Parliamnet Monitoring

  • Facebook
  • Twitter

News

Ես ուզում եմ, որ երկրում լինի ժողովրդի կողմից ընտրված ուժեղ նախագահ, եթե կուզեք՝ թագավոր

Ես ուզում եմ, որ երկրում լինի ժողովրդի կողմից ընտրված ուժեղ նախագահ, եթե կուզեք՝ թագավոր

Հարցազրույց ԱԺ պատգամավոր Հրանտ Բագրատյանի հետ:

- Պարոն Բագրատյան, սահմանադրական փոփոխությունների նախագծի քննարկման շրջանակներում հանդիպեցիք նախագահ Սերժ Սարգսյանի հետ: Փոփոխությունների հիմնական նպատակը անցումն է կառավարման խորհրդարանական համակարգին, որին Դուք դեմ եք: Այդ դեպքում ինչո՞ւ հանդիպեցիք:

- Այո, ես դեմ եմ, բայց դեմ լինելով՝ հանդիպել եմ, որովհետև ասելիք ունեի, որովհետև այդ նախագծում կան կոպտագույն սխալներ: Սոցիալ-տնտեսական գլուխների վրա որևէ մասնագետ չի աշխատել: Այդ ոլորտների հետ կապված իմ կողմից եղել է 12 լուրջ առաջարկություն: Օրինակ, նախագծի 10-րդ հոդվածում գրված է, թե Հայաստանն ունի սոցիալական շուկայական տնտեսություն: Ես փորձել եմ նախագահին համոզել, որ դա սխալ արտահայտություն է: Հետո նախագահի հանձնարարությամբ եղել է հանդիպում Սահմանադրական փոփոխությունների մասնագիտական հանձնաժողովի նախագահի հետ, և ես բացատրել եմ, թե մեր երկրում կենսաթոշակային համակարգն արդեն կայացել է, և սոցիալականությունն էլ շուկայի հետ կապ չունի: Շուկան կառավարում ես, շատ ես հարկերը սահմանում՝ 40-50 %, ստանում ես սոցիալական երկիր, քիչ ես սահմանում՝ 25 %, ստանում ես ոչ սոցիալական: Սոցիալական-շուկայական տերմինը տեղին կլինի օգտագործել այն դեպքում, երբ ընկերությունների վրա դրվում են սոցիալական պարտավորություններ:

Կամ՝ Կենտրոնական բանկին, գնաճը զսպելուց բացի (սա տրվել է 2005թ. սահմանադրական փոփոխությունների ժամանակ և կրկին սխալ է արվել), տրվել է նաև ֆինանսական կայունության իրավունք: Ես ասում եմ, որ դա էլ ճիշտ չէ: Եթե գրում ենք, որ ԿԲ-ն ապահովում է ֆինանսական կայունություն, ապա կառավարությունը, ըստ էության, դառնում է ԿԲ-ի մի բաժինը: Այդ դեպքում ինչի՞ համար է խորհրդարանական հանրապետությունը, կառավարությունը կամ վարչապետը, ով ի վերուստ ունի 5 անգամ քիչ գործառույթ, քան ԿԲ նախագահը: Այս մասին ես նախագահին զգուշացրել եմ: Բացի այդ՝ ԿԲ-ի գործառույթը չէ ֆինանսական կայունության ապահովումը, ԿԲ-ի գործառույթն է ֆինանսական միջնորդությունների կարգավորումը և վերահսկումը: Բայց նախ պետք է գրել, որ ԿԲ-ն կարգավորում է դրամավարկային քաղաքականությունը, իսկ դրանից հետո, այո, կարգավորում է և վերահսկում է ֆինանսական միջնորդության շուկան, այլ ոչ թե ֆինանսական շուկան: Ֆինանսական շուկայի մեջ, օրինակ, մտնում է նաև բյուջեն, դա էլ հո ԿԲ-ինը չէ՞: Սահմանադրության փոփոխությունների նախագծում մենք ունենք այսպիսի տասներկու նոնսենս, որը պարզապես տրամաբանական չէ:

- Սերժ Սարգսյանն ընդունե՞ց Ձեր այս դիտարկումները, նա հակվա՞ծ է կատարել այդ փոփոխությունները:

