էր հանձնաժողովներում, խմբակցություններում, պատգամավորների հետ քննարկում բոլոր խնդիրները: Հիմա ի՞նչ է պատահել: Իր ա՞նձն է փոխվել, իր թափանցիկության մշակո՞ւյթն է փոխվել: Թե՞ նրան պարզապես արգելել են գալ խորհրդարան: Այս հարցն էլ է ինձ մտահոգում:

- Հյուսիս-հարավ ճանապարհային միջանցքի կառուցման հիմնական ֆինանսավորող Ասիական զարգացման բանկի տնօրեն Դեյվիդ Դոլը լսումների ժամանակ ելույթ ունեցավ, բայց որևէ մտահոգություն չհայտնեց:

- Ես ոչինչ չեմ կարող ասել: Այդ դեպքում եկեք պարզենք, որ Ի.Զաքարյանը ստախոս է  և պատժենք նրան:

- Ի.Զաքարյանի այդ բացահայտումներից հետո նախագահ Սերժ Սարգսյանը խորհրդակցություն հրավիրեց ու նրան «պատժեց»՝ ասելով, թե նման «խայտառակ» գնահատականները որևէ մեկին պետք չեն:

- Քրեական օրենսգրքում մենք պատժի այդպիսի տեսակ չունենք: Չունենք նաև այնպիսի պատիժ, որով մարդուն արգելվում է գալ Ազգային ժողով: Քրեադատավարական օրենսգրքում նախատեսված չէ նաև նման խափանման միջոց:

- Իսկ ինչո՞վ է կարևորվում Հյուսիս-հարավ ճանապարհային միջանցքը, որ հանրային ուշադրությունն այդքան մեծ է այդ ծրագրի նկատմամբ:

- Դա ռազմավարական նշանակություն ունեցող, մոտ մեկ միլիարդ դոլար արժողությամբ մեծ ծրագիր է: Բնականաբար դրանով առանձնանում է: Ու քանի որ խոսքը այդպիսի մեծ գումարի մասին է, շատ կարևոր է այդ ծրագրի հանրային վերահսկողությունը: Իսկ այդ լսումների ժամանակ զբաղված էին ոչ թե խնդիրներ բարձրաձայնելով կամ դրանց համար լուծումներ առաջարկելով, խորհրդարանական վերահսկողություն սահմանելով, այլ՝ իշխանությունների քարոզչությամբ, ինչ-որ գլամուրային կլիպներ ներկայացնելով: Մինչդեռ մեզ հետաքրքիր է, թե ինչպես կարող ենք վերահսկել այդ աշխատանքները: Չէ՞ որ այդ բոլոր գումարները վերցվում են մեր պետության անունից և ապագա սերունդների վզին դսռնում են մեծ պարտք: Մեզ հետաքրքրում է, որ այդ գումարներն օգտագործվեն հռչակված նպատակների ուղղությամբ, որից հետո, իսկապես, հնարավոր կլինի աշխատացնել տնտեսությունը, հետ բերել այդ գումարներն ու փակել վերցրած վարկերը: Բայց մենք նման բան չենք տեսնում:

- Այնուամենայնիվ, ծրագրի որոշակի հատվածներ արդեն պատրաստ են և երթևեկելի: Դուք հավանաբար անցել եք նոր կառուցված այդ հատվածներով, գո՞հ եք դրանց որակից:

- Այդ մի քանի կիլոմետր հատվածներով չենք կարող գնահատել ամբողջը: Մենք տեսնում ենք շատ դանդաղ ընթացող, չարաշահումների մասին մշտական տեղեկություններով զուգորդվող մի գործընթաց: Ես կարծում եմ, որ իսկապես լուրջ վտանգ կա, որ այդ հզոր ծրագիրը կարող է և չգա իր վերջնական հանգուծալուծմանն ու չծառայի ժողովրդին:

- Իսկ ինչպե՞ս եք գնահատում այն հանգամանքը, որ ռազմավարական նշանակություն ունեցող ծրագիրը խորհրդարանում ներկայացվում էր ոչ թե տրանսպորտի և կապի ու էկոնոմիկայի նախարարների, այլ նրանց տեղակալների կողմից:


- Դա հուշում է խորհրդարանի նկատմամբ վերաբերմունքի մասին: Իշխանությունները խորհրդարանը համարում են մի ձևական ֆորում և իրենց տեղակալներին են այստեղ ուղարկում:

Քվեարկության պատմություն

Զուրաբյան Լեւոն Արամի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Զուրաբյան Լեւոն «Հայ ազգային կոնգրես» 269 159 152 82 302 69 78
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները