Parliamnet Monitoring

  • Facebook
  • Twitter

News

Մեզ նայելով՝ հանրապետականները սկսեցին կարդալ, գրագիտանալ

Մեզ նայելով՝ հանրապետականները սկսեցին կարդալ, գրագիտանալ

Parliamentmonitoring.am-ը ԱԺ խմբակցությունների հետ ամփոփում է 9-րդ նստաշրջանի արդյունքները: Մեր զրուցակիցը  ՀԱԿ խմբակցության քարտուղար Արամ Մանուկյանն է:

- Պարոն Մանուկյան, ինչպե՞ս եք գնահատում գարնանային նստաշրջանի ընթացքում խորհրդարանի աշխատանքը, ի՞նչ եք առանձնացնում:

- Ձեր կազմակերպությունը կուսումնասիրի և կտեսնի, որ արտահերթ ռեժիմով կրկին ավելի շատ օրենք է ընդունվել, քան հերթականով: Այդ օրենքները «թըփ-շըփ»-ի ռեժիմով են քննարկվում, փորձաքննություն չեն անցնում, հասարակությունը դրանց մասին բավարար տեղեկություններ չի ստանում: Հասարակական կառույցներն ու քաղաքացիական խմբերը, որոնք հետաքրքրված են այդ օրենքներով, չեն հասցնում դրանց հետևել: Մենք էլ ֆիզիկապես չենք հասցնում կարդալ այդ նախագծերը, ուր մնաց` ուսումնասիրենք կամ վերլուծենք: Նույն ռեժիմով են անցնում նաև վարկային համաձայնագրերը, որոնք միայն այս կիսամյակ կազմեցին շուրջ կես մլրդ դոլար: Մենք այս արագությամբ երբեք վարկեր չենք վերցրել: Արտաքին պարտքն արդեն 5,5 մլրդ դոլարի է հասնում, դա ՀՆԱ-ի 50%-ից ավելին է: Այս վիճակը, բնականաբար, անդրադառնում է մեր օրենսդրության վրա:

- Իսկ քաղաքական առումով կիսամյակն ինչպիսի՞ն էր:

- Քաղաքական առումով նստաշրջանը նախորդներից առանձնապես չէր տարբերվում: Միակ բանը, որով առանձնացավ, Ընտրական օրենսգրքի ընդունումն էր: Հաջողություն էր, որ կարողացանք իշխանությունների ցանկությանը հակառակ նրանց բերել բանակցությունների սեղանի շուրջ: Մեզ միացավ նաև քաղհասարակությունը: Մինչ այժմ նման բան չէր եղել: Կհիշեք, թե մեր 5 առաջարկների մասին իշխանություններն սկզբում ինչ էին ասում: Վիրավորական արտահայտություններ էին անում, թե իրենք ժամագործ չեն, անիմաստ գործով չեն զբաղվում, թե Վենետիկի հանձնաժողովը նման փոփոխություն թույլ չի տալիս: Եթե համեմատեք 4 ամիս հետո ունեցած արդյունքների հետ, կտեսնեք, որ իսկապես հաջողություն ենք ունեցել: Դա քաղաքական միակ հաջողությունն էր, որը տեղի ունեցավ քաղաքական ուժերի, քաղաքացիական հասարակության ու միջազգային կառույցների համագործակցության արդյունքում:

- Ձեր կարծիքով կատարված փոփոխությունները համարժե՞ք են այն մեկ կետին՝ ռեյտինգային քվեարկությանը, որի պահպանումը իշխանությունների համար խիստ սկզբունքային հարց էր:

- Չենք կարող նման համեմատություն անել, մենք դրել էինք 5 կետ, որից 3,5-ի կամ 4-ի ընդունումը մեզ համար հաջողություն է, բայց դա չի նշանակում, որ մենք գոհ ենք դրանից: Այդքան մասով՝ այո, գոհ ենք, ցուցակները հրապարակելը, ցուցակները մաքրելն ու ընտրատեղամասերում նկարահանող սարքավորումներ տեղադրելը մեծագույն հաջողություն էր: Բայց այդ չկատարված մեկ պահանջի վերաբերյալ հատուկ կետ ընդունվեց, որ բանակցությունները շարունակվելու են: Բացի ՀՀԿ-ից` քաղաքական մյուս ուժերը խնդիր ունեն հանելու այդ ռեյտինգային քվեարկությունը: Խաղը դեռ ավարտված չէ: Ընդհանուր առմամբ օրենքը շատ վատն է:

- Եթե այդ փոփոխությունները կյանքի կոչելու համար անհրաժեշտ ֆինանսավորումն ապահովվի, կարելի՞ է ասել, որ ընտրակեղծիքներ իրականացնելու հնարավորություններն էապես կնվազեն:

- Կեղծիքների բազան բավականաչափ կփոքրանա: 10 մատով նախագրանցում իրականացնելն աննախադեպ է: Դա նշանակում է, որ այն մեծ դաշտը, որ ասում էինք, թե արտասահմանում գտնվող 500-600 հազար մարդ Հայաստանում չլինելով՝ քվեարկում է, կրճատվում է: Քվեաթերթիկները այլ ուժի կամ թեկնածուի համար դնելու, արկղը փոխելու, վստահված անձանց ծեծելու կամ դուրս հանելու դեբոշներն էլ տեսախցիկների առկայության դեպքում են սահմանափակվելու: Դրան հավելած՝ ցուցակների հրապարակումը, որ հետո մենք կարողանանք ստուգել, թե ովքեր են քվեարկել, կամ արդյոք դրսում գտնվողի փոխարեն չեն քվեարկել, էապես կնվազեցնեն կեղծելու հնարավորությունները:

- Պարոն Մանուկյան, այս նստաշրաջնում էլ պահպանվեց այն միտումը, երբ ընդունված օրենքների, այսպես ասենք, խիստ սիմվոլիկ մասն են ԱԺ-ի նախաձեռնությունները: Կառավարման խորհրդարանական համակարգին անցնելու դեպքում կարծո՞ւմ եք պատկերը կփոխվի:

- Քաղաքական մշակույթի խնդիր է: Եթե խորհրդարան գան նորմալ մարդիկ՝ համարձակ, գրագետ և ոչ թե 20 տարվա լալկանություն ունեցող պատգամավորներ, իհարկե, պատկերը կփոխվի: Բայց եթե գլուխներին բամփում են, թե ձեններդ կտրեք, դուք միայն որպես կոճակ պետք է աշխատեք, այդ դեպքում ինչ նշանակություն ունի, թե ինչ պրոդուկտ են տալիս: Դա իրենց համար որակ չէ, իրենց համար որակն իրենց խնդիրները լուծելն է. մեկի արտադրած արաղի ակցիզային հարկը հարկավոր է իջեցնել, մյուսի կոնյակինը` բարձրացնել, դա են լուծում: Նրանց քաղաքական նպատակները չէ, որ առաջնորդում են: Խորհրդարանական կառավարման համակարգը որակ չի փոխի, եթե ընտրությունները չանցկացվեն այնպես, որ ոչ թե կրիմինալը, այլ քաղաքական, գրագետ դեմքերը գան խորհրդարան: ՀԱԿ-ը խորհրդարանում թվով քիչ է, բայց որակ է բերել: Մեզ նայելով՝ հանրապետականները սկսեցին կարդալ, սկսեցին գրագիտանալ: Իսկ երբ քառյակ կամ եռյակ ձևաչափն էր գործում, ու մենք 45-55 ձայն ունեինք, խորհրդարանը եռում էր, մինչև «Դաշնակցությունը» գնաց, իսկ ԲՀԿ-ն քանդեցին:

Compare
 

Ով է քեզ ներկայացնում

  • Արխիվ

    • Facebook
    • Twitter
  • Ամենաընթերցվածները