- Ես դա Ս.Սարգսյանին բացատրել եմ, իսկ հակված է թե ոչ՝ պետք է հարցնել նրա աշխատակազմից: ԿԲ-ի մասին շատ լուրջ խոսակցություն ունեցանք: Հանձնաժողովի անդամների ասելով՝ ԿԲ-ն Արժույթի միջազգային հիմնադրամից թուղթ էր բերել, որ այդպես չէ: Ես դրա հետ համաձայն չէի և հիշեցրեցի, որ Վրաստանը վերջերս ընդունել է օրենք, որը ԿԲ-ից խլել է վերահսկողության գործառույթները: Իսկ մենք գիտենք, որ Վրաստանը նույնպես համարվում է ԱՄՀ-ի խորհուրդներին հետևող երկիր: Այստեղից էլ ակնհայտ դարձավ, որ ԿԲ-ի որոշ ղեկավարներ գալիս են ինչպես Ազգային ժողով, այդպես էլ սահմանադրական փոփոխությունների հանձնաժողով և պարզապես բլբլացնում են առանց հիմքերի:

- Իսկ ինչո՞ւ համաձայն չեք խորհրդարանական կառավարման համակարգի ներդրման հետ:

- Ես կարծում եմ, որ մեր երկրում կիսանախագահական համակարգից պետք է անցում կատարել նախագահական համակարգի: Խորհրդարանը, հանրապետական մեծամասնությունը 2017 թվականից հետո կիսվելու է 10-15 օլիգարխի մեջ: Ես ուզում եմ, որ երկրում լինի ժողովրդի ընտրած ուժեղ նախագահ: Եթե կուզեք՝ թագավոր, որովհետև մենք պատերազմի մեջ ենք, և մեկ Թուրքիայի կողմից ենք ճնշվում, մեկ՝ Ադրբեջանի: Մենք բավականին բարդ վիճակում ենք ԱՄՆ-ի ու Ռուսաստանի սառը հարաբերությունների պատճառով: Եվ հիմա ցանկանում են գալ, ամենակարևոր հարցերը խորհրդարանին հարցնել, և խորհրդարանական մեծամասնությո՞ւնը դրանք որոշի: Չի լինելու խորհրդարանական մեծամասնություն, մենք կունենանք կոոպերատիվ պետություն: Այդ համակարգը մեզ համար չէ:

- Այդ դեպքում ինչպե՞ս եք պայքարելու փոփոխությունների ընդունման դեմ: Կհամագործակցե՞ք մյուս ուժերի՝ «Ոչ»-ի շարժման, այլ նախաձեռնությունների հետ:

- Պայքարելու ենք: «Ոչ»-ի շարժումը թող իր ձևով պայքարի, մենք էլ կարող ենք համաձայնեցված գնալ այն համայնքները, որտեղ նրանք չեն գնում: Ես ձեզ ասեմ, որ մենք «Ոչ»-ի շարժման մեջ կանք, բայց ընդդիմության մեջ ես չեմ ուզում ուրիշի ջրաղացին ջուր լցնել: «ՈՉ»-ի պայքարում կան ուրիշ տարրեր: Օրինակ, արտահերթ նախագահական ընտրություններ և այլ բաներ: Ես դրա հետ գործ չունեմ:

- Չեք ցանկանում, որ իշխանափոխություն լինի:

- Խնդիրը իմ ցանկանալ-չցանկանալը չէ, այդ դեպքում ես պետք է հասկանամ, թե ով է այդ ընդդիմության ղեկավարը: Երեկ հայտնի մի օլիգարխ էր, ո՞վ է լինելու այսօր: Սա արդեն ինձ համար շատ կարևոր սկզբունքային հարց է: Ես իմ «Ոչ»-ն այսպես էլ կարող եմ ասել և համապատասխան կոչեր անել:

- Դուք համաձայն չե՞ք ընդդիմության այն դիտարկման հետ, որ Ս.Սարգսյանն այս նախաձեռնությունն անում է 2018թ. հետո էլ իշխանությունն իր ձեռքում պահելու համար, իսկ քաղաքական ուժերի հետ հանդիպում է Սահմանադրական փոփոխությունների շուրջ կոնսոլիդացիա ցույց տալու համար:

- Բացարձակ համաձայն չեմ երկրորդ մտքի հետ: Նրանք, ովքեր նման բան են ասում, տարիներ առաջ իրենք էին գնում հանդիպման: Այս պահին Ս.Սարգսյանն իրականացնում է սահմանադրական փոփոխություններ և դրա իրավունքն ունի: Մեր իրավունքն էլ հանդիպելն ու մեր դիտողությունները ներկայացնելն է: Եվ դա որևէ կապ չունի այն բանի հետ, թե ինչպես ենք վերաբերվում 2008թ. կամ 2013թ. ընտրություններին: Ինչ վերաբերում է իշխանությունն իր ձեռքում պահելուն, դա, իհարկե, կա: Բայց նա իրավունք ունի փոխել Սահմանադրությունը: Իհարկե, եթե շատ բարոյական լիներ մոտեցումը, համակարգը պետք է փոխվեր հաջորդ իշխանությունների համար:

Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները