Parliamnet Monitoring

  • Facebook
  • Twitter

News

Է.Մարուքյան. Պատասխանատվությունը կնվազի, ու չի լինի գրասենյակ պահելու պարտավորվածություն

Է.Մարուքյան. Պատասխանատվությունը կնվազի, ու չի լինի գրասենյակ պահելու պարտավորվածություն

Մեծամասնական ընտրակարգով ընտրված ԱԺ 41 պատգամավորներին ներկայացնող մեր շարքի հերթական զրուցակիցը թիվ 30 ընտրատարածքից ընտրված պատգամավոր Էդմոն Մարուքյանն է:

-Որո՞նք են եղել Ձեր նախընտրական ծրագրի առաջնահերթությունները:

-Իմ նախընտրական ծրագիրը շատ իրատեսական է եղել: Առանձնացրել ենք մի շարք սկզբունքային ոլորտներ, իսկ խոստոումների առումով եղել ենք շատ աղքատ: Միակ խոստումը, որ ես տվել եմ իմ ընտրողներին, այն էր, որ լինելու եմ պրոֆեսիոնալ պատգամավոր, ներկայացնելու եմ իմ ընտրատարածքի շահերը, միշտ հասանելի եմ լինելու ու պահելու եմ հետադարձ կապը ընտըրողներիս հետ: Դրա համար ստեղծել եմ, և 2012 թվականի հունիսի 1-ից մինչև այսօր գործում է իմ գրասենյակը:

-Այնուամենայնիվ, ծրագրային 1-2 առաջնահերթություն կնշե՞ք:

-Մենք շեշտը դրել ենք մարդու իրավունքների պաշտպանության մեխանիզմների, քրեական արդարադատության վրա: Եթե այսօր օրակարգում եղած նախագծերը նայեք, կտեսնեք, որ ես հենց այս խնդիրների վերաբերյալ բազմաթիվ նախագծեր եմ հեղինակել: Ես չեմ փորձել մտնել այնպիսի ոլորտներ, որոնք իմ չեն:

-Անցած տարիների ընթացքում եղե՞լ է առաջնահերթության փոփոխություն:

-Ոչ: Վերջերս նայում էի նախընտրական շրջանի իմ ամփոփիչ ասուլիսը, ու տեսա, որ բան չի փոխվել: Ինչ ձևով մտել եմ մեծ քաղաքականություն, նույն սկզբունքները, մոտեցումները մնացել են: Ես խոսել եմ նույնիսկ որևէ կուսակցության մեջ մտնելու մասին, երբ դեռ խոսք չկար քաղաքական ուժ ստեղծելու շուրջ, բայց ասել եմ, որ առաջիկա 3 տարում չեմ տեսնում ինձ որևէ քաղաքական ուժի մեջ: Այդպես էլ եղավ:

-Ծրագրային ո՞րն խոստումն եք իրականացրել:

-Ես ամբողջությամբ իրականացրել եմ իմ կարևոր խոստումը. հասանելի լինել ընտրողին: Թիվ 30 ընտրատարածքի բնակիչները ցանկացած ժամի կարող են դիմել ինձ, իմ համարը բոլորն ունեն:

-Ի՞նչ հարցերով են Ձեզ զանգում:

-Սկզբնական շրջանում մի քանի անգամ դիմել են ուսման վարձ վճարելու, հովանավորելու հարցերով, բայց շատ կարճ ժամանակ անց հասկացան, թե ինձ, որպես իրենց ներկայացուցիչ, որ ոլորտներում կարող են օգտագործել: Ես բիզնեսմեն չեմ, զբաղվում եմ դասական պատգամավորական գործունեությամբ, և ինձ դիմում են հիմնականում իրավական խնդիրներով: Ես կատարում եմ պատգամավորի անհատական աշխատանք և ընդհանուր օրենսդրական աշխատանք: Այս երկու ուղղություններով էլ իմ ընտրողը կարող է հպարտանալ:

-Այդ անհատական աշխատանքը ինչպե՞ս է դրսևորվում. փաստաբանական գործունեություն կամ իրավական խորհրդատվությո՞ւն եք իրականացնում:

-Ոչ: Ամեն պատգամավորի բերանից հնչում է 60.000 մարդու ձայն: Երբ քաղաքացին դիմում է, թե նպաստը կտրել են, պատգամավորը լիազորությունների շրջանակներում պետք է ընթացք տա: Նամակին չպատասխանելը հանգեցնում է էթիկայի կանոնների խախտման: Ես ամեն տարի «Վանաձորյան խճանակարում» ներդիր եմ հրապարակում, որտեղ մանրամասն ներկայացված է իմ պատգամավորական գործունեությունը:

-Ուրեմն, 5 բալանի սանդղակով որքա՞ն կգնահատեք Ձեր գործունեությունը:

-Ես ճիշտ չեմ համարում ինքս իմ գործունեությունը գնահատելը: Այդ գնահատականը տալու տարբեր մեթոդներ կան, ու դրանցից լավագույնը ընտրություններն են:

-Բայց լինում են, չէ՞, դիմումներ, որոնք մերժվում են:

-Մերժելու հարց չկա: Մեր մերժումն այնպես է կազմվում, որ դա ստանալով էլ մարդը բավարարված լինի: Այսինքն, հասկանում է, որ մեզ չպիտի դիմեր: Եթե ես գնամ գազի գրասենյակ ու ասեմ՝ մեր ջրերը կտրել են, կլինի՞:

-Մեծամասնական ընտրակարգով ընտրված պատգամավորները կազմում են խորհրդարանի ¼-ը. ինչպե՞ս եք գնահատում այս հատվածի ազդեցությունը Ազգային ժողովի գործունեության վրա:

-Ես չեմ առանձնացնի կոնկրետ մեծամասնականը: Խնդիրը ոչ թե ընտրակարգն է, այլ ընտրական համակարգը: Մենք ընդդիմության պահանջով հրաժարվեցինք մեծամասնական ընտրակարգից ընդհանրապես, բայց ես համոզված եմ, որ դա սխալ քայլ էր, և վաղ թե ուշ՝ հասկանալու են, որ դա պետք չէր անել: Պատգամավորը ամենահասանելի բարձրաստիճան անձն է: Ամենաշատը մարդկանց հետ նա է շփվում, իսկ մեծամասնականով ընտրվածների շփումն ավելի մեծ է: Մենք այս ընտրակարգը վերացնելով ճիշտ բան չենք անում, կտրում ենք կապը ժողովրդի հետ:

-Եթե պատգամավոր ընտրվեք համամասնական ցուցակով, դա կսահմանափակի՞ Ձեր գործունեության հնարավորությունները թե՞ հակառակը:

-Պատասխանատվությունը կնվազի, ու չի լինի պարտավորվածություն գրասենյակ պահելու, մարդկանց հետ հանդիպելու: Համամասնականով ընտրվածները ուղղակի պատասխանատվություն ընտրողի առաջ չեն կրում: Նրանք ընտրվում են կուսակցության միջոցով, ու պատասխանատու են կուսակցությանը կամ այն մարդուն, ով իր անունը գրել է ցուցակում: Այսինքն, պատասխանատվության և հաշվետվողականության սլաքը փոխվում է: Բայց ես կանխատեսում եմ, որ համամասնական ցուցակներով ԱԺ են գալու մարդիկ, ովքեր մինչ դա ընտրվել են մեծամասնականով, այսինքն, խնդիրը կմնա չլուծված:

Քվեարկության պատմություն

Մարուքյան Էդմոն Հրաչիկի

Անուն Խմբակցություն Կողմ Դեմ Ձեռնապահ Չի քվեարկել Բացակա Հարցեր Ելույթներ
Մարուքյան Էդմոն Խմբակցություններում չընդգրկված 497 109 94 81 182 136 103
Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